ەلورداداعى ۇلتتىق اكادەميالىق كىتاپحانادا اسا كورنەكتى ادەبيەتتانۋشى عالىم, مەملەكەتتىك سىيلىقتىڭ لاۋرەاتى, اكادەميك زاكي احمەتوۆكە ارنالعان «عالىمدار جانە حاتتار» اتتى ەپيستوليارلىق جانردا جازىلعان كىتاپتىڭ تانىستىرىلىمى ءوتتى.
بۇل جيناققا قر ورتالىق مەملەكەتتىك مۇراعاتى مەن ۇلتتىق اكادەميالىق كىتاپحاناسىنداعى اكادەميكتىڭ جەكە كىتاپ قورىندا ساقتالعان قۇجاتتاردان الىنعان دۇنيەلەر ەندى. ونىڭ ىشىندە زاكي اعامىزدىڭ كەڭەس داۋىرىندە جالپاق ەل مويىنداعان اكادەميكتەر سەرگەي مالوۆ, ۆيكتور جيرمۋنسكي جانە وتاندىق عىلىمنىڭ دامۋىنا ۇلەس قوسقان الكەي مارعۇلان, ساقتاعان بايىشەۆ, ماناش قوزىباەۆ سەكىلدى عالىمدارمەن پىكىرلەسىپ, وي بولىسكەن حاتتارى مەن زەرتتەۋ ەڭبەكتەرى بار. بۇل قۇجاتتاردى جاي شولىپ وتە المايسىز. وندا عيبراتتى عالىمنىڭ ادەبيەتتانۋ عىلىمى ءۇشىن ايتقان تىڭ ويلارى ءسىزدى دە تولعاندىرماي قويمايدى.
زاكي احمەتوۆتىڭ «قازاق ولەڭىنىڭ قۇرىلىسى» اتتى ايتۋلى مونوگرافياسى ورتا ازيا كولەمىندەگى ولەڭ تەورياسىن زەرتتەگەن العاشقى ەڭبەك سانالادى. سونداي-اق ول تەك قانا ولەڭتانۋشى ەمەس, ادەبيەتتىڭ ماڭىزدى ماسەلەلەرىن ءجىتى زەرتتەگەن, جان-جاقتى عالىم بولدى. ول قازاق مەكتەپتەرىنە ارناپ بىرقاتار وقۋلىق تا جازدى.
جيىندا بەلگىلى عالىمدار سەيىت قاسقاباسوۆ, جابايحان ءابدىلدين, مىرزاتاي جولداسبەكوۆ, سەرىك نەگيموۆ جانە ت.ب. ازاماتتار ءسوز الىپ, كورنەكتى اكادەميكتىڭ بىلىمدارلىعى, ازاماتتىعى, قىسقاسى جان-جاقتىلىعى تۋرالى پاراساتتى وي ءوربىتتى.
وقىرمانعا جول تارتقان جيناقتى اتالعان كىتاپحانا قىزمەتكەرى, الەۋمەتتىك عىلىمدار ماگيسترى ءمولدىر بايماحانبەتوۆا قۇراستىرعان.
سونىمەن قاتار شارا بارىسىندا ارداقتى تۇلعانىڭ كىتاپتارى مەن تۇتىنعان زاتتارىنان كورمە ۇيىمداستىرىلدى.
