حالىقتى الەۋمەتتىك تۇرعىدان قورعاۋ – مەملەكەت الدىنداعى نەگىزگى مىندەتتىڭ ءبىرى. بۇل رەتتە, اسىرەسە, الەۋمەتتىك جاعىنان از قامتىلعان ادامدارعا جاردەم كورسەتۋ بويىنشا مەملەكەتتىك باعدارلامالار ىسكە قوسىلعان. وسى ورايدا ەلوردامىز – نۇر-سۇلتان قالاسىندا الەۋمەتتىڭ الەۋەتىن كوتەرۋ باعىتىندا قانداي شارالار جۇزەگە اسىرىلىپ جاتىر, جۇمىسسىزدىق جاعدايى, جاردەماقى تولەۋ, مۇگەدەكتەر مۇددەسىن قورعاۋ بويىنشا قانداي جۇمىستار اتقارىلىپ وتىر؟
جۇمىسسىزدىق. الەۋمەتتىڭ الەۋەتى قاشان وڭالادى؟ جاردەماقىلارعا قينالعان جۇرتتىڭ قولى جەتىپ وتىر ما؟ پاندۋس. ينۆاتاكسي. مۇگەدەكتەردىڭ مۇددەسى قالاي قورعالۋدا؟ قاريالار كومەكتەن قاعىلىپ جاتقان جوق پا؟ وسى جانە وزگە دە وزەكتى ساۋالدارعا نۇر-سۇلتان قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ساۋلە نۇرعوجينا El-Orda YouTube ارناسىندا جاۋاپ بەردى.
جۇمىسپەن قامتۋ ورتالىعى ديرەكتورىنىڭ ورىنباسارى باقتيار ايتپاەۆ بۇگىنگى قىزمەتىنە ورتالىق ارقىلى قول جەتكىزگەنىن ايتقان ەدى. ديرەكتورلىققا جۇمىسپەن قامتۋ ورتالىعى ارقىلى قول جەتكىزۋگە بولا ما؟
– ءيا, شىنىندا دا سولاي, باقتيار ايتپاەۆ ەكى جىل بۇرىن جۇمىسسىز قالىپ, جۇمىسپەن قامتۋ ورتالىعىنا جۇگىنگەن. سودان قوعامدىق جۇمىستارعا تارتىلىپ, بۇگىندە لاۋازىمدى قىزمەتتە ەڭبەكتەنىپ ءجۇر. كەز كەلگەن جۇمىسسىز قالعان ازامات جۇمىسپەن قامتۋ ورتالىعىنا جۇگىنىپ نەمەسە enbek.kz سايتىنان بوس جۇمىس ورىندارىن قاراپ, جۇمىسقا ورنالاسا الادى.
– بۇگىندە قانشا ەلوردالىق جۇمىسسىز ءجۇر جانە قانداي ماماندىقتار سۇرانىسقا يە؟
– ەڭبەك نارىعىندا جاعداي تۇراقتى. قالاداعى جۇمىسسىزدىق دەڭگەيى 4,6 پايىزدى قۇرايدى. ەسەپتە 4,7 مىڭنان استام ادام تۇر, ولاردىڭ 1,7 مىڭى جۇمىسىنان ايىرىلۋ بويىنشا الەۋمەتتىك تولەم الادى, 2,7 مىڭنان استامى جۇمىسپەن قامتۋ شارالارىنا قاتىسادى.
www.enbek.kz پورتالىندا 9821 بوس جۇمىس ورنى تىركەلگەن, ونىڭ ىشىندە: جالاقىسى 100 مىڭ تەڭگەگە دەيىن – 2383 ورىن, 100-دەن 150 مىڭ تەڭگەگە دەيىن – 2587 ورىن, جالاقىسى 150 مىڭ تەڭگەدەن جوعارى 4851 بوس ورىن بار.
سالالار بويىنشا: قۇرىلىس – 2420; كولىك جانە بايلانىس – 1107; ءبىلىم بەرۋ – 883; دەنساۋلىق ساقتاۋ – 813; ساۋدا – 1415; ونەركاسىپ – 499; تۇرۋ جانە تاماقتانۋ بويىنشا قىزمەتتەر – 475 جانە ت. ب.
اكىمدىك جۇمىسسىز ازاماتتاردى ەڭبەك نارىعىنا تارتۋ ءۇشىن ءتۇرلى شارالار قابىلداۋدا, سونىڭ ىشىندە «ەڭبەك» جانە «جۇمىسپەن قامتۋدىڭ جول كارتاسى» مەملەكەتتىك باعدارلامالارى وڭ ناتيجەسىن كورسەتىپ وتىر.
2021 جىلى جۇمىسپەن قامتۋ شارالارىمەن 22300 ادام قامتىلدى. ونىڭ ىشىندە 6663 ادام تۇراقتى جۇمىسقا ورنالاستى, جۇمىسپەن قامتۋدىڭ جول كارتاسى اياسىندا 258 ادام ەكى قولعا ءبىر كۇرەك تاپتى. ەلوردادا اتالمىش باعدارلاما اياسىندا بيىل 14 ينفراقۇرىلىمدىق جوبا جۇزەگە استى.
– ەلوردادا 29 مىڭنان استام مۇگەدەك ازامات تۇرادى. ولارعا قانداي الەۋمەتتىك قولداۋ كورسەتىلەدى؟
– ءيا, قالامىزدا 29727 مۇگەدەك بار. جەكە وڭالتۋ باعدارلاماسىنا سايكەس مۇمكىندىگى شەكتەۋلى تۇلعالار وڭالتۋ قىزمەتتەرىمەن قامتاماسىز ەتىلەدى. بۇگىندە 18818 مۇگەدەكتىگى بار ازامات وڭالتۋ شارالارىنان ءوتتى. 2039-ىنا پروتەزدىك-ورتوپەديالىق كومەك بەرىلدى. مۇگەدەكتەردىڭ سپورتپەن اينالىسۋى ءۇشىن قالامىزدا پاراليمپيادالىق جاتتىعۋ ورتالىعى جانە «تارلان» مۇز ايدىنى جۇمىس ىستەيدى. قازىرگى ۋاقىتتا 5,5 مىڭنان استام مۇگەدەك ەلوردا ەكونوميكاسىنىڭ ءتۇرلى سالالارىندا ەڭبەك ەتۋدە.
– بۇگىندە استانادا مۇمكىندىگى شەكتەۋلى ازاماتتارعا ارنالعان قانشا ينۆاتاكسي كولىكتەرى قىزمەت كورسەتەدى؟ ءسىز بىلەسىز بە, سول تاكسيدىڭ قىزمەتىنە جۇگىنۋ بەرليندەگى رەيحستاگتى العانمەن بىردەي. قالادا ينۆاتاكسي قىزمەتى قالاي جۇمىس ىستەيدى, بارىنە جەتكىلىكتى مە؟
– ينۆاتاكسي قىزمەتى ءجۇرىپ-تۇرۋى قيىن (كرەسلو-اربامەن قوزعالاتىن, كوزى كورمەيتىن) 1-توپتاعى مۇمكىندىگى شەكتەۋلى ادامدارعا, مۇگەدەك بالالارعا كورسەتىلەدى. ەلوردادا 50 ينۆاتاكسي جۇمىس ىستەيدى. قالاداعى اۆتوبۋس پاركتەرىنىڭ جۇرگىزۋشىلەرى ءجۇرىپ-تۇرۋى شەكتەۋلى جولاۋشىلاردى وتىرعىزۋ جانە ءتۇسىرۋ كەزىندە كومەك كورسەتۋگە ارنايى وقىتۋدان وتەدى. مۇگەدەكتىگى بار ادامدار ءۇشىن جول ءجۇرۋ تەگىن.
ەڭبەك نارىعىندا جاعداي تۇراقتى. قالاداعى جۇمىسسىزدىق دەڭگەيى 4,6 پايىزدى قۇرايدى. ەسەپتە 4,7 مىڭنان استام ادام تۇر, ولاردىڭ 1,7 مىڭى جۇمىسىنان ايىرىلۋ بويىنشا الەۋمەتتىك تولەم الادى, 2,7 مىڭنان استامى جۇمىسپەن قامتۋ شارالارىنا قاتىسادى
– قالامىزدا ءالى كۇنگە دەيىن كوپتەگەن نىسانداردا پاندۋس, مۇگەدەك ادامدارعا ارنالعان دارەتحانا جوق. تۇتقالارى جوق پاندۋستار بار. تالاپقا سايكەس پاندۋستىڭ بويلىق ەڭىسى 5 پايىزدان اسپاۋى ءتيىس, تار جەرلەردە 8 پايىز بولۋى مۇمكىن. ءبىز زەرتتەگەن نىسانداردىڭ كوبىندە بۇل كورسەتكىش 12 پايىزدان استام, كەي جەرلەردە 20-40 پايىزعا دەيىن جەتەدى. ناعىز سىرعاناق الاڭى ما دەرسىز…
– قالا اكىمىمەن 2020-2022 جىلدارعا ارنالعان مۇمكىندىگى شەكتەۋلى جاندار ءۇشىن كەدەرگىسىز ورتا ساپاسىنىڭ مونيتورينگىن قامتاماسىز ەتۋ بويىنشا جول كارتاسى بەكىتىلدى. الماتى, سارىارقا, بايقوڭىر, ەسىل اۋداندارى اكىمدەرىنىڭ اپپاراتتارىمەن نىسانداردى پاسپورتتاۋدى جۇرگىزۋ بويىنشا جۇمىس توپتارى قۇرىلدى (مەملەكەتتىك ورگانداردىڭ, قازاقستاندىق مۇگەدەكتەر كونفەدەراتسياسىنىڭ وكىلدەرى, پاراليمپيادالىق سپورت تۇرلەرىنىڭ جاتتىقتىرۋشىلار قۇرامىنىڭ مۇشەلەرى, سونداي-اق Nur Otan پارتياسىنىڭ مۇشەلەرى), ولار تۇراقتى نەگىزدە مونيتورينگ جۇرگىزەدى. 2021 جىلى ەرەكشە قاجەتتىلىكتەرى بار ادامدار ءۇشىن 228 نىسان بەيىمدەلدى, 31-ءى ءىشىنارا قولجەتىمدى (ەسكەرتۋلەردى جويۋ بويىنشا جۇمىستار جۇرگىزىلۋدە).
مۇگەدەكتەردى الەۋمەتتىك قورعاۋ تۋرالى زاڭناما تالاپتارىنىڭ ساقتالۋىنا مەملەكەتتىك باقىلاۋدى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى ەڭبەك جانە الەۋمەتتىك قورعاۋ كوميتەتىنىڭ نۇر-سۇلتان قالاسى بويىنشا دەپارتامەنتى جۇزەگە اسىرادى (كراۆتسوۆ كوشەسى, 18, تەلەفون: 24-83-29, 24-91-08, 24-82-50, 24-82-97).
– استانالىق قارتتاردى قولداۋعا ارنالعان قانداي الەۋمەتتىك كومەك تۇرلەرى بار؟ جۇرت «سوعىس ارداگەرلەرىن تەك جەڭىس كۇنىندە ەسكە الادى» دەيدى. بۇعان نە دەيسىز؟
– ەلوردادا ۇلى وتان سوعىس ارداگەرلەرىنە, ولارعا تەڭەستىرىلگەن تۇلعالارعا ەرەكشە كوڭىل بولىنەدى, بۇگىندە قالادا 21 ۇوس ارداگەرى, 2204 تىل ەڭبەككەرى, 705 سوعىس قيمىلدارىنا قاتىسۋشىلار, 410 ۇوس تەڭەستىرىلگەن تۇلعالار تۇرادى. اۋدان اكىمدىكتەرى, ەرىكتىلەر ۇوس ارداگەرلەرىنە ۇنەمى بارىپ تۇرادى, مەرەكەلىك جانە اتاۋلى كۇندەردە قۇرمەت كورسەتەدى. جەرگىلىكتى بيۋدجەت قاراجاتىنان تەگىن قىزمەت جانە اقشالاي تولەمدەر تۇرىندە الەۋمەتتىك كومەك قاراستىرىلعان. جىل سايىن ۇوس ارداگەرلەرىنە جەڭىس كۇنىنە وراي 1 ملن تەڭگە (67 اەك (195439 تەڭگە), 276 اەك (805092 تەڭگە) مولشەرىندە بىرجولعى تولەم جاسالادى.
– كوممۋنالدىق قىزمەتتەر ءۇشىن اقشالاي وتەماقى (پاتەر الاڭىنا بايلانىستى 23336 تەڭگەگە دەيىن);
– جەڭىلدىكپەن جول ءجۇرۋ, تەگىن ءدارى-دارمەكپەن قامتاماسىز ەتۋ, ءتىس پروتەزدەۋ, ساناتسيا, ساناتورلىق-كۋرورتتىق ەمدەۋ قىزمەتتەرى;
– قوسىمشا قىزمەتتەر ءۇشىن (مەرزىمدى باسىلىمدارعا جازىلۋ, مونشالارعا, شاشتارازدارعا جىلىنا ءبىر رەت بارۋ) 18960,5 تەڭگە بەرىلەدى.
