ومىرزاق وزعانباەۆ, «رەسپۋبليكالىق ارداگەرلەر ۇيىمى» ورتالىق كەڭەسى توراعاسىنىڭ ءبىرىنشى ورىنباسارى, تاريح عىلىمدارىنىڭ دوكتورى:
– مەملەكەت باسشىسىنىڭ جولداۋى ەلىمىزدىڭ الەۋمەتتىك-ەكونوميكالىق جاعدايعا جان-جاقتى زەرتتەلىپ, سارالانىپ, تەرەڭ تالداۋ جاسالىپ, ونى جۇزەگە اسىرۋ ماقساتىندا ناقتى مىندەتتەر بەلگىلەنگەن تاريحي ماڭىزى بار قۇجات دەسە بولادى. سونىمەن قاتار حالىقتى تولعاندىرعان ەڭ كەلەلى دەگەن پروبلەمالار دا نازاردان تىس قالعان جوق. اسىرەسە, «پەداگوگتاردىڭ مارتەبەسى تۋرالى» جاڭا زاڭ قابىلداۋدى تاپسىرۋى كوڭىلگە قونىمدى. ۇستازدار قاۋىمىنىڭ يىعىنا تۇسكەن اۋىرتپالىقتى ازايتۋ ءۇشىن ءۇش اۋىسىمدى ءبىلىم بەرۋ ماسەلەسىن شەشۋ جونىندەگى تاپسىرماسى دەر كەزىندە كوتەرىلگەن شەشىم دەۋگە تۇرارلىق. سونىمەن قاتار ۇستازداردىڭ ماردىمسىز جالاقىسىن كەلەر جىلدان باستاپ 25 پايىزعا كوتەرگەنى جاقسىلىقتىڭ نىشانى دەپ ەسەپتەيمىن. جانە دە قازاقستاندىقتاردىڭ دەنساۋلىقتارىن نىعايتىپ, كۇردەلى جاعدايعا تاپ بولعان ازاماتتاردى ءتيىمدى ەمدەي ءبىلىپ, ولاردى ولىمنەن اراشالاي الۋىمىز قاجەتتىگىن ەرەكشە ەكپىن تۇسىرە كەلە, كۇردەلى ىندەتتەردى ەمدەۋگە جاڭا جول تابا بىلگەن ۋچاسكەلىك مەديتسينا ماماندارىنىڭ ايلىق جالاقىلارىن 20 پايىزعا كوتەرۋدى مىندەتتەگەنى دە قۇپتارلىق جايت.
جولداۋدىڭ تاعى ءبىر كوڭىلگە قونىمدى تۇسى – كاسىپكەرلىك ورتاعا دا قامقورلىق تانىتىپ, بيزنەسكە اكىمشىلىك ىقپال ەتۋدى دوعارۋدى ءبىرىنشى كەزەكتە قولعا الىنۋى ءتيىس شارا ەكەندىگىن ايتتى. بيزنەستىڭ جول كارتاسىنىڭ مەرزىمى 2025 جىلعا دەيىن ۇزارتىلادى. شاعىن جانە ورتا بيزنەسكە سالىق امنيستياسى ەنگىزىلدى, تىكەلەي ينۆەستيتسيالار قورى قۇرىلماق. ەندىگى كەزەكتە شاعىن جانە ورتا بيزنەس وكىلدەرىنە 3 جىل بويى سالىق سالىنبايتىن بولدى. بۇل دا ەلىمىزدىڭ وركەندەۋى, الەۋمەتتىك جاعدايدىڭ جاقسارۋى جولىندا جاسالعان يگى قادامداردىڭ ءبىرى. سونداي-اق جەرىمىزدىڭ شەتەلدىكتەرگە ساتىلمايتىندىعىنا ناقتى نۇكتە قويىلدى. قورىتا ايتقاندا, پرەزيدەنت حالىقتىڭ تىنىس-تىرشىلىگىنەن جان-جاقتى حاباردار ەكەندىگىن سەنىمدى تۇردە دالەلدەپ بەردى.
