استانا قالالىق قوعامدىق كەڭەسىنىڭ وتىرىسىندا الەۋمەتتىك كومەك كورسەتۋ ەرەجەلەرى مەن ونىڭ كولەمىن بەلگىلەۋ, ازاماتتاردىڭ جەكەلەگەن ساناتتارىن انىقتاۋ, سونداي-اق, جەڭىل رەلسپەن جۇرەتىن قالالىق كولىك جولاۋشىلارىن تاسىمالداۋ جانە وسى تاسىمالداۋدى سۋبسيديالاۋ ەرەجەلەرىن بەكىتۋ ماسەلەلەرى قارالدى.
كۇن تارتىبىندەگى العاشقى ماسەلە بويىنشا استانا قالاسىنىڭ جۇمىسپەن قامتۋ, ەڭبەك جانە الەۋمەتتىك قورعاۋ باسقارماسى باسشىسىنىڭ ورىنباسارى ساۋلە نۇرعوجينا بايانداما جاسادى.
ونىڭ ايتۋىنشا, ازاماتتاردىڭ جەكەلەگەن ساناتتارىنا الەۋمەتتىك كومەك كورسەتۋ ەرەجەلەرى العاش مارتە وسىدان ون جىل بۇرىن بەكىتىلدى. سودان بەرى بۇل ەرەجەلەرگە بىرقاتار وزگەرىستەر ەنگىزىلدى. قازىر بۇل جاڭا رەداكتسيانى قاجەت ەتىپ تۇر. اتاپ ايتساق, بەسىنشى تاراۋدا الۋشىنىڭ ساناتتارى بويىنشا ەمەس, الەۋمەتتىك كومەك تۇرلەرى بويىنشا انىقتاۋ جۇمىستارىن جۇرگىزۋ قاجەت. سونداي-اق, الەۋمەتتىك كومەك تارتىبىنە دە وزگەرىستەر ەنگىزىلمەك. ماسەلەن, قالالىق قىلمىستىق اتقارۋ جۇيەسى دەپارتامەنتى بۇل ساناتقا باس بوستاندىعىنان ايىرۋ ورىندارىنان شىعىپ, پروباتسيا قىزمەتىنىڭ ەسەبىندە تۇرعان ادامداردى قوسۋدى ۇسىندى. ولارعا جىلىنا ءبىر رەت قاجەت ءدارى-دارمەك الۋعا, مەديتسينالىق تاعايىنداۋدى وزگەرتۋگە, مەديتسينالىق قىزمەتتى پايدالانۋعا 13 اەك كولەمىنەن اسپايتىن قارجىلاي كومەك بەرۋ ۇسىنىلىپ وتىر.
مۇنىمەن قاتار ادام ورتتەن زارداپ شەگىپ, بۇل جاعدايدا باسپانا جالعىز بولعاندا عانا الەۋمەتتىك كومەك كورسەتىلەدى دەپ بەلگىلەندى. سونىمەن بىرگە وزدىگىنەن ءجۇرىپ-تۇرا المايتىن قاريالاردى ساناتورلىق-كۋرورتتىق ەمگە اپاراتىن 18 جاستان اسقان ادامدارعا تەگىن جولداما بەرۋ دە كومەكتىڭ قاتارىنا ەنگىزىلمەك.
استانا قالالىق تەكسەرۋ كوميسسياسى دا تەكسەرىستىڭ قورىتىندىسىندا بىرقاتار ۇسىنىستاردى ەنگىزدى. وسىعان سايكەس بيۋروكراتيالىق كەدەرگىلەردى ازايتۋ ءۇشىن ۇلى وتان سوعىسى ارداگەرلەرى مەن مۇگەدەكتەرىنە ءدارى-دارمەك الۋعا جولداما بەرۋ ءتارتىبى دە وزگەرتىلمەك. بۇدان كەيىن ولار دارىگەرلەردىڭ ۇسىنىسىمەن ءدارىنى ءدارىحانالاردان تىكەلەي الا الاتىن بولادى. قالالىق دەنساۋلىق ساقتاۋ باسقارماسى ازاماتتاردىڭ تالاپ-تىلەكتەرىن ەسكەرىپ, الەۋمەتتىك كومەككە جاتقىزىلاتىن ءدارى-دارمەك ءتىزىمىن قايتا قارادى.
مۇنىمەن قاتار وقۋعا بولىنەتىن الەۋمەتتىك كومەكتىڭ ءتارتىبى دە وزگەردى. ەندى قارجى جوعارى وقۋ ورنىنىڭ ەسەپشوتىنا ەمەس, ستۋدەنتتىڭ ەسەپشوتىنا اۋدارىلاتىن بولادى.
ال جەڭىل رەلسپەن جۇرەتىن قالالىق كولىكپەن جولاۋشىلاردى تاسىمالداۋ قىزمەتىنە بايلانىسسىز كارتالاردى رەسىمدەۋ, ولاردى پايدالانۋ جانە باقىلاۋ ەرەجەلەرىن ايقىنداۋ, قىزمەتتى پايدالاناتىن جولاۋشىلاردىڭ, سونىڭ ىشىندە جەڭىلدىكپەن جول ءجۇرۋ قۇقىعى بار ازاماتتاردىڭ قۇقىقتارى, مىندەتتەرى مەن جاۋاپكەرشىلىگى رەتتەۋ جوسپارلانعان. سوعان سايكەس ونى سۋبسيديالاۋ ەرەجەسى دە ايقىندالماق.
امانعالي قالجانوۆ
