نۇر-سۇلتان قالاسى اكىمىنىڭ ورىنباسارى ەرلان بەكمىرزاەۆتىڭ قاتىسۋىمەن وتكەن قالالىق ءماسليحاتتىڭ كەزەكتەن تىس سەسسياسىندا جەڭىس كۇنىنە وراي ۇلى وتان سوعىسىنىڭ ارداگەرلەرىنە بەرىلەتىن قوسىمشا الەۋمەتتىك كومەك كولەمى جانە مۇقتاج ازاماتتارعا گازداندىرۋ شىعىندارىنىڭ وتەماقىسىن كوتەرۋ ۇسىنىسى بەكىتىلدى. ءماسليحات حاتشىسى ەرلان كاناليموۆتىڭ توراعالىعىمەن وتكەن جيىندا مەملەكەت مۇقتاجدىعى ءۇشىن جەر تەلىمدەرىن يەلىكتەن شىعارۋ شارتتارى كەلىسىلدى. قالا اكىمدىگىنىڭ دەربەس قۇرامى بەكىتىلىپ, بىرقاتار كوميسسيا قۇرامدارىنا وزگەرىستەر ەنگىزىلدى.
الدىمەن بايانداما جاساعان قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ساۋلە نۇرعوجينا وسى جىلى جەڭىس كۇنىنە وراي ۇلى وتان سوعىسىنىڭ 18 ارداگەرىنىڭ ارقايسىسىنا 1 ملن 5 مىڭ 221 تەڭگەدەن قوسىمشا كومەك بەرۋ جوسپارلانىپ وتىرعانىن جەتكىزدى. قولدانىستاعى ەرەجەلەرگە سايكەس, 67 اەك نەمەسە 205 مىڭ تەڭگەگە قوسىمشا 800 مىڭ تەڭگە تولەنەدى.
بايانداماشىنىڭ ايتۋىنشا, گازداندىرۋعا بەرىلەتىن الەۋمەتتىك كومەك 90 اەك-تەن 130 اەك-كە كوتەرىلدى. بۇل 398190 تەڭگەنى قۇراپ وتىر.
تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى ءانۋار سايپوۆ جەتى نىساندى سالۋ ءۇشىن جالپى سوماسى 611 ملن تەڭگەنى قۇرايتىن 44 جەر تەلىمىن مەملەكەت مۇقتاجدىعى ءۇشىن ساتىپ الۋ جوباسىمەن تانىستىردى. بۇل ورىنداردا بىرقاتار قۇرىلىس جۇمىستارى جۇرگىزىلەدى. اتاپ ايتقاندا, ك.كۇمىسبەكوۆ جانە ش.قوسشىعۇلۇلى كوشەلەرىنىڭ قيىلىسىندا پاركينگى بار كوپپاتەرلى تۇرعىن ءۇي كەشەنى بوي كوتەرەدى. ا.يمانوۆ پەن ەگەمەن قازاقستان كوشەلەرى اۋدانىندا ورتا مەكتەپ, №38 كوشەدەن باستاپ ابىلاي حان داڭعىلىنا دەيىنگى ارالىقتا حۋسەين بەن تالال كوشەسى سالىنادى. قابانباي باتىر داڭعىلى مەن حۋسەين بەن تالال كوشەسى قيىلىسىندا اكىمشىلىك عيمارات قۇرىلىسى جۇرگىزىلەدى. بوگەنباي باتىر داڭعىلىنان ش.بەيسەكوۆا كوشەسىنە دەيىن سارىارقا داڭعىلى, ا.بايتۇرسىنۇلى جانە ج.ناجىمەدەنوۆ كوشەلەرى اۋدانىنداعى ا50 جانە ا51 كوشەلەرى, شارل دە گولل جانە ا.توقپانوۆ كوشەلەرىنىڭ قيىلىسى اۋدانىنداعى كوشەلەر سالىنادى.
– بارلىق جەر تەلىمدەرىنىڭ يەلەرى ۇسىنىلعان وتەماقى سوماسىمەن تانىستىرىلدى, – دەدى ءا.سايپوۆ.
