الەۋمەتتىك كومەك قالاي كورسەتىلەدى؟
استانا قالالىق ءماسليحاتىنىڭ ءبىر توپ دەپۋتاتى ەلورداداعى قوس بىردەي الەۋمەتتىك قىزمەت كورسەتۋ ورتالىعىندا بولدى. ءماسليحات دەپۋتاتتارى ورتالىقتىڭ تىنىس-تىرشىلىگىمەن تانىسىپ, سۇراقتارىنا جاۋاپ الدى. ورتالىق باسشىلارى وزدەرى اتقارىپ وتىرعان شارۋالاردى بايانداپ, تۇيتكىلدى ماسەلەلەرىن ايتتى. ال ءماسليحات دەپۋتاتتارى بولسا, مۇمكىندىگى شەكتەۋلى ازاماتتارعا جاردەم بەرىپ وتىرعان ورتالىققا قولداۋ بىلدىرەتىنىن جەتكىزدى.
اۋەلى ءماسليحات دەپۋتاتتارى قالا اكىمدىگىنىڭ «الەۋمەتتىك قىزمەت كورسەتۋ ورتالىعىندا» بولىپ, ونىڭ تىنىس-تىرشىلىگىمەن تانىستى. ورتالىق ديرەكتورى رىستى بايماعانبەتوۆانىڭ ايتۋىنشا, مەكەمەدە 155-كە جۋىق قىزمەتكەر جۇمىس ىستەيدى. ولار بالالاردان باستاپ قارتتارعا دەيىن ءارتۇرلى قىزمەت تۇرلەرىن كورسەتەدى. اتالعان ورتالىق اشىلعان كەزدە مۇندا 598 ازامات الەۋمەتتىك كومەك السا, قازىر ونىڭ سانى 640-قا جەتكەن.
– ءبىز بۇعان دەيىن قالامىزداعى ەسىل مەن سارىارقا جانە الماتى اۋداندارىنىڭ تۇرعىندارىنا الەۋمەتتىك كومەكتى ۇيىنە بارىپ كورسەتەتىن ەدىك. الايدا ءبىزدىڭ ورتالىق وتكەن جىلدىڭ 1 ساۋىرىنەن باستاپ ارنايى عيمارات جالداپ, الەۋمەتتىك قىزمەت كورسەتۋدى قولعا الدى. ءبىز ءبىرىنشى جانە ەكىنشى توپتاعى مۇمكىندىگى شەكتەۋلى بالالاردان باستاپ جالعىز قالعان قارتتارعا دەيىن كومەك كورسەتەمىز. قازىرگى تاڭدا ورتالىقتا 320 قارت پەن 320 بالالار تىركەلگەن, ولارعا ءبىزدىڭ قىزمەتكەرلەر ۇيىنە بارىپ جانە وسى ورتالىقتا قىزمەت كورسەتەدى, – دەيدى رىستى بايماعانبەتوۆا.
التى بالا جۇرە باستادى
«الەۋمەتتىك قىزمەت كورسەتۋ ورتالىعىنا» كەلەتىن بالالار 10 كۇننەن باستاپ 20 كۇنگە دەيىن بولىپ, كومەك الادى. سەبەبى, ءتيىستى ماماندار اتا-انالارعا بالالارعا قالاي قاراۋ كەرەك ەكەنىن جان-جاقتى كورسەتەدى. جالپى, ءار مامان بالالارمەن 40 مينۋتتاي جۇمىس جاسايدى.
– ماسەلەن, مەديتسينالىق تەكسەرۋدەن وتكەن بالانى مەدبيكە قابىلداپ العاننان كەيىن ونى لوگوپەد, دەفەكتولوگ, پسيحولوگ, ەڭبەك تەراپياسى, مۋزىكا, ماسساجيست سىندى ءارتۇرلى ماماندار قارايتىن بولادى. وسى كومەكتى 20 كۇن العاننان كەيىن اتالعان قىزمەتتى الەۋمەتتىك قىزمەتكەر ۇيدە جالعاستىرا بەرەدى. وسى ەڭبەگىمىزدىڭ ارقاسىندا 6 بالا اياقتان تۇرىپ, جۇرە باستادى. بۇل, ارينە, ورتالىقتاعى بىلىكتى مامانداردىڭ جانكەشتى ەڭبەگىنىڭ ارقاسىندا مۇمكىن بولىپ وتىر, – دەيدى ول.
ءيا, ادامدارعا الەۋمەتتىك كورسەتەتىن ورتالىقتىڭ جۇمىسى كوڭىل قۋانتادى. سوندىقتان دا وسى ورتالىققا كەلىپ, الەۋمەتتىك كومەك العىسى كەلەتىن ازاماتتار بارشىلىق. وسىنى ەسكەرگەن ورتالىق باسشىلارى 2 بولىمشە اشۋدى جوسپارلاپ وتىرعانىن ايتادى. ونىڭ ءبىرىنشىسى جاسوسپىرىم بالالارعا ارنالسا, ال ەكىنشىسى قارتتارعا قىزمەت كورسەتەدى.
قارتتارعا دا قارايلاسادى
ورتالىقتا بالالار عانا ەمەس, سونىمەن قاتار قارتتارعا دا قارايلاسۋ جولعا قويىلعان. ماسەلەن, بۇگىندە ورتالىقتىڭ قىزمەتكەرلەرى 320 قارتقا ءارتۇرلى كومەك كورسەتىپ, باتاسىن الىپ وتىر.
– ءبىزدىڭ قىزمەتكەرلەر قارتتاردىڭ ءۇيىن جيناستىرىپ بەرۋدەن باستاپ, ولارعا ازىق-تۇلىك پەن ءدارى-دارمەك اكەلىپ بەرىپ كومەكتەسەدى. سونداي-اق, ءبىزدىڭ ماماندار حالىققا قىزمەت كورسەتۋ ورتالىعىنا بارىپ, قارتتاردىڭ قۇجاتتارىن رەتتەستىرىپ, ءتىپتى, اۋرۋحاناعا بارىپ-كەلۋگە جاردەمدەسەدى. بۇدان بولەك ورتالىق بالالار مەن قارتتاردى قالامىزداعى مادەني وشاقتارعا اپارىپ, دەمالۋعا ايرىقشا ءمان بەرىپ وتىر. ناقتىراق ايتسام, بالالاردى استانالىق تسيرك پەن «مەگا» ساۋدا ويىن-ساۋىق ورتالىعىنا اپارىپ, كوڭىلىن كوتەردىك. ال ەگدە تارتقان قاريالاردى ۇلتتىق مۇراجاي مەن ءارتۇرلى كورمەلەرگە اپارىپ تۇرامىز, – دەيدى ورتالىق ديرەكتورى.
قازاق «قارتى بار ءۇيدىڭ قازىناسى بار» دەپ تەكتەن تەك ايتپاعان. وسى ءبىر قاناتتى سوزگە قاپەرگە العان ورتالىق ماماندارى قارتتارعا قارايلاسۋدى پارىز سانايدى. ايتسە دە, ورتالىق عيماراتىنىڭ تار بولۋى ولاردىڭ جۇمىسىنا كەدەرگى كەلتىرىپ وتىر ەكەن. بۇل ولقىلىقتى ءماسليحات دەپۋتاتتارى ءوز كوزدەرىمەن كورىپ, الداعى ۋاقىتتا شەشەتىنىن ايتتى.
«نۇرلى جۇرەكتىڭ» جۇگى جەڭىل ەمەس
بۇدان كەيىن ءماسليحات دەپۋتاتتارى استانا قالاسى اكىمدىگىنىڭ «نۇرلى جۇرەك» الەۋمەتتىك قىزمەت كورسەتۋ ورتالىعىندا» بولدى. ورتالىق ديرەكتورىنىڭ الەۋمەتتىك جۇمىس جونىندەگى ورىنباسارى قۇرالاي قوجامقۇلوۆانىڭ ايتۋىنشا, مۇندا 234 استام مۇگەدەك بالا ءتاربيەلەنەدى. سونداي-اق, ول بالا سانىنىڭ ۇلعايۋىنا بايلانىستى وتكەن جىلدىڭ قازان ايىندا كۇندىزگى ءبولىم جاڭا عيماراتقا كوشىرىلگەنىن ايتادى.
– 1981 جىلى تسەلينوگراد وبلىستىق اتقارۋ كوميتەتىنىڭ شەشىمىمەن مۇمكىندىگى شەكتەۋلى بالالارعا ارنالعان بالالار ءۇيى – ينتەرنات اشىلدى. ال 2005 جىلى بالالار ءۇيى استانا قالاسىنىڭ «بالالار پسيحونەۆرولوگيالىق, مەديتسينالىق, الەۋمەتتىك مەكەمەسى بولىپ اتاۋى وزگەرتىلدى. سونداي-اق, 2016 جىلى استانا قالاسى اكىمدىگىنىڭ «نۇرلى جۇرەك» الەۋمەتتىك قىزمەت كورسەتۋ ورتالىعى» كمم دەپ قايتا قۇرىلدى. جالپى اتاۋى بىرنەشە رەت وزگەرسە دە, ءبىزدىڭ ورتالىق بالالارعا الەۋمەتتىك كومەك كورسەتۋدى نازاردان تىس قالدىرعان ەمەس, – دەيدى قۇرالاي ەدىلبەكقىزى.
ماسەلەن, بۇگىندە ورتالىق ارنايى الەۋمەتتىك كومەكتىڭ 8 ءتۇرىن تولىق كورسەتەدى. اتاپ ايتار بولساق, ورتالىق ارنايى الەۋمەتتىك كومەكتىڭ مەديتسينالىق, پسيحولوگيالىق, پەداگوگيكالىق جانە تۇرمىستىق ءتۇرىن كورسەتەدى. سونداي-اق, «نۇرلى جۇرەك» الەۋمەتتىك ەكونوميكالىق كومەكتەن باستاپ مادەني, قۇقىقتىق جانە ەڭبەكتىك قىزمەت كورسەتۋدى ءوز مىندەتىنە جۇكتەپ العان. ورتالىقتىڭ تاعى ءبىر ەرەكشەلىگى مۇندا بالالار عانا ەمەس, سونىمەن قاتار 18 جاستان اسقان ازاماتتار دا الەۋمەتتىك كومەك الادى. بۇدان بولەك اتالعان مەكەمە مادەني شارالاردى ۇيىمداستىرۋعا ايرىقشا نازار اۋدارىپ وتىر.
سەرىك قۇدايبەرگەنۇلى