كەشە جۇمىسپەن قامتۋ ورتالىعىندا «قازاقستاندا ىسكە اسىرىلاتىن ۇزدىك الەۋمەتتىك جوبالار كورمەسى» رەسپۋبليكالىق كونكۋرسىنا قاتىسۋ ءۇشىن تۇسكەن وتىنىمدەر قارالدى.
قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ شەشىمى بويىنشا جاريالانعان كونكۋرستىڭ ايماقتىق ىرىكتەۋىنە قاتىسۋ ءۇشىن حالىقتى الەۋمەتتىك قورعاۋ جۇيەسى شەڭبەرىندە قىزمەت اتقارىپ جۇرگەن قوعامدىق بىرلەستىكتەر, مۇگەدەكتەر قۇقىعىن قورعايتىن جەكە تۇلعالار جانە ۇكىمەتتىك ەمەس ۇيىمداردان 14 جوبا كەلىپ تۇسكەن.
جوبالاردى سارالاعان كوميسسيا وتىرىسىنىڭ ناتيجەسىندە 1 ورىندى «قازاقستان تاڭداۋى – بەلسەندى ءومىر» جوباسى مەن «قولمەن جاسالعان سۇلۋلىق» جوباسى يەلەندى. ەكىنشى ورىن «جان مەيىرى» جۋرنالى» مەن «مۇمكىندىگى شەكتەۋلى جانداردى جۇمىسقا ورنالاستىرۋ مودەلىن جاساۋ» ىزدەنىستەرىنە بۇيىردى. ال, ءۇشىنشى ورىندى «سالاۋاتتى قازاقستان» مەن «كومەككە دايىنمىن!» جوبالارى ءبولىستى.
