«نامازدا وقىلاتىن سۇرەلەر مەن ايتىلاتىن دۇعالاردى جاتتاۋ قيىن» دەيتىن مۇسىلمان باۋىرلامىز از ەمەس-ءتىن. ەندى بۇل «سىلتاۋدىڭ» جاۋابى دايىن. الماتىلىق الحانباي ساتىبالدىۇلى ەلەكتروندى جايناماز ويلاپ تاپتى. ونەرتاپقىش استاناعا كەلگەن ساپارىندا از-كەم تىلدەسكەن ەدىك. جاڭا جايناماز تۋرالى ەگجەي-تەگجەيلى اڭگىمەلەپ بەردى.
– الحانباي ساتىبالدىۇلى, الدىمەن ءوزىڭىز ويلاپ تاپقان ەلەكتروندى جاينامازدىڭ ارتىقشىلىقتارى جونىندە ايتىپ وتسەڭىز…
– ەڭ باستى ايتارىم, ادەتتەگى جاينامازداردىڭ ۇزىندىعى كوبىنەسە 110 سانتيمەتر بولادى. ال مەنىڭ جاينامازىم 140 سانتيمەترگە لايىقتالعان. بۇل جايناماز ارقىلى نامازدىڭ ۇركىندەرىن شاريعاتقا ساي تولىمدى ورىنداۋعا بولادى. ياعني, نامازحان ساجدەگە جىعىلىپ, رۋكۋعقا تۇرعانداعى بارلىق قيمىلىن قالىپتاسقان ۇلگىگە ساي جاساي الادى. ارناۋلى قۇرىلعى ورناتىلعان جاينامازدىڭ كومەگىمەن جاڭادان ناماز وقي باستاعان مۇسىلماندار دا ناماز تالاپتارىن مۇقيات ورىنداپ ۇيرەنەدى.
ءبىز ناماز وقىپ اللا تاعالادان شەكسىز ساۋاپ الامىز, سوعان ساي نامازدىڭ ءتارتىبىن دە تولىق, دۇرىس ورىنداي الساق, تەڭدەسسىز ساۋاپقا قول جەتكىزەمىز. ناماز وقىعاندا قۇران سۇرەلەرىن دۇرىس وقۋ قانشالىقتى ماڭىزدى بولسا, نامازدىڭ ۇركىندەرىن دە دۇرىس ورىنداۋ سونداي ماڭىزدى. تاعى ءبىر ەسكەرەرلىگى, ەلەكتروندى جايناماز ءارتۇرلى بوياۋدا, قازاقى ناقىشپەن بەزەندىرىلگەن.
– بۇل جاڭالىعىڭىز تەك قازاقستاندىقتارعا عانا ارنالعان با, الدە؟..
– قۇران ءتىلى بارلىق مۇسىلمانعا ورتاق. بۇل جاينامازدىڭ دا دۇنيەجەۇزىندەگى ءوزىن مۇسىلمانمىن دەپ ەسەپتەيتىن كەز كەلگەن ادامعا قاجەت ەكەندىگى ءسوزسىز. وسى ورايدا, مۇمكىندىگىنشە الەم مۇسىلماندارىنىڭ نازارىنا ىلىگىپ, ۇلتتىق ۇلگىدە تىگىلگەن جايناماز شارتاراپتى شارلاسا, نۇر ۇستىنە نۇر بولار ەدى.
– ادەپكىدە ونەرتاپقىشتاردىڭ دەنى فيزيكا, ماتەماتيكا سالالارىنىڭ مامانى بولىپ كەلەدى. ال ءسىزدىڭ ماماندىعىڭىز قانداي؟
– قۇران سوزدەرى, نامازداعى اياتتار, بارلىعى اراب تىلىندە ەكەنىن, ادامزاتقا ورتاق ەكەنىن ايتتىق. بىراق, ءبىز اراب ەمەسپىز عوي, سوندىقتان ونى جاتتاۋ ارامىزداعى جاسى ەگدە كىسىلەر ءۇشىن قيىنعا سوعادى. مۇنى ءوزىم مەشىتتە كوپ بولاتىندىقتان, زامانداستارىمنان ءجيى ەستيمىن. وسىدان كەيىن قۇران, ناماز سوزدەرىن, دۇعالارىن ۇيرەنۋدىڭ وڭاي جولىن ىزدەستىرە باستادىم.
نەگىزگى ماماندىعىم سپورت سالاسىنا جاقىن. الايدا, قازىر عىلىمي تەحنيكانىڭ قارىشتاپ دامىعان زامانى. ناقتى يدەياڭىز بولسا, ونى جۇزەگە اسىرۋدىڭ ءتۇرلى جولدارىن تابۋعا بولادى. ماسەلەن, كولىككە قاجەتتى ءبىر بولشەكتى جاساتۋ ءۇشىن توكورعا بارامىز عوي. بۇل دا سول سياقتى, ينتەرنەت ارقىلى جولدارىن ىزدەستىرىپ, ويىمداعى ءىستى جۇزەگە اسىردىم.
– جاڭا جاينامازدىڭ باعاسى قانشا جانە نارىققا قانشاسىن شىعاردىڭىزدار؟
– بۇگىندە ەلەكتروندى جاينامازدىڭ ون ءۇش مىڭنان اسا داناسىن ساۋداعا قويدىق. باعاسى دا قولجەتىمدى, 4500 تەڭگە. ون دانادان ارتىق العان نامازحاندارعا 4000 تەڭگەگە جەڭىلدىكپەن ساتىپ وتىرمىز.
– اڭگىمەڭىزگە راحمەت! اللا جاڭالىعىڭىزدىڭ يگىلىگىن كورۋگە جازسىن!
سۇحباتتى جۇرگىزگەن
اسان ىستى
