قازاقستاندا شەتەل تاجىريبەسى نەگىزىندە اليمەنت تولەۋ قورى قۇرىلۋى مۇمكىن. بۇل ماسەلە الداعى ۋاقىتتا پارلامەنتتە قارالادى.
بۇگىندە اليمەنتتى سوت ارقىلى ءوندىرىپ الۋدىڭ جولدارى قانداي؟ بۇل تۋرالى الماتى اۋداندىق سوتىنىڭ سۋدياسى مايا قاسىموۆانىڭ كەڭەسىن ۇسىنامىز.
اليمەنت الۋدىڭ ەڭ تەز جولى – اليمەنتتى ءوندىرىپ الۋ تۋرالى سوت اكتىسى
ول ءۇشىن سوت ۇكىمىن شىعارۋ تۋرالى وتىنىشپەن سوتقا جۇگىنۋ كەرەك.
1. سوتقا جۇگىنگەن كۇننەن باستاپ ءۇش كۇن ىشىندە (بورىشكەر مەن تالاپ قويۋشىنى شاقىرۋسىز) ۇكىم شىعادى.
2. سوت ونى سوت ورىنداۋشىلارىنىڭ جەرگىلىكتى پالاتاسىنا تەز ارادا ورىنداۋعا جىبەرەدى.
3. اليمەنت سوت ۇكىمىن شىعارۋ تۋرالى ءوتىنىش بەرگەن كۇننەن باستاپ ءوندىرىلىپ الىنادى.
مىنا جاعدايلاردا اليمەنت ءوندىرىپ الۋ تۋرالى سوت ۇكىمى شىعارىلمايدى:
- اكەلىكتى انىقتاۋعا قاجەتتىلىك بار جاعدايدا;
- تالاپ قويۋشى تۇلعا سوت ۇكىمىن شىعارۋ تۋرالى وتىنىشپەن جۇگىنگەنگە دەيىنگى ۋاقىت بويىنشا اليمەنت تالاپ ەتسە;
- تالاپ قويۋشى تۇلعا اليمەنتتى تۇراقتى اقشالاي سومادا ءوندىرىپ الۋدى تالاپ ەتسە.
ءوتىنىشتى تالاپ قويۋشىنىڭ نەمەسە بورىشكەردىڭ تۇرعىلىقتى مەكەنجايى بويىنشا سوتقا بەرۋ كەرەك, مۇنى ءوتىنىش يەسى ءوزى شەشەدى. وتىنىشتە تالاپ قويۋشىنىڭ تۋعان كۇنى, جسن-ءى, بورىشكەردىڭ تۋعان كۇنى مەن جسن-ءى بولۋى كەرەك.
وتىنىشكە قوسا:
- جەكە كۋالىك (تۇپنۇسقاسى جانە كوشىرمەسى);
- بالانىڭ تۋ تۋرالى كۋالىگى;
- نەكە تۋرالى كۋالىك;
- نەكەنى بۇزۋ تۋرالى كۋالىك نەمەسە اكەلىكتى انىقتاۋ تۋرالى كۋالىك (جاعدايعا بايلانىستى);
- تالاپ قويۋشى تۇلعا مەن بالانىڭ مەكەنجاي انىقتاماسىن تىركەۋ قاجەت.
اليمەنتتى ءوندىرىپ الۋ تۋرالى تالاپ بويىنشا مەملەكەتتىك باج سالىعى سالىنبايدى.
بورىشكەرگە تالاپ ارىز بويىنشا قارسىلىق ءۇشىن ون كۇن بەرىلەدى. ەگەر ول سوتقا ءوز قارسىلىعىن جولداپ, سوت ۇكىمنىڭ كۇشىن جويسا, سوتقا تالاپ ارىز بەرۋ كەرەك. سوت ءوتىنىشتى سوت وتىرىسىندا قارايدى. ەگەر تالاپتى قاناعاتتاندىرسا, اليمەنت سوت ۇكىمى نەگىزىندە كورسەتىلگەن ۋاقىتتان باستاپ ءوندىرىلىپ الىنادى.
تالاپ ارىزدى جوعارعى سوتتىڭ رەسمي سايتىنداعى سوت كابينەتى ارقىلى ونلاين بەرۋگە بولادى: http://office.sud.kz
