مارات قاليەۆ, گازەت وقىرمانى:
– بۋرابايداعى ءداستۇرلى قايىرىمدىلىق شاراسىنا قالاي قاتىسۋعا بولادى؟ بۇل جولى ۆەلوجارىس قاي كۇنى وتكىزىلمەك؟ ءوز ۇلەسىمدى قوسايىن دەپ ەدىم.
وقىرمان سۇراعىنا بولات وتەمۇراتوۆ قورىنىڭ كوممۋنيكاتسيالار جونىندەگى مەنەدجەرى ەليزاۆەتا دەمينا جاۋاپ بەردى:
– بيىلعى Burabike 2018 ۆەلوجارىسى 30 تامىز كۇنى ششۋچينسك – بۋراباي كۋرورت ايماعىنداعى Rixos Borovoe قوناقۇيى ماڭىندا وتەدى. شارا 9:00-دەن 16:00-گە دەيىن ۇيىمداستىرىلادى.
قايىرىمدىلىق شاراسىنا قاتىسۋ ءۇشىن burabike.kz سايتىنا تىركەلىپ, 5000 تەڭگە كولەمىندە جارنا تولەۋ قاجەت. ۆەلوسيپەدتى Rixos Borovoe قوناقۇيىنەن الۋعا بولادى. ال ەگەر ءوز ۆەلوسيپەدىڭىز بولسا, ۇيىمداستىرۋشىلار سىزگە ارنايى جۇك تاسىمالداۋشى كولىگىن ۇسىنادى. سونداي-اق, قاتىسۋشىلارعا تاڭعى جانە تۇسكى تەگىن اس تا دايىن. Burabike جارىسىنا قاتىسۋشىلار مەن قوناقتاردىڭ بارلىعىنا استانادان ششۋچينسكىگە بارىپ كەلۋىنە ترانسفەر بەرىلەدى. استانادا ادامدار ەلوردالىق تسيركتىڭ الدىندا ساعات 6:00-دەن 6:45-كە دەيىن جينالادى.
جارىستان كەيىن قاتىسۋشىلار مەن قوناقتاردى Rixos-تىڭ اتىنان ۇلكەن پيكنيك پەن قازاقستاندىق ەسترادا جۇلدىزدارىنىڭ كونتسەرتى, قايىرىمدىلىق جارمەڭكەسى, تاعامدارعا ارنالعان شەبەرلىك ساباقتارى مەن بالالار مەرەكەسى كۇتىپ تۇر. سونىمەن قاتار «اسىل ميراس» ورتالىعىندا اۋتيزمگە شالدىققان بالالاردىڭ قولىمەن سالىنعان شىعارماشىلىق جۇمىستارعا ارنالعان قايىرىمدىلىق اۋكتسيونى وتەدى.
