راۋان سەرىكۇلى, قالا تۇرعىنى:
– جاقىندا ەلوردامىزداعى بىرەگەي ورىنداردىڭ ءبىرى «كەرۋەن» ساۋدا-ويىن-ساۋىق ورتالىعىنىڭ ماڭايىنا اقىلى تۇراق جۇيەسى ەنگىزىلگەنى تۋرالى ەستىدىم. بۇل مالىمەت قانشالىقتى شىندىققا جاناسادى؟ الداعى ۋاقىتتا قاي ورىندارعا اقىلى جۇيە ەنگىزىلۋ جوسپاردا بار؟
بۇل ساۋالعا «استانانىڭ كولىك تۇراعى كەڭىستىگى» جشس ءباسپاسوز حاتشىسى ايگۇل امانتاەۆانىڭ جاۋابىن ۇسىنامىز.
– ەڭ الدىمەن «كەرۋەن» ماڭايى دەپ جەكە ءبولىپ ايتقان دۇرىس ەمەس. ەكىنشىدەن, اقىلى تۇراق جۇيەسى جاقىن كۇندەرى ەنگىزىلگەن جوق. بۇل جۇيە وسى جىلدىڭ 15 قاڭتارىنان باستاپ «نۇرجول» جەلەك جولىنىڭ بويىنا قويىلدى. ونىڭ بويىندا «كەرۋەن» دە ورنالاسقان. بۇعان قوسا, جۇرگىزۋشىلەردىڭ ەسىنە سالۋ ءۇشىن ارنايى بەلگىلەر ورناتىلعان. وسى تۇستا ءبىر جايتتى ايتا كەتەيىن, بۇل باستاما العاشقى ءۇش ايدا سىناق رەتىندە جۇزەگە اسا باستادى. سىناق مەرزىمى اياقتالعاننان كەيىن اقىسىن تولەمەگەن جۇرگىزۋشىلەرگە ايىپپۇل سالىندى. ال الداعى ۋاقىتتا استانادا 10 مىڭنان اسا تۇراق ورنىن اقىلاندىرۋ جوسپارلانىپ وتىر.
