ديدار بايعازى, گازەت وقىرمانى:
– جاقىندا تۇرمىستىق قالدىقتى اقشاعا قابىلدايدى دەگەن اقپاراتتى كوزىم شالدى. بۇل قانشالىقتى شىندىق؟ قانداي قالدىقتى, قاي جەرگە وتكىزۋگە بولادى؟
بۇل ساۋالعا «Astana Clean Time» كومپانياسىنىڭ مەنەدجەرى اسەت اباەۆتىڭ جاۋابىن ۇسىنامىز.
– ءبىر اپتا بۇرىن عانا بايقوڭىر اۋدانىنا قاراستى جاستار ىقشام اۋدانىندا «اقىلدى اۋدان» جوباسى اياسىندا «Astana Clean Time» كومپانياسىنىڭ تۇرمىستىق قاتتى قالدىقتاردى قابىلدايتىن العاشقى «GreenStation» پۋنكتى اشىلدى. تۇرعىندار مۇندا قالدىقتى سۇرىپتاپ, ءبولىپ اكەلىپ وتكىزەدى. ازىرگە قاعاز, پوليەتيلەن, پلاستيك جانە اينەك قالدىقتىڭ 11 ءتۇرى قابىلدانادى. ولاردىڭ باعاسى شيكىزاتقا بايلانىستى 3 تەڭگەدەن 100 تەڭگەگە دەيىن بولادى. مىسالى, پوليەتيلەندەردىڭ كەلىسى 70 تەڭگە بولسا, پلاستيكتەردىڭ كەلىسى – 40 تەڭگە.
جالپى, قالادا قالدىقتى اقشاعا ايىرباستايتىن 10 ورىن بار. مىسالى, «سەۆەرنوە سيانيە», «ارمان قالا» تۇرعىن ءۇي كەشەندەرىندە دە تۇرمىستىق قالدىقتاردى قابىلدايدى. بىراق ولار باسقا كومپانيالاردىڭ قاراماعىندا.
جىل سوڭىنا دەيىن ءبىزدىڭ كومپانيا وسىنداي پۋنكتىڭ تاعى 22-ءسىن اشۋدى جوسپارلاپ وتىر.
