رەداكتسياعا حابارلاسقان قالا تۇرعىنى جەڭىس مەيرامبەكوۆ ءوزى تۇراتىن اۋداندا قاڭعىباس يتتەردىڭ كوبەيىپ كەتكەنىنە الاڭدايتىنىن جەتكىزدى. «ەسىلدىڭ وڭ جاعالاۋىندا تۇرامىن. ناقتىراق ايتقاندا, ءا. مولداعۇلوۆا كوشەسىندە ورىن تەپكەن ەسكى ۇيلەردىڭ اۋلاسىندا يەسىز يت-مىسىق كوپ. مەكتەپ جاسىنداعى بالالار ءۇشىن ۋايىمدايمىن. قايدا حابارلاسقانىم ءجون؟» دەيدى ول. وقىرمان ساۋالىنا وراي, وسى ماسەلەمەن تىكەلەي اينالىساتىن استانا قالاسى اۋىل شارۋاشىلىعى باسقارماسىنا حابارلاسقان ەدىك.
جالپى, ەلورداداعى قاڭعىباس يتتەر مەن مىسىقتاردى اۋلاۋ جانە جويۋدى استانا قالاسى اكىمدىگىنىڭ «استانا ۆەتسەرۆيس» كوممۋنالدىق مەملەكەتتىك كاسىپورىنى جۇرگىزەدى. استانا قالاسى اۋىل شارۋاشىلىعى باسقارماسىنىڭ باسشىسى مىندەتىن اتقارۋشى گۇلميرا ەرمولدينانىڭ ايتۋىنشا, يەسىز جانۋارلاردى اۋلاۋعا قالا بويىنشا كۇن سايىن مامانداندىرىلعان 3 بريگادا كولىگى شىعادى.
– «051» قىزمەتىنە حابارلاسقان وتىنىشتەر كۇندەلىكتى تەكسەرىلىپ, قاراۋعا الىنادى. ماسەلەن, تەك ءبىر اپتانىڭ ىشىندە 126 قاڭعىباس يت پەن مىسىقتى ۇستاۋ جونىندە 33 ءوتىنىش تىركەلگەن, – دەيدى ول.
ايتا كەتكەن ءجون, قاڭعىباس يتتەردى اۋلاۋ جۇمىستارىنا كىم كورىنگەن تارتىلمايدى. وعان مەديتسينالىق تەكسەرۋدەن وتكەن, قۇتىرۋعا قارسى الدىن الۋ ەكپەلەرىن العان, پسيحونەۆرولوگيالىق جانە ناركولوگيالىق ديسپانسەرلەردە ەسەپتە تۇرماعان ادامدار عانا جىبەرىلەدى ەكەن. ولار زاڭ اياسىندا رۇقسات ەتىلگەن قۇرالداردى عانا قولدانادى. ياعني, جانۋارلاردى ۇستاۋ ءۇشىن قۇرىق, ءتيىستى سەرتيفيكاتى بار, ارەكەتكە قابىلەتسىز ەتەتىن دوزالانعان پرەپاراتتاردى قولداناتىن پنەۆماتيكالىق قارۋ, تورلار, تور-قاقپاندار, سونداي-اق جانۋارلاردى اۋلاۋ كەزىندە ولاردىڭ ولىمىنە جول بەرمەيتىن باسقا قۇرىلعىلار پايدالانىلادى.
اۋلانعان قاڭعىباس يتتەر مەن مىسىقتار ءۇش كۇننەن اسپايتىن مەرزىمگە ۋاقىتشا وقشاۋلانادى. مامانداردىڭ ايتۋىنشا, ۋاقىتشا ۇستاۋ وقشاۋلاعىشىندا اۋلانعان قاڭعىباس جانۋارلارعا تىركەۋ جانە كلينيكالىق زەرتتەۋ جۇرگىزىلەدى. ارقايسىسى جەكە تورعا ورنالاستىرىلادى. استانادا ولاردىڭ سانى جۇزگە جەتەدى.
ال يەسى جوق جانۋارلار تۋرالى اقپارات مامانداندىرىلعان ۇيىمنىڭ ينتەرنەت-رەسۋرستارىندا ورنالاستىرىلعاننان كەيىن ءۇش كۇن وتكەن سوڭ جويىلادى. ولار ارناۋلى پرەپاراتتارمەن, مەديكامەنتوزدىق جولمەن جانسىزداندىرىلادى. قاڭعىباس جانۋارلاردىڭ ولەكسەلەرىن جويۋ ارنايى پەش قويىلعان مامانداندىرىلعان ۇيىمنىڭ وندىرىستىك بازاسىندا جۇزەگە اسىرىلادى.
ەگەر ءۇيىڭىزدىڭ ماڭىنان قاڭعىباس يت پەن مىسىقتاردى كورسەڭىز, قالالىق «051» قىزمەتىنە نەمەسە مەكەمەنىڭ 28-54-70 نومىرىنە حابارلاسىپ, ولاردى ۇستاۋعا ءوتىنىش بەرۋگە بولادى.
گۇلميرا شارحانقىزى
