استاناداعى وقۋشىلار سارايىندا وتكەن جۇما-سەنبى كۇندەرى قوستاناي وبلىستىق ءىلياس وماروۆ اتىنداعى قازاق دراما تەاترى بەلگىلى جازۋشى-دراماتۋرگ, قازاقستاننىڭ ەڭبەك سىڭىرگەن قايراتكەرى جولتاي جۇمات-ءالماشۇلىنىڭ قوس بىردەي قويىلىمىن كورسەتىپ, ەلوردالىق كورەرمەندەرگە رۋحاني تارتۋ جاسادى.
قارىمدى قالامگەردىڭ العاشقى كۇنى قويىلعان – «قايىرىمدى قالاداعى قارلىعاشتار» دراما-ابستراكتسياسى وتكەن جىلى مادەنيەت جانە سپورت مينيسترلىگى ۇيىمداستىرعان «تاۋەلسىزدىك تولعاۋى» بايقاۋىندا بايگە العان. بۇل تۋىندىدا قازاق ەلىنىڭ ازاتتىعىنىڭ تۇعىرلى بولۋى جولىنداعى جانقيارلىق كۇرەس پەن استانانىڭ ساۋلەتتى قالا بولىپ تۇرعىزىلۋى, وسى جولداعى قيىنشىلىقتار مەن كەدەرگىلەر ءسوز بولدى. پەسانىڭ باس كەيىپكەرى – ساۋلەتكەر جىگىت ارقىلى قيلى-قيلى قيىندىقتار مەن تارتىستار جەلىلەنەدى. قويىلىمدا قازاق ەلىنىڭ قالا سالۋ جولىنداعى ارمانى ءابۋناسىر ءال-فارابي, ابىز احمەت ياساۋي, ءتىپتى حان ابىلاي زامانىندا كوكەيدى تولقىتقانى تۋرالى كەيىپكەرلەر ارقىلى اسەرلى باياندالعان. سپەكتاكلدىڭ پرەمەراسى تامىزدىڭ سوڭىندا قوستانايدا وتكەن. بۇل شىعارما ەلوردانىڭ 20 جىلدىق تويىنا تاماشا تارتۋ بولدى دەپ ايتا الامىز. ونى ساحناعا شىعارعان رەجيسسەر – ەرجان قاۋلانوۆ.
كەلەسى كۇنى تەاتر ارتىستەرى كورەرمەندەرگە سۋرەتكەردىڭ «مۇڭمەن الىسقان ادام» دراما-ەلەگياسىن ۇسىندى. بۇل قويىلىمدا وتكەن عاسىردىڭ 30-شى جىلدارىنداعى الاساپىراندا امالسىز تۋعان ەلدەن اۋعان ءبىر وتباسىنىڭ ايانىشتى تاعدىرى ارقىلى بۇكىل قازاق باستان كەشكەن اۋىر جاعدايى بەينەلەنگەن. باس كەيىپكەر اسان قاريا جاسى سەكسەننەن اسقاندا تۋعان ەلىنە ورالۋدى ارماندايدى. الايدا وعان ۇلكەن ۇلى مارات قارسىلىق تانىتادى. ەكىنشى بالاسى ەلجاننىڭ اكەسىنىڭ اقىرعى ارمانىن ورىنداعىسى كەلەدى. وسى جەردە مارات پەن ەلجاننىڭ اراسىنداعى پىكىر تايتالاسى ارقىلى قازىرگى جاستاردىڭ ەكى ءتۇرلى ويلايتىن بولمىسىن اقتارادى. دالىرەك ايتقاندا, ويلى تۋىندى ءدال بۇگىنگى كۇننىڭ بەينەسىن بەدەرلەيدى. پەسادا كوزگە كورىنبەيتىن تاعى ءبىر كەيىپكەر بار. ول – اقشا.
ۇلكەن ۇلى مارات پاريجدەگى بيزنەسىن تاستاپ, قازاقستانعا ورالعىسى كەلمەيدى. اسان قاريانىڭ ەلگە ساعىنىشپەن ورالعاندا, ونىڭ الدىنان شىعاتىن كورىنىستەردە ءجۇرەكتى اۋىرتپاي قويمادى. قارتتىڭ اۋىلدا ىستەيتىن جۇمىسى جوق, ىشكىلىككە سالىنىپ, ازىپ-توزىپ جۇرگەن قازاق جىگىتىمەن اراسىنداعى ءسوز قاعىسۋلاردا اششى شىندىقپەن بەرىلگەن. جاعىمسىز كەيىپكەر ارقىلى حالقىمىزدىڭ كەيبىر مىنەزدەرىن قاتتى سىناعان تۇستارى دا بولدى. بىراق سونىڭ ءبارى سپەكتاكلگە جان بەرىپ تۇردى. سپەكتاكل باسىنان اياعىنا دەيىن مۇڭدى سازبەن ءورىلىپ وتىرادى. كەيبىر تۇستارىندا كوزگە ەرىكسىز جاس الاسىز. اقىرى, اسان قارياعا تۋعان جەرىنەن توپىراق بۇيىرادى. پەسادا ويناعان اكتەرلاردىڭ شەبەرلىگى دە ولاردىڭ سومداعان رولدەرىنەن انىق بايقالىپ تۇردى. ايتا كەتەيىك, بۇل دراما-ەلەگيانى بەلگىلى رەجيسسەر ەرسايىن تولەۋباي قويدى.
قويىلىم سوڭىندا ساحناعا ەكى كۇنى بويى جۇرتشىلىقتىڭ رۋحاني ءشولىن قاندىرعان قوس تۋىندىنىڭ اۆتورى جولتاي جۇمات-ءالماشۇلى شىعىپ, سوناۋ توبىل جەرىنەن ات تەرلەتىپ كەلگەن تەاتر ۇجىمىنا العىسىن ءبىلدىردى.
