«ەكسپو-2017» حالىقارالىق مامانداندىرىلعان كورمەگە ءوز ۇلەسىمىزدى قوسامىز دەپ, الماتىدان ات تەرلەتىپ كەلگەن 300-گە جۋىق ەرىكتى كۇنى كەشە عانا پويىزدان ءتۇستى.
جۇزدەرى بال-بۇل جايناعان جاستار ەڭ ءبىرىنشى بولىپ, اسەرلەرىمەن بىزبەن ءبولىستى.
الماتىدان ءبىر توپ ەرىكتىلەردى ەرتىپ اكەلگەن ماعجان مىرزاعالي بىلاي دەدى:
– ەكسپو كورمەسىنەن كوپ قىزىق كۇتەم. بۇل – تاجىريبە جيناقتاۋعا تاپتىرماس مۇمكىندىك. ەڭ الدىمەن ەلىم ءۇشىن ماڭىزدى شاراعا بارىمدى سالىپ, ايانباي ەڭبەكتەنۋگە كەلدىم. بۇل وقيعا ءبىزدىڭ جادىمىزدا ەڭ ءبىر ايتۋلى, ماڭىزدى شارا بولىپ قالاتىنىنا سەنىمدىمىن. ءوز ەركىمەن تەگىن قىزمەت ەتۋگە دايىن جاستار قول قۋسىرىپ وتىرىپ, ءار باستاماعا تارتىنشاقتاپ تۇراتىن ادامداردان ارتىعىراق. ەلىمىزدىڭ العا باسۋى, ەكونوميكانىڭ ورلەۋى وسى كورمەنىڭ قانداي دەڭگەيدە وتەتىنىنە بايلانىستى.
ەرىكتى اتانۋدى ارمانداعان, مىڭنان سۋىرىلىپ شىققان الماتىلىق قىمبات نۇرداۋلەت ەلورداعا وسىمەن ءۇشىنشى رەت كەلىپ وتىر. «كۇن رايى تاماشا! ءبىزدى استانالىق ەرىكتىلەر جىلى قارسى الىپ جاتىر» دەدى ول. قىمبات «ازيادا», «الماتى مارافون-2017» سياقتى ۇلكەن شارالاردا دا ەرىكتى بولىپ جۇمىس ىستەدى. ال ەكسپو كورمەسىندە ول بيلەتتەردى تەكسەرۋگە كومەكتەسەدى.
«ICtravel» جوباسىنا قاراستى ەرىكتىلەردى ىرىكتەپ الىپ, دايىندايتىن توپتىڭ جەتەكشىسى ەركىن الدابەرگەننىڭ ايتۋىنشا, جاستارعا بارلىق جاعداي جاسالعان. ەرىكتىلەردى كۇتىپ العان استانالىق بەلسەندىلەر ولاردى №4 جانە №5 ستۋدەنتتەر ۇيىنە ورنالاستىرادى. ايتا كەتەيىك, سول كۇنى ەرىكتىلەردىڭ قاتارى 100 قوستانايلىقپەن تولىقتى. جالپى العاندا, كورمەگە قاتىساتىن ەرىكتىلەردىڭ سانى – 5000, ولاردىڭ 2400-ءى ەلىمىزدىڭ تۇكپىر-تۇكپىرىنەن كەلەدى دەپ كۇتىلۋدە.
گۇلدانا تالعاتقىزى
