«قازاقكونتسەرت» مەملەكەتتىك كونتسەرتتىك ۇيىمى ءوزىنىڭ الپىسىنشى مەرەيتويلىق كونتسەرتتىك ماۋسىمىن اشتى. بۇل ماۋسىم حالىقارالىق مۋزىكا كۇنىمەن تۇسپا-تۇس كەلدى.
ونەردىڭ كيەلى ورداسىن 60 جىلدىق مەرەيتويىمەن العاشقىلاردىڭ ءبىرى بولىپ قر مادەنيەت جانە سپورت ءمينيسترى اقتوتى رايىمقۇلوۆا قۇتتىقتادى.
قۇتتىقتاۋلار لەگىن قازاقتىڭ بۇلبۇل ءانشىسى, حالىق ءارتىسى بيبىگۇل تولەگەنوۆا جالعاستىردى.
– «قازاقكونتسەرتتىڭ» تورقالى تويى قۇتتى بولسىن! جامال وماروۆا, روزا باعلانوۆا, شارا جيەنقۇلوۆا, رابيعا ەسىمجانوۆا, جۇسىپبەك ەلەبەكوۆ سىندى اڭىز تۇلعالاردىڭ ەسىمىمەن بايلانىستى ۇجىمنىڭ مادەنيەت سالاسىندا الار ورنى ەرەكشە. قازىرگى ۋاقىتتا بۇل مەكەمە قاناتىن كەڭگە جايعان ءىرى مادەنيەت ورداسىنا اينالدى. «قازاقكونتسەرت» ۇيىمى وركەندەي بەرسىن, قازاق ونەرى اسقاقتاسىن! – دەپ جەتكىزدى بيبىگۇل احمەتقىزى. سونداي-اق ەسكەندىر حاسانعاليەۆ, بايعالي سەركەباەۆ, بەكبولات تىلەۋحان, ارمان جۇدەباەۆ سەكىلدى بەلگىلى ونەر تۇلعالارى جانە وزبەكستان مەملەكەتتىك فيلارمونياسىنىڭ ۇجىمى, وزبەكستان ۇلتتىق سيمفونيالىق وركەسترىنىڭ باس ديريجەرى اليبەك كابدۋراحمانوۆ سىندى شەتەلدىك ارىپتەستەر دە ءوز قۇتتىقتاۋلارىن جولدادى.
كونتسەرتتىك ۇيىم مەرەيتويلىق ماۋسىمىن «قازاقكونتسەرت الەمى: بىزگە 60 جىل!» اتتى جوبامەن اشتى. كورەرمەندەرسىز وتەتىن كونتسەرت پەن بەنەفيس-شوۋدىڭ تەلەۆيزيالىق نۇسقاسى «حابار» تەلەارناسىنان جاقىن ۋاقىتتا كورسەتىلەدى. جوبا بارىسىندا ونەر سۇيەر قاۋىم 1960 جىلدان باستاپ قازىرگى ۋاقىتقا دەيىنگى قازاق مۋزىكا ونەرىنىڭ تاريحىنا مۋزىكالىق ساياحات جاساپ, بارشاعا تانىلعان حيت اندەر مەن جاڭا تۋىندىلاردى تىڭداي الادى. مەرەيتويلىق جوبادا روزا رىمباەۆا, ماقپال ءجۇنىسوۆا, جەڭىس ىسقاقوۆا, ديماش قۇدايبەرگەن, ءمولدىر اۋەلبەكوۆا, قۇرماش ماحان, اليشەر كاريموۆ, امىرە, «دوس-مۇقاسان» ءانسامبلى, «مۋزارت» توبى, ت.ب. «قازاقكونتسەرت» ۇيىمىنىڭ ونەر ۇجىمدارى مەن بەلگىلى سوليستەرى ونەر كورسەتتى.
«قازاقكونتسەرت» ۇيىمىنىڭ ديرەكتورى جەڭىس سەيدۋللاۇلىنىڭ ايتۋىنشا, بۇل – الپىس جىلدان بەرى قازاق ەلىنىڭ جانسارايىن اسەم اۋەنمەن جادىراتىپ جۇرگەن كيەلى قاراشاڭىراق تارتۋ ەتەتىن جاڭا جوبالاردىڭ باستاماسى عانا.
