ر.باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنا قاراستى «حالىق قازىناسى» ۇلتتىق ونەر ورتالىعىنىڭ ۇيىمداستىرۋىمەن «التاي-تارباعاتاي ءان-كۇي مۇراسى» اتتى ءداستۇرلى ونەر كەشى ءوتتى.
التاي-تارباعاتاي قازاق مۋزىكا ونەرىندەگى ەڭ كونە مەكتەپتىڭ ءبىرى سانالادى. ونىڭ قالىپتاسۋى قازاق حاندىعى داۋىرىنەن باستالادى دەپ ايتساق بولادى. التايدىڭ ارعى جانە بەرگى جاعىن مەكەندەگەن اتالمىش مەكتەپتىڭ كورنەكتى وكىلدەرى قاتارىندا كۇيشى بايجىگىت, بەيسەنبى دونەنبايۇلى, اسەت نايمانبايۇلى ەسىمدەرى ەرەكشە اتالادى. وسى ءوڭىردىڭ ءان-كۇي مۇراسىنىڭ دامۋىنا شاكىر ابەنوۆ, تۇرسىنعازى راحيموۆ, مۇقاش تاڭعىتۇلى ۇلەس قوستى. قازىر ءبىلال ىسقاقوۆ, سەكەن تۇرىسبەك, مۇرات ابۋعازى, ەركىن شۇكىمانوۆ سىندى ءانشى-كۇيشىلەر ءداستۇردى جالعاستىرىپ جاتىر.
ەرەكشە اتاپ وتەرلىگى, سىبىزعى كۇيلەرى وسى وڭىردە جاقسى دامىعان. سونداي-اق ءۇش ىشەكتى دومبىرامەن ايتىلاتىن اندەر مەن شەرتىلەتىن كۇيلەردىڭ باسىن ىزدەگەندە وسى ايماققا, ۇلى اباي زامانىنا بارىپ تىرەلەمىز. ءۇش ىشەكتى دومبىرانى ونەرتانۋشى جارقىن شاكارىم زەرتتەپ, ناسيحاتتادى. قازىر دە ناسيحاتتاۋشىلار جوق ەمەس.
«حالىق قازىناسى» ۇلتتىق ونەر ورتالىعىنىڭ جەتەكشىسى جاسۇلان ناۋرىزبايۇلى تىزگىنىن ۇستاعان كەشتە كورەرمەندەر قوس ىشەكتى دە, ءۇش ىشەكتى دە دومبىرانىڭ كۇمبىرىن, سىبىزعىنىڭ سىزىلعان ءۇنىن, قوبىزدىڭ كۇڭىرەنۋىن, جەتىگەننىڭ جانعا جايلى اۋەنىن, سىرنايدىڭ سىرلى سازدارىن, ءتىپتى گيتارانى دا تىڭدادى.
بەلگىلى ءانشى-كۇيشىلەر – قازاقستاننىڭ ەڭبەك سىڭىرگەن قايراتكەرلەرى جانعالي ءجۇزباي, ارداق بالاجانوۆا, مەدەت سالىقوۆ, كلارا تولەنباەۆا, راۋشان ورازباەۆا, قۇماربەك قالقاتاي, نۇربولات ارزاماسۇلى, قازاقستاننىڭ مəدەنيەت قايراتكەرلەرى تولعانباي سەمباەۆ, ەربولات شالدىبەكوۆ, مادەنيەت سالاسىنىڭ ۇزدىكتەرى ەدىل باسىعاراەۆ, پەريزات تۇراروۆا, «دارىن» مەملەكەتتىك جاستار سىيلىعىنىڭ لاۋرەاتى اسقار مۇقيات, حالىقارالىق بايقاۋلاردىڭ لاۋرەاتتارى باۋىرجان مۇحامەتباي, باۋىرجان بەكمۇحانبەت, ايزات قارابەك, ۆەنەرا تابىس, ءبىرجان ايتاحمەتوۆ, ارنايى قوناق سەرىك باباحانوۆ التاي-تارباعاتاي اۋەندەرىن اۋەلەتتى. سونىڭ ىشىندە «جورعاتاي», «گۇلداريعا», «قارا-اي كوزىڭ», «احاۋ, سەمەي» سىندى حالىق اندەرى, «سۇلۋبايدىڭ ءانى» سەكىلدى ەلگە بەلگىلى تۋىندىلار مەن ەل ەستي قويماعان شىعارمالار كورەرمەندەردىڭ قۇلاق قۇرىشىن قاندىرىپ, جان سارايىن اشتى.
