الىستاعى اعايىنعا ارنادى
اقپارات جانە قوعامدىق دامۋ مينيسترلىگىنىڭ قولداۋىمەن دۇنيەجۇزى قازاقتارى قاۋىمداستىعى, «وتانداستار قورى» جانە «قازاقكونتسەرت» ۇيىمى بىرلەسىپ, «Turan» ەتنو-فولكلورلىق ءانسامبلىنىڭ قاتىسۋىمەن شەتتەگى قازاقتارعا ارناپ «ۇلى دالا ەلىنەن» اتتى ونلاين كونتسەرت وتكىزدى.
ۇيىمداستىرۋشىلاردىڭ ايتۋىنشا, يگىلىكتى شارانىڭ ماقساتى – مۋزىكالىق ونەر ارقىلى الىستا جۇرگەن اعايىنعا رۋحاني قولداۋ كورسەتۋ جانە شەت ەلدەگى قانداستارمەن بايلانىستى نىعايتۋ.
ونلاين كونتسەرت بارىسىندا انسامبل مۇشەلەرى سەرىك نۇرمولداەۆ, ماقسات مەدەۋبەك, باۋىرجان بەكمۇحانبەتوۆ, ەرجىگىت اليەۆ, جانتۋ داداباەۆ ۇلتتىق اسپاپتاردىڭ دىبىسىن قازىرگى زامانعا ساي لايىقتاپ, بابالار مۇراسىن جاڭعىرتىپ, ۇمىت بولا باستاعان ءتول اسپاپتاردىڭ سۇيەمەلدەۋىمەن «ورتەكە», «اقساق قۇلان», «كەرۋەن», «كوروعلى», «اققۋ», «بۇركىت» كۇيلەرىن تىڭدارماندارعا شەبەر جەتكىزە ءبىلدى. سونىمەن بىرگە ونەرلى ۇجىم «قىران دالام – تۇران دالام», «قيلى زامان» سەكىلدى تۋىندىلاردى ورىندادى. بۇل دۇنيەلەردەن حالقىمىزدىڭ اڭشىلىق, ساياتشىلىق ءداستۇرى كورىنىس تاپسا, كومپوزيتور اقتوتى رايىمقۇلوۆانىڭ «شابىت» جانە «اباي تولعاۋى» اتتى شىعارمالارى دا كورەرمەن كوڭىلىن اسەم كۇيگە بولەدى. سونداي-اق كونتسەرتتە نۇر-سۇلتان قالاسى Astana Ballet تەاترى مەن قازاق ۇلتتىق حورەوگرافيا اكادەمياسىنىڭ ارتىستەرى دە ونەر كورسەتتى.