ەلوردا باسشىسى باقىت سۇلتانوۆ يوردانيا استاناسى اممانعا باردى. ساپار بارىسىندا قالا كوشەلەرىنىڭ بىرىنە استانا اتاۋى بەرىلدى. بۇل سالتاناتتى شاراعا ەلوردا اكىمىمەن بىرگە امماننىڭ مەرى يۋسۋف ءال-شاۋاريبا قاتىستى.
استانا اكىمى ب.سۇلتانوۆ قازاقستان پرەزيدەنتى نۇرسۇلتان نازارباەۆ پەن يوردانيا كورولى ءىى ابدوللا اراسىنداعى دوستىق قارىم-قاتىناستىڭ وزگەلەرگە ۇلگى ەكەندىگىن تىلگە تيەك ەتتى. سونداي-اق ول امماندىقتاردىڭ ەلباسىعا دەگەن ىقىلاسى ءۇشىن ءوز العىسىن ءبىلدىردى. 2010 جىلى يوردانيا استاناسىنداعى ورتالىق كوشەلەردىڭ بىرىنە نۇرسۇلتان نازارباەۆتىڭ ەسىمى بەرىلگەن بولاتىن.
– شاۋاريبا مىرزامەن بىرگە نۇرسۇلتان نازارباەۆ اتىنداعى كوشەدە بولىپ, ونىڭ دامۋىن كورىپ قايتتىق. ال ەندى قازاقستان استاناسىنىڭ اتىمەن اتالاتىن كوشەنى اشىپ وتىرمىز. بۇل وقيعا جاس استانانىڭ 20 جىلدىعىنا تۇسپا-تۇس كەلىپ وتىر. ول ءبىزدىڭ قالالار مەن ەلدەردىڭ تۇرعىندارى اراسىنداعى قارىم-قاتىناستىڭ نىعايا تۇسۋىنە جاڭا يمپۋلس بەرەتىنىنە سەنەمىن, – دەدى ەلوردا اكىمى.
مۇنىمەن قوسا وسى كەزدەسۋ بارىسىندا استانا اكىمى مەن اممان مەرى ەكى ەلدىڭ الداعى ۋاقىتتاعى ىنتىماقتاستىعىنىڭ الەۋەتىن تالقىلادى. ەلوردا باسشىسىنىڭ ايتۋىنشا, اتالمىش ءىسساپار ۋربانيستيكالىق دامۋ سالاسىنداعى ەكىجاقتى ىنتىماقتاستىقتى دامىتۋعا زور مۇمكىندىك بەرەدى. امماندا كولىك, كوگالداندىرۋ, قۇرىلىس, سمارت-تەحنولوگيالار, اكىمشىلىك ۇردىستەردى جەڭىلدەتۋ, اۆتوماتتاندىرۋ, بيزنەس-ورتانى جاقسارتۋ سالالارىندا كوپتەگەن ءىرى رەفورمالار مەن جوبالار جۇزەگە اسىرىلىپ جاتىر. استانادا دا وسى باعىتتارداعى جۇمىس بەلسەندى جۇرگىزىلۋدە. سوندىقتان ەكى استانانىڭ ءبىر-بىرىنەن ۇيرەنەرى از بولماسى انىق. باسقوسۋ كەزىندە ب.سۇلتانوۆ اممان مەرىنە جىل باسىنان بەرى حالىقارالىق «استانا» قارجى ورتالىعىنىڭ جۇمىس ىستەپ جاتقانىن دا ايتىپ, يوردانيالىق بيزنەسمەندەردى سونىڭ جۇمىسىنا قاتىسۋعا شاقىردى.
ەستەرىڭىزگە سالساق, 2012 جىلدىڭ قاڭتارىندا استانادا يوردانيانىڭ بۇرىنعى كورولى مارقۇم حۋسەين بەن تالالدىڭ قۇرمەتىنە كوشە اتاۋى بەرىلگەن-ءدى.
