«Qazaqstan» ورتالىق كونتسەرت زالىندا «ءان-كۇي قاناتىندا» اتتى كەرەمەت كەش ءوتتى.
ۇلتتىق مۋزىكالىق ونەردى ناسيحاتتاۋعا ارنالعان كونتسەرت «الاش» پارتياسىنىڭ مۇشەسى, قازاق رۋحانياتىنىڭ دامۋىنا زور ۇلەس قوسقان تۇلعا احمەت بايتۇرسىنۇلىنىڭ 150 جىلدىق مەرەيتويى مەن دومبىراشى, ءانشى مۇگىلسىم (حالىق اراسىندا اققىز دەپ تانىلعان) احمەتقىزىنىڭ 125 جىلدىق مەرەيتويىنا ارنالدى. كەشتى جۇرگىزگەن «حالىق قازىناسى» مەملەكەتتىك فولكلورلىق ونەر ءبولىمىنىڭ باسشىسى ەرلان رىسقالي ورىندالعان ءار شىعارمانىڭ تاريحىمەن كورەرمەندى تانىستىردى. سونداي-اق احمەت بايتۇرسىنۇلى مەن اققىز كۇيشى جايلى ەلگە بەلگىسىز تىڭ دەرەكتەرمەن ءبولىستى. اۋەلەگەن اسەم ءان, كۇمبىرلەگەن كۇي مەن جىر جاۋھارلارى ورىندالعان ەرەكشە كەشتە قازاقكونتسەرت ارتىستەرى ونەر كورسەتتى. اتاپ ايتساق, جانعالي ءجۇزباي, كلارا تولەنباەۆا, ارداق بالاجانوۆا, ايگۇل ەلشىباەۆا, قۇماربەك قالقاتاي, كۇنسۇلۋ تۇرىكپەن, دىنيسلامبەك جايلاۋباي, اسقار مۇقيات, ت.ب. اندەردى ناقىشىنا كەلتىرە ورىندادى.
كونتسەرتكە ەلىمىزدىڭ تۇكپىر-تۇكپىرىنەن ارنايى كەلگەن ونەرسۇيەر قاۋىم ارتىستەردىڭ ونەرىنە زور قوشەمەت كورسەتىپ, ۇلتتىق مۋزىكامىز ۇلىقتالعان كەشتىڭ ۇيىمداستىرۋشىلارىنا العىستارىن جەتكىزدى.
