انا ءتىلىمىزدى ارداقتاعاندار
![](https://astana-akshamy.kz/wp-content/uploads/2022/10/whatsapp-image-2022-10-26-at-18.10.29-1-780x470.jpeg)
ەلوردادا رەسپۋبليكا كۇنىنە وراي ءىس-شارالار جالعاسىپ جاتىر. تولەگەن ايبەرگەنوۆ اتىنداعى 16-ورتا مەكتەپتە «جاسا, جاينا, جاڭا قازاقستان!» اتتى وزگە ۇلت وكىلدەرى اراسىندا سايىس وتكىزىلدى.
قازاقتىڭ ونەرىن, ۇلتتىق تاعامدارى مەن سالت-ءداستۇرىن ناسيحاتتايتىن ءىس-شاراعا قاتىسۋشىلار وزگە ۇلت وكىلى بولا تۇرا انا تىلىمىزدە ءان ايتىپ, بي بيلەپ, ۇلتتىق تاعامداردى جاساپ, ءوز ونەرلەرىن ورتاعا سالدى.
پەداگوگتارعا, اتا-انالارعا, وقۋشىلارعا ەرەكشە دەم بەرگەن سايىستىڭ وتۋىنە مەكتەپ ديرەكتورى – ساۋلە ازيمحانوۆا مەن ت.ايبەرگەنوۆ اتىنداعى مەموريالدىق مۋزەي جەتەكشىسى گاۋحار ءجۇسىپوۆا مۇرىندىق بولعانىن اتاپ ءوتۋ كەرەك.
وتباسى, بالا تاربيەسىندە ءتىلىمىزدى, ءدىلىمىزدى, ۇستانعان ءدىنىمىزدى, سالت-ءداستۇرىمىزدى, ادەت-عۇرپىمىزدىڭ وزىعىن ناسيحاتتاپ, ۇيرەتۋ, ءتالىم-تاربيەنىڭ وزەگى ەتۋدى ماقسات ەتىپ, ءتارتىپ پەن تاربيەسىز ءبىلىم دە, بايلىق تا قۇنسىز ەكەنىنە كورسەتكەن سايىستا ءداستۇرىمىز لايىقتى تۇردە ناسيحاتتالدى.
قاتىسۋشىلار قولدانبالى قولونەر شەبەرلىگى, ۇلتتىق سالت-ءداستۇر جونىندەگى ءبىلىم دەڭگەيى, ءان-بي ونەرى بويىنشا سايىسقا ءتۇستى. ول بەس كەزەڭنەن تۇردى, وعان قاتىسقان وزگە ۇلت وكىلدەرى – گالينا مۇسابەكوۆا, اننا چالىك, گيۋلنارا اسكەروۆا, جاننا ەرگاليەۆا جانە ەۆگەنيا كليموۆا ءوز ونەرلەرىن كورسەتىپ, ۇلتتىق سالت-ءداستۇرىمىز جايلى سىنداردان سۇرىنبەي ءوتتى. ناتيجەسىندە, باستاۋىش بۋىن وقۋ ءىسىنىڭ ورىنباسارى – ەۆگەنيا اندرەەۆنا باس جۇلدەنى قانجىعاسىنا بايلاسا, اعىلشىن ءتىلى مۇعالىمى – گالينا مۋسابەكوۆا مەن ينفورماتيكا ءپانىنىڭ مۇعالىمى – جاننا ەرگاليەۆا 2-ورىندى, ال اتا-انا گيۋلنارا اسكەروۆا مەن اسحانا مەڭگەرۋشىسى اننا چالىك 3-ورىندى يەلەندى.
كەش تەك ۇرپاق تاربيەسىندەگى ۇلتتىق قۇندىلىقتاردىڭ دارىپتەلۋىمەن عانا ەمەس, اعا بۋىن مەن جاستار اراسىنداعى ساباقتاستىققا, رۋحاني بىرلىككە جول سالۋىمەن, پاراسات پەن ىزگىلىكتىڭ ەرەكشە سالتاناتىمەن ەرەكشە اسەرگە تولى بولدى.