استانادا جاھانعا اتى جايىلعان ارداگەر فۋتبولشىلاردىڭ باسىن قوسقان «EXPO-2017 Football Cup» حالىقارالىق ءتۋرنيرى ءوتتى. التى كوماندا باق سىناعان دوپ دوداسىندا رەسەي قۇراماسى چەمپيون اتاندى.
«ەكسپو-2017» حالىقارالىق مامانداندىرىلعان كورمەسىنىڭ شەڭبەرىندە ۇيىمداستىرىلعان بۇل تۋرنيرگە جان-پەر پاپەن, حريستو ستويچكوۆ, ەرنان كرەسپو, دينو بادجو, نۋنۋ مانيشە, بەرند 
شۋستەر, ۆالەري كارپين سەكىلدى الەم فۋتبولىندا جۇلدىزى جانعان ارداگەرلەر جينالدى.
مۇنداي ايگىلى فۋتبولشىلار بۇرىن-سوڭدى قازاق جەرىنە تابان تىرەمەگەن.
ەكى كۇنگە جالعاسقان ءتۋرنيردىڭ باس جۇلدەسى قازاقستان, رەسەي, يتاليا, گەرمانيا, پورتۋگاليا جانە الەم قۇراماسى كوماندالارى اراسىندا ساراپقا سالىندى.
فينالدا رەسەي قۇراماسى الەم قۇراماسىمەن كەزدەسىپ, كورشىلەرىمىز 7:4 ەسەبىمەن باسىمدىق تانىتىپ, جەڭىسكە جەتتى.
ال قولا جۇلدە ءۇشىن بولعان تارتىستى ويىندا قازاقستان پورتۋگالياعا ەسە جىبەردى. ەسەپ – 13:7.
ءتۋرنيردىڭ ماراپاتتاۋ راسىمىنە قر مادەنيەت جانە سپورت ءمينيسترى ارىستانبەك مۇحامەديۇلى, استانا اكىمى اسەت يسەكەشەۆ, «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ جانە قازاقستان فۋتبول فەدەراتسياسىنىڭ پرەزيدەنتى سەيىلدا بايشاقوۆ قاتىستى.
جەكەلەگەن اتالىمدار بويىنشا الەم قۇراماسىنىڭ قاقپاشىسى الەكساندر شوۆكوۆسكي «ۇزدىك قاقپاشى», پورتۋگاليالىق فەرناندۋ مەيرا «ۇزدىك قورعاۋشى» جانە تاعى ءبىر پورتۋگال نۋنۋ مانيشە «ۇزدىك شابۋىلشى» رەتىندە تانىلدى.
ال ءتۋرنيردىڭ «ۇزدىك ويىنشى» اتالىمىنا رەسەيلىك رومان شيروكوۆ لايىق بولدى.
بۇل فۋتبول مەرەكەسى مۇنىمەن تۇگەسىلمەي, اڭىز ويىنشىلار جانكۇيەرلەرىنە قولتاڭبا بەرىپ, ەستەلىك سۋرەتكە ءتۇستى.
سونداي-اق, شەبەرلىك ساباعىن وتكىزىپ, بالالاردى زور قۋانىشقا بولەدى.
حريستو ستويچكوۆ,
بولگاريا قۇراماسىنىڭ, «بارسەلونا» كلۋبىنىڭ
بۇرىنعى شابۋىلشىسى, «التىن دوپ» يەگەرى:– استانادا وتكەن تۋرنير وتە جاقسى ۇيىمداستىرىلدى. مۇندا فۋتبولدىڭ دامۋىنا ەرەكشە ءمان بەرىلەتىنىنە كوزىم جەتتى. ستاديونى دا كەرەمەت. الداعى ۋاقىتتا زور جەتىستىككە جەتۋ ءۇشىن بالالار مەن جاسوسىپىرىمدەر فۋتبولىنا باسا كوڭىل ءبولۋ كەرەك. بۇل قالاعا كەلگەن كۇنى-اق كەشكىسىن ەكسپو كورمەسىن ارالاپ شىقتىم. بارىنە جوعارى باعامدى بەرەمىن.
ورىنبەك وتەمۇرات
