قر پرەزيدەنتى جانىنداعى ورتالىق كوممۋنيكاتسيالار قىزمەتىندە قازاقستان رەسپۋب-ليكاسى ىشكى ىستەر مينيسترلىگى توتەنشە جاعدايلار كوميتەتىنىڭ توراعاسى ۆ.بەككەردىڭ قاتىسۋىمەن وتكەن بريفينگ بارىسىندا بيىلعى سۋ تاسقىنى كەزىندە ازاماتتاردىڭ قاۋىپسىزدىگىن قامتاماسىز ەتۋ ماسەلەسى كەڭىنەن تالقىلاندى.
كۇننىڭ كۇرت ىسىپ كەتۋىنە بايلانىستى قار مەن مۇزدىڭ شۇعىل ەرۋى اسەرىنەن جانە نوسەرلى جاڭبىردىڭ سالدارىنان كوكتەمدە سۋ تاسقىنى بولۋى ىقتيمال. وسى جونىندە ايتا كەلە كوميتەت باسشىسى ۇستىمىزدەگى جىلى 807 ەلدى مەكەندە سۋ دەڭگەيى كوتەرىلۋى مۇمكىن ەكەنىن ەسكەرتتى.
«قازگيدرومەتتىڭ» الدىن الا بولجامىنا سايكەس, اسىرەسە, اقمولا, اقتوبە, قوستاناي, قاراعاندى جانە سولتۇستىك قازاقستان وبلىستارىندا كوكتەمدە قار سۋى كوبەيەدى. وسىعان وراي قامدانباساق, قاپى قالۋىمىز مۇمكىن. بۇل رەتتە بارلىق دەڭگەيدەگى اكىمدىكتەر توتەنشە جاعدايلاردىڭ الدىن الۋ جانە جويۋ ءجونىندەگى كوميسسيانىڭ 276 وتىرىسىن وتكىزىپ, بولجاپ بولمايتىن سالدارعا اكەلۋى مۇمكىن, قاۋىپتى تابيعي قۇبىلىستىڭ الدىن الۋ ماسەلەلەرى تالقىلاندى.
تۇرعىن ۇيلەردىڭ سۋ استىندا قالۋىن بولدىرماۋ ءۇشىن قىس بويى جاۋعان قاردان دەر كەزىندە ارىلۋ – بۇگىنگى كۇن تارتىبىندەگى باستى ماسەلەلەردىڭ ءبىرى. وسىعان وراي, ۇستىمىزدەگى جىلى جەرگىلىكتى اتقارۋشى ورگاندار ەلدى مەكەندەردەن 9 ملن تەكشە مەتردەن استام قار شىعارعان. بۇل جۇمىستار ءالى كۇنگە دەيىن جالعاسىپ جاتىر.
ۆ.بەككەردىڭ ايتۋىنشا, 2016 جىلعى سۋ تاسقىنى كەزەڭىنە دايىندىق اياسىندا حالىق پەن ءوڭىرلەردى قورعاۋ ماقساتىندا 90 شاقىرىمنان استام قورعاۋ بوگەتى سالىنىپ, 455 شاقىرىم بوگەتكە جوندەۋ جۇمىستارى جۇرگىزىلگەن. 180 شاقىرىمعا جۋىق وزەن ارنالارىندا جاعا بەكىتۋ جانە تەرەڭدەتۋ جۇمىستارى اتقارىلىپ, 2 مىڭ شاقىرىمنان استام ارنا تازارتىلىپتى. سونىمەن بىرگە سۋ تاسقىنىنىڭ الدىن الۋ مەن ولاردىڭ سالدارىن جويۋ ماقساتىندا 27,5 مىڭ توننا جانار-جاعارماي, 400 مىڭ توننادان استام ينەرتتى ماتەريالدار, 1,3 ملن. قاپ دايىندالعان.
– ءىرى اۋقىمدى سۋ تاسقىنىن جويۋ ءۇشىن ىشكى ىستەر مينيسترلىگىنىڭ جەكە قۇرامىنان 9 مىڭعا جۋىق ادام جانە 1 مىڭنان استام تەحنيكا, 220 ءجۇزۋ قۇرالى ءازىر تۇر. كۇن جىلىنعان جاعدايدا قار قورى كوپ وڭىرلەرگە قوسىمشا كۇشتەر مەن قۇرالدار جىبەرىلەدى, – دەدى ۆ.بەككەر.
كوميتەت توراعاسى «قازگيدرومەتتىڭ» مالىمەتىنشە, بيىلعى جاعداي بويىنشا قازاقستاننىڭ سولتۇستىگىندە, ورتالىعىندا جانە شىعىسىندا قاردىڭ كوپ تۇسۋىنە بايلانىستى شىعىس قازاقستان, اقمولا, سولتۇستىك قازاقستان, قاراعاندى جانە قوستاناي وبلىستارىندا كۇردەلى جاعداي قالىپتاسۋى مۇمكىن ەكەنىن جەتكىزدى.
گۇلبارشىن وكەشقىزى
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
