وڭتۇستىك كورەيانىڭ پحەنچحان قالاسىندا باستالعان وليمپيادا ويىندارىندا جەڭىمپازدار مەن جۇلدەگەرلەردىڭ قۇرمەتىنە مەملەكەت تۋلارى كوتەرىلىپ, ءانۇراندار شىرقالىپ جاتىر. وسىنداي جۇرەك تەبىرەنتەرلىك قۋانىشقا قازاقستان جانكۇيەرلەرى دە كەنەلىپ ۇلگەردى.
بيىل ءۇشىنشى رەت وليمپيادا ويىندارىنا ساپار شەككەن فريستايلشى قىزىمىز يۋليا گالىشەۆا قولا جۇلدەگەر اتاندى. سايىپقىران سپورتشىمىزدىڭ وسى جەڭىسى قازاقستان تۋىن وليمپ تورىندە جەلبىرەتتى.
گالىشەۆا العاشقى سىننان 75,10 ۇپايمەن سۇرىنبەي ءوتتى. ەكىنشى فينالدا كورسەتكىشىن ءسال جاقسارتىپ, 76,81 ۇپاي جينادى. ءسويتىپ جۇلدەلى ورىندارعا تالاساتىن ۇزدىك التىلىقتىڭ سوڭى بولىپ, شەشۋشى فينالعا شىقتى.
ءۇشىنشى فينالدا ول جارىس جولىن ءبىرىنشى بولىپ باستادى. اقتىق سايىستا 77,40 ۇپاي الىپ, ءوزىنىڭ ۇزدىك ناتيجەسىن تىركەدى. ودان كەيىن شىققان بەس موگۋلشىنىڭ ەكەۋى عانا مۇنىڭ الدىن ورادى. سونىڭ ءبىرى فرانتسيالىق پەررين لاففون (78,65) التىن السا, كانادالىق جيۋستين ديۋفۋر-لاپۋانت (78,56) كۇمىستى يەلەندى.
وسىلايشا ۇزدىك ۇشتىكتى تۇيىندەگەن يۋليا گالىشەۆا ۇلتتىق قۇرامانىڭ ەنشىسىنە العاش بولىپ جۇلدە سالدى. جانە بۇل – تاريحتا وسى سپورت تۇرىنەن قازاقستاننىڭ وليمپياداداعى ءبىرىنشى مەدالى.
سايىستان كەيىن جۋرناليستەرگە بەرگەن سۇقباتىندا سپورتشى جارىستى ءبىرىنشى بولىپ باستاعان وڭاي ەمەس ەكەنىن, وزىنەن كەيىنگىلەر زور شىعىپ, تومەن سىرعىپ كەتەم بە دەگەن تولقۋدىڭ بولعانىن جاسىرمادى. ول «ءتورتىنشى ورىنعا ءتۇسىپ قالعاننان گورى بەسىنشى بولا سالعان الدەقايدا جاقسى» دەدى.
سول كۇنى كۇن رايى ايتارلىقتاي سۋىق بولدى. ونىڭ ۇستىنە گالىشەۆا ءۇش اپتا بۇرىن اقش-تاعى جارىستا قولىن سىندىرىپ العان. بۇل تۋرالى شەتەلدىك باسىلىمدار ول قولىن «گيپسپەن» وراپ شىققان دەپ جازدى.
25 جاستاعى موگۋلشى بۇعان دەيىن ەكى وليمپياداعا قاتىسىپ, بىرىندە 11-ءىنشى, ەكىنشىسىندە 7-ورىننان كورىنگەن.
ورىنبەك وتەمۇرات
