ەلوردانىڭ ورتاسىنان وتەتىن «اقبۇلاق» ارناسىنىڭ جاعالاۋى باس قالاداعى كورىكتى ورىنداردىڭ بىرىنە اينالادى. جاعالاۋدا شاعىن سارقىراما الاڭى, ويىن جانە سپورت ايماعى, كوشە كىتاپحاناسى, ءتۇرلى تاقىرىپقا ارنالعان فوتوزونالار اشىلماق. ارنا جاعالاۋى مەن جاياۋ جۇرگىنشىلەر جولى اباتتاندىرىلادى.
بۇعان دەيىن بايقوڭىر اۋدانى اكىمدىگىنىڭ جانە قالانىڭ ۋربانيستيكا ورتالىعىنىڭ قىزمەتكەرلەرى جەرگىلىكتى تۇرعىندارمەن بىرنەشە كەزدەسۋ وتكىزگەن بولاتىن. وسى كەزدەسۋلەردە تۇرعىندار تاراپىنان بالالار الاڭدارىنىڭ, زەينەتكەرلەرگە ارنالعان دەمالىس ورىندارىنىڭ جوعى, ەرەكشە قاجەتتىلىگى بار جاندارعا ارنالعان ورتانىڭ بولۋى, اۋماقتى كوگالداندىرۋ تۋرالى ايتىلعان ەدى. ناتيجەسىندە جاعالاۋدى دامىتۋ تۇجىرىمداماسى ازىرلەندى. ۋربانيستەر مەن قالا تۇرعىندارىنىڭ بىرلەسكەن جوباسىنا سايكەس, جاعالاۋدا كوشە كىتاپحاناسى, ارت-نىساندار, وت جاعىپ, سەرۋەن قۇرۋعا بولاتىن اۋماق, قوسىمشا جارىقتاندىرۋ, سۋ جانىنداعى اتكەنشەك-ورىندىقتار, عاشىقتاردىڭ كەزدەسۋ ورنى اشىلادى. سول سياقتى ەۋرازيا ۇلتتىق ۋنيۆەرسيتەتىنىڭ جانىنداعى كوپىر استى كەڭىستىگىندە ويىن الاڭى ورناتىلادى.
نۇر-سۇلتان قالاسى ۋربانيستيكا ورتالىعىنىڭ باسشىسى ەلنار بازىكەننىڭ ايتۋىنشا, مۇندا لاندشافتىق ۇيىمداستىرۋ جۇمىستارىن ورىنداۋ ءۇشىن ينفراقۇرىلىمعا تالداۋ جۇرگىزىلگەن.
جاعالاۋدى كوگالداندىرۋعا ەرەكشە كوڭىل بولىنەدى. بۇل جەرگە 97 اعاش پەن 912 بۇتا وتىرعىزۋ جوسپارلانىپ وتىر. اباتتاندىرۋدىڭ جالپى اۋدانى 10000 شارشى مەتردى قۇرايدى.
اممان كوشەسىندەگى كوپىردىڭ استىندا جاياۋ جۇرگىنشىلەر جولى سالىنادى. وسىلايشا ساياباق كلاستەرلەرى بىرىگەدى. ءبىر سوزبەن ايتقاندا, استانانىڭ ديزاين-كودىنا سايكەس جايلى قالالىق ورتانى قۇرۋدىڭ بارلىق ەلەمەنتى ەسكەرىلەدى.
– قالانىڭ ديزاين-كودى – قولايلى ورتانى قالىپتاستىرۋ قۇرالى. ارتىق شۋدىڭ, جاياۋ جۇرگىنشىلەردىڭ جۇرۋىنە قيىندىق تۋدىراتىن كەدەرگىلەردىڭ بولماۋى, جارىقتاندىرۋ, كوگالداندىرۋ جانە دەمالىس ورىندارىنىڭ جەتكىلىكتى بولۋى قالا كوركىن ارتتىرا تۇسەدى, – دەدى نۇر-سۇلتان قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۇرانحاەۆ.
بيىل «نۇر-سۇلتان – جايلى قالا» ماستەر-جوسپارى اياسىندا 200-دەن استام اۋلا مەن قوعامدىق كەڭىستىكتى اباتتاندىرۋ جوسپارلانىپ وتىر. سول سياقتى قالانى جاپپاي كوگالداندىرۋعا دا ەرەكشە كوڭىل بولىنبەك.
