استانادا «حان شاتىر» ساۋدا ورتالىعىنىڭ الدىندا اقمولا وبلىسىنىڭ ازىق تۇلىك جارمەڭكەسى ءوتىپ جاتىر. بۇل «قۋاتتى ءوڭىر – قۋاتتى قازاقستان» اكتسياسى اياسىندا وتكىزىلىپ جاتقان سوڭعى جارمەڭكە.
جارمەڭكەنى ۇيىمداستىرۋشىلاردىڭ ايتۋىنشا, اقمولا وبلىسىنىڭ شارۋالارى ەلوردا تۇرعىندارىنا جالپى قۇنى 404 ميلليون تەڭگە بولاتىن 968 تونناعا جۋىق ءونىم اكەلىپ وتىر. «جالپى ەلورداعا 70-كە جۋىق ءونىم ءتۇرىن اكەلىپ وتىرمىز. 605,2 توننا ەت جانە شۇجىق ونىمدەرى, 46 توننا ءسۇت ونىمدەرى, 218 توننا كوكونىس, 19 توننا بالىق پەن بالىق ونىمدەرى, 403 مىڭ دانا جۇمىرتقا, 200 توننا كارتوپ, 45 مىڭ ليتر وسىمدىك مايى جانە تاعى باسقا دا تاۋارلار بار. باعالارى استانالىق ساۋدا نىساندارىمەن سالىستىرعاندا 15-20 پايىزعا ارزان. ەڭ باستىسى ساپالى ءارى قاۋىپسىز. بارلىعى اركا ءتورىنىڭ ەڭبەكقور شارۋالارىنىڭ ءوز قولدارىمەن وندىرگەن ونىمدەر» دەدى اقمولا وبلىستىق ازىق تۇلىك باسقارماسىنىڭ باسشىسى بالپان مۇرات.
جارمەڭكەگە كەلۋشىلەر ەت باعاسىنا قايران قالىسىپ جاتتى. ادەتتە قارا بازارداعى باعاسىنىڭ ءوزى 1200-1300 تەڭگەدەن تۇسپەيتىن جىلقى ەتىن جۇرت 1100 تەڭگەدەن الىپ جاتتى. سيىر ەتى 1000, قوي ەتى 950, قىمىزدىڭ ءليترى 600 تەڭگەدەن بولدى. سونىمەن قاتار جۇرت نازارىن وزىنە اۋدارعان جارمەڭكەدە سپورتتىق شارالار ۇيىمداستىرىلىپ, قىمىز, باۋىرساق فەستيۆالى بولىپ جاتتى. كەلۋشىلەر ارقانىڭ بال قىمىزىنان اۋىز ءتيىپ, كونتسەرت تاماشالادى. شارا ەكى كۇنگە جالعاسادى.
سونىمەن قاتار ۇيىمداستىرۋشىلار ەلوردا تۇرعىندارى مەن قوناقتارىنىڭ نازارىنا قىزىقتى مادەني باعدارلاما ۇسىنباق. بۇگىن ساعات 19.00-دە ق. قۋانىشباەۆ اتىنداعى قازاق مۋزىكالىق دراما تەاترىندا م. شاحانوۆتىڭ «شىڭعىس حان» سپەكتاكلى قويىلادى. بەيبىتشىلىك جانە كەلىسىم سارايىندا ەل تاۋەلىزدىگىنىڭ 25 جىلدىعىنا ورايلاستىرىلعان اقمولا وبلىسىنىڭ الەۋمەتتىك-ەكونوميكالىق دامۋ سالاسىنداعى جەتىستىكتەر كورمەسى, سونداي-اق اقىن, دراماتۋرگ, جازۋشى قۇدايبەردى مىرزابەكتىڭ «جانىمنىڭ ماڭگى كوكتەمى» اتتى شىعارماشىلىق كەشى وتەدى.
بۇركىت نۇراسىل
