جاقىندا عالامتوردان بەلگىلى مۋزىكانت ەرنار نۇر (ەرنار نۇرتازين) ۇلى اباي اتامىزدىڭ «جەلسىز تۇندە جارىق اي» ءانىن فورتەپيانودا ءوزى ورىنداعان بەينەروليگىن كورىپ, ەرەكشە اسەرگە بولەندىم. بيىك شاتىردىڭ ۇستىندە تۇسىرىلگەن بەينەروليكتە ۇلى اقىننىڭ ءسوزى مەن سازى ۇيلەسكەن تۋىندىسىنا استانانىڭ اسپانىندا قالىقتاعان اقشا بۇلتتار تەربەلىپ تۇرعانداي بولدى.
وسى ورايدا نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسى ارتىستەرىنىڭ ەڭبەگىن ايرىقشا ايتقان ءجون. ولار كارانتين ۋاقىتىندا ءبىر كۇن دامىل تاپپاستان, حالىققا ونەرلەرىن كورسەتىپ, ءتۇرلى مازمۇندى مادەني ءىس-شارالار وتكىزدى. ءبىز ءسوز ەتىپ وتىرعان ەرنار دارىندى پيانيست قانا ەمەس, ەلوردا فيلارمونياسى سيمفونيالىق وركەسترىنىڭ باس ديريجەرى. وسى ەكى ونەردىڭ جەتەگىن قاتار ۇستاپ جۇرگەن مۋزىكانت بىرقاتار رەسپۋبليكالىق, حالىقارالىق بايقاۋلاردا توپ جارعان.
جالپى, ەكىنشى دۇنيەجۇزىلىك سوعىس تۋرالى جازىلعان مۋزىكالىق تۋىندىلار وتە كوپ. سونىڭ اراسىنان كومپوزيتور يان فرەنكەلدىڭ ايگىلى «تىرنالار» دەگەن شىعارماسىن تاڭداپ الىپ, ونى فورتەپيانودا ورىنداپ, بەينەروليك ءتۇسىردىم. بۇل ءاندى تىڭداعاندا كوز الدىڭىزعا سول ءبىر قاندى قىرعىن جىلداردىڭ قاسىرەتى كەلەدى. كەزىندە ونى يوسيف كوبزون, مۋسليم ماگوماەۆ سەكىلدى ايگىلى انشىلەر ناقىشىنا كەلتىرە ورىنداعان. بەينەروليك ءساتتى شىققانداي بولدى. ونى عالامتوردان كورگەن كورەرمەندەر جىلى قابىلداپ, تىلەكتەرىن جازىپ, جوبا تاعى جالعاسسا دەگەن ويلارىن ايتتى. ونەر ادامى رەتىندە بۇل ماعان قانات ءبىتىردى. وسىلاي جاڭا جوبانى قولعا الدىم, – دەيدى ەرنار نۇر.
قازىر ونىڭ ورىنداۋىنداعى تۇسىرىلگەن مۋزىكالىق بەينەروليكتەر ۇلكەن تانىمالدىلىققا يە. ويتكەنى ونداعى ءاربىر وينالاتىن مۋزىكالىق شىعارما مەن تۇسىرىلەتىن الاڭدار ءساتتى ۇيلەسىم تاپقان. ماسەلەن, اقىن قايرات جۇماعاليەۆتىڭ سوزىنە جازىلعان, سازگەر مارات وماروۆتىڭ «اناشىم» انىنە تۇسىرىلگەن بەينەروليكتە تابيعات پەن مۋزىكا اراسىنداعى بايلانىستى ورىنداۋشى شەبەر جەتكىزە بىلگەن. ءبىزدىڭ كەيىپكەرىمىز ءوز سوزىندە ءاربىر تۋىندىعا ەرەكشە ءمان بەرىپ, تالعامپازدىقپەن قارايتىندىعىن ايتىپ قالدى.
دارىندى مۋزىكانتتىڭ از ۋاقىتتا ونەر جولىنداعى وسىنداي جەتىستىككە جەتۋىنە, تەك تالانتى, فورتەپيانونىڭ قۇلاعىندا وينايتىن شەبەرلىگى نەمەسە ول ويناعان تۋىندىلاردىڭ تانىمالدىلىعى عانا ەمەس, وسى جوبانى بىرلەسىپ اتقارىپ جۇرگەن شاعىن توپتىڭ, ياعني وپەراتور-قويۋشى دارحان حاسەنوۆ, مۋزىكانت, دىبىس رەجيسسەرى ارمان مۇقاشەۆ جانە زايىبى نازىمنىڭ ۇلەسى زور ەكەندىگىن ايتا كەتەيىك.
قازىر دە ەرنار نۇر جاڭا جوبانى ودان ءارى دامىتىپ, تاعى ءبىر اسەم شىعارماعا بەينەروليك تۇسىرۋدە. ونى دا كوپ ۇزاماي تاماشالايمىز.
