استانانىڭ 20 جىلدىعىنا ارنالعان ەلوردانىڭ ەل ايماقتارىنداعى مادەني كۇندەرى 12 مامىر كۇنى اقتوبە وبلىسىنان باستاۋ الدى.
ءۇش كۇنگە سوزىلعان شارا شەڭبەرىندە «استانا – اقتوبە وبلىسى اراسىنداعى ايماقارالىق ىنتىماقتاستىق» اتتى بيزنەس-فورۋم ۇيىمداستىرىلىپ, وبلىس ورتالىعىندا «استانا» ساياباعىنىڭ ەستەلىك كاپسۋلاسىن سالۋ سالتاناتى ءوتتى. «استانادان اق تىلەك» اتتى ارنايى باعدارلاما اياسىندا باس قالانىڭ شىعارماشىلىق ۇجىمدارى اقتوبەلىكتەردىڭ الدىندا ونەر كورسەتتى.
استانالىق دەلەگاتسيانى اقتوبەگە قالا اكىمىنىڭ ورىنباسارى ەرمەك امانشاەۆ باستاپ بارىپ, ءوڭىردىڭ ينۆەستيتسيالىق جوبالارى كورمەسىمەن تانىستى. ىسكەرلىك ورتانىڭ, دامۋ ينستيتۋتتارى جانە مەملەكەتتىك ورگانداردىڭ وكىلدەرىمەن بىرگە بيزنەس-فورۋمعا قاتىستى. باسقوسۋ بارىسىندا كاسىپكەرلىكتى قولداۋعا باعىتتالعان ايماقتىق باعدارلامالار, ينۆەستيتسيالىق مۇمكىندىكتەر, مەملەكەتتىك-جەكەمەنشىك ارىپتەستىك جوبالارى, Smart City تۇجىرىمداماسى, ەكونوميكانى تسيفرلاندىرۋعا قاتىستى يننوۆاتسيالىق شەشىمدەر, قىزمەت كورسەتۋ سالاسىنىڭ دامۋى, بيزنەستى دامىتۋداعى تسيفرلىق ماركەتينگ ءرولى تالقىلاندى.
جيىن قورىتىندىسىندا ايماقارالىق ىنتىماقتاستىقتى دامىتۋ, وڭىرلەردىڭ باسەكەگە قابىلەتتىلىگىن ارتتىرۋ جونىندەگى كەلىسىمدەر جاسالدى. ءتيىستى كەلىسىمشارتتار استانا جانە اقتوبە وبلىستارىنىڭ اكىمدىكتەرى اراسىندا بەكىتىلدى. بۇعان قوسا, تاۋار وندىرۋشىلەر مەن وڭىرلەردى دامىتۋ ينستيتۋتتارى اراسىندا ءوزارا ىنتىماقتاستىق جونىندەگى 9 مەموراندۋمعا قول قويىلدى.
اتاپ ايتقاندا, استانا قالاسىنىڭ «شاپاعات» كوممۋنالدىق بازارىنا ازىق-تۇلىك تاۋارلارىن, ەلورداعا قۇرىلىس ماتەريالدارىن جەتكەرۋ, «سەرگەك» اتتى جول قاۋىپسىزدىگى ەرەجەلەرىن بۇزۋ وقيعالارىن فوتو جانە بەينەكامەرالار ارقىلى تىركەۋدىڭ اۆتوماتتى جۇيەسىن, سونداي-اق, كوشەلەردىڭ جارىقتاندىرىلۋىن جاساندى اقىلمەن باسقارۋعا ارنالعان Smart City جۇيەسىن اقتوبە قالاسىندا ەنگىزۋ, «ە-پيك» ەلەكتروندى جۇيەسىن اقتوبەگە ەنگىزۋ مۇمكىندىكتەرىن زەرتتەۋ, استاناعا قالپىنا كەلتىرىلگەن اۆتوكولىك شينالارىن, رەزەڭكە ونىمدەرىن جەتكىزۋ تۋرالى ىنتىماقتاستىق جاسالدى.
«استانا» ساياباعى اقتوبەدەگى «نۇر عاسىر» مەشىتى مەن ءبىر ايدان سوڭ اشىلاتىن جاڭا احاج عيماراتىنىڭ ورتاسىنداعى 4,3 گەكتار جەرگە ورنالاسادى. ساياباقتىڭ ەستەلىك كاپسۋلاسىن سالۋ سالتاناتىنا استانا قالاسى اكىمىنىڭ ورىنباسارى ەرمەك امانشاەۆ پەن اقتوبە وبلىسىنىڭ اكىمى بەردىبەك ساپارباەۆ قاتىستى.
جاڭا ساياباق زور سيمۆوليكالىق مانگە يە. بىرىنشىدەن, ونىڭ قۇرىلىسى استانانىڭ 20 جىلدىعى تويلاناتىن جىلى باستالدى. ەكىنشىدەن, «قازاق حالقىنا مىڭ العىس» ستەلاسى, قر تۇڭعىش پرەزيدەنتى ن.نازارباەۆ ساياباعى جانە «بىرلىك جانە كەلىسىم» بۋلۆارى بىرىڭعاي ساۋلەت-ساياباق كەشەنىندە ورنالاسادى. ۇشىنشىدەن, بۇل – جاقىندا «استانا» اتاۋىنا يە بولعان جاڭا اۋدانداعى العاشقى نىسان.
استانالىق ينۆەستورلاردىڭ قاتىسۋىمەن ساياباقتا ءتۇرلى باعالى سۇرىپتى اعاشتار وتىرعىزىلىپ, گۇلدەر مەن گازون سالىنىپ, بالالار الاڭدارى مەن ورىندىقتار ورناتىلادى. نىسان بولاشاقتا قازاقستان استاناسىنىڭ باستى سيمۆولدارىن بەينەلەيتىن شاعىن ساۋلەت مۇسىندەرى بار زامانۋي ساياباققا اينالادى دەپ جوسپارلانعان.
مادەني باعدارلاماعا كەلسەك, استانانىڭ تاۋەلسىزدىك سارايى اقتوبەدە ۇيىمداستىرعان «ەلباسى-ەلوردا» اتتى كورمەگە 50 سۋرەتشىنىڭ 100-دەن اسا تۋىندىسى قويىلدى. ولاردىڭ اراسىندا س.سماعۇلوۆ, م.بەكەەۆ, ر.قۇلباتىروۆ, س.اللابەرگەنوۆ, ن.قارجاسوۆ جانە وزگە دە سۋرەتشىلەردىڭ كارتينالارى بار. سونداي-اق, كورمەدە جاننا سپۋنەردىڭ جەكە كوللەكتسياسىنان الىنعان ەڭبەكتەر, استانالىق شەبەرلەردىڭ مۇسىندەرى مەن كارتينالارى, ومىربەك تىلەۋليەۆتىڭ «ەلىم-اي» سەرياسى كوپشىلىك نازارىنا ۇسىنىلدى.
ال سالتاناتتى كونتسەرتتە استانا قالاسى مەملەكەتتىك اكادەميالىق فيلارمونياسىنىڭ ۇجىمدارى – «سارىارقا» حالىق مۋزىكاسى, «شالقىما» حالىق ءبيى, ەسترادالىق بي انسامبلدەرى, قازاق وركەسترى, كلاسسيكالىق, ەسترادالىق جانە حالىق ۆوكالى ءبولىمىنىڭ سوليستەرى ونەر كورسەتتى.
تۇرسىنبەك قاباتوۆ, بەيبىت قورعان, كلارا تولەنباەۆا, رينات مالتساگوۆ, بيبىگۇل جانۇزاق, قايرات باەكەنوۆ جانە «فورمات» توبى, «ارت-دومبىرا» توبى جينالعان قاۋىمعا كوتەرىڭكى كوڭىل كۇي سىيلادى.
ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتەرلەرى تالعات تەمەنوۆ ساحنالاعان «قىزىل ورامالدى شىنارىم» جانە جاس دراماتۋرگ ولجاس جانايداروۆتىڭ «جۇت» سپەكتاكلدەرىن ۇسىندى. اشىق اسپان استىندا كونتسەرت ۇيىمداستىرىلدى.
