اقپاراتتىق تەحنولوگيالار قارىشتاپ دامىعان زاماندا كىتاپحانانىڭ ورنىن ينتەرنەت, كىتاپتى كومپيۋتەر الماستىرىپ وتىرعانى انىق. وسى ولقىلىقتىڭ ورنىن تولتىرۋ ماقساتىندا ەلوردامىزدا ەرەكشە جوبا قولعا الىندى.
قوعامدىق قورى «استانا – ءبىلىم مەكەنى» جوباسى ارقىلى رۋحاني بايلىقتىڭ قاينارىمەن سۋسىنداتاتىن ەلەكتروندى كىتاپحانا جاسادى. ەڭ قىزىعى, بۇل قۇندىلىقتاردى قالا تۇرعىندارى ايالدامالاردا اۆتوبۋس كۇتىپ تۇرىپ-اق وقي الادى.
سمارتفون ارقىلى كىتاپ وقۋ وتە قاراپايىم ءارى جەڭىل. مۇنى تەلەفونىنا ينتەرنەت قوسىلعان كەز كەلگەن ادام قولدانا الادى. ول ءۇشىن QR كودتى سكانەرلەۋگە ارنالعان ءموبيلدى قوسىمشانى پايدالانۋ كەرەك. ول R Code Reader دەپ اتالادى. وسى قوسىمشا ارقىلى وقىرمان ءوزى قالاعان كەز كەلگەن تۋىندىنى ۇيالى تەلەفونعا جۇكتەپ, قالاعان كىتابىن وقىپ, اۋديو نۇسقاسىن تىڭداي الادى. بۇگىندە قالامىز بويىنشا 27 ايالداماعا ونلاين كىتاپتار تاقتاسى ورناتىلىپ جاتىر. العاشقى قوندىرعى «حان شاتىر» ماڭىنداعى ايالدامادا تۇر. وندا كوپشىلىككە الەم جانە قازاق كلاسسيكتەرىنىڭ 150 شىعارماسى ۇسىنىلعان. الداعى ۋاقىتتا ساندىق فورماتتا 10 مىڭ كىتابى بار قوردى 150 مىڭعا جەتكىزۋ كوزدەلىپ وتىر. اسىرەسە, مەكتەپ, ەمحانا سياقتى حالىق كوپ شوعىرلاناتىن ورىندارعا قويۋدى جوسپارلاعان ەلەكتروندى كىتاپحانادا اباي قۇنانباەۆ, مۇحتار اۋەزوۆ, شاكارىم قۇدايبەردىۇلى باستاعان قازاق ادەبيەتىنىڭ كلاسسيكتەرى مەن بىرگە اقيىق اقىن مۇقاعاليدان باستالعان پوەزيا جاۋھارلارىنىڭ كىتاپتارى بار.
نارتاي ءاشىم, Wiki bilim قوعامدىق قورىنىڭ قۇرىلتايشىسى:
– ەلباسىمىز ايتقانداي, رۋحاني جاڭعىرۋدىڭ بىردەن-ءبىر نەگىزى – اقىلدى, ءبىلىمدى ادامداردىڭ قالىپتاسۋى. ەلىمىزدىڭ مادەني مۇراسى سانالاتىن وسى وقۋلىقتاردىڭ قولجەتىمدى بولۋىن قامتاماسىز ەتۋ – ءبىزدىڭ مىندەتىمىز. بۇل باستامامىز ادامداردىڭ رۋحاني دامۋىنا, جاس بۋىننىڭ قالىپتاسۋىنا اسەر ەتەدى دەپ ويلايمىز. ءبىزدىڭ نەگىزگى يدەيامىز دا – سول. الداعى ۋاقىتتا ءار كوشەنىڭ اتاۋىنا بايلانىستى تاقىرىپتىق كىتاپحانا ورناتامىز دەپ جوسپارلاپ وتىرمىز. ماسەلەن, اباي كوشەسىنە ابايدىڭ بۇكىل دۇنيەسىن, اۋەزوۆ كوشەسىنە مۇحتار اۋەزوۆتىڭ بارلىق شىعارمالارىن توپتايمىز. بۇل دا وقىرماندارىمىز ءۇشىن ەرەكشە ۇلگى بولار ەدى.
وركەنيەتتى ەلدەردىڭ دەنى بۇگىندە كىتاپ وقۋعا دەگەن ىنتا-ىقىلاستى ارتتىرۋدىڭ ءتۇرلى امالدارىن جاساۋدا. وسى تۇرعىدان العاندا دا بۇل جوبانىڭ ماڭىزى باسىم,ءباسى ارتىق. ۇيىمداستىرۋشىلاردىڭ ايتۋىنشا, قازاق ادەبيەتى مەن الەم ادەبيەتتەرىنەن تۇراتىن كىتاپ الەمىنە قازىرگى زاماننىڭ دا اقىن-جازۋشىلارىنىڭ شىعارمالارى ەنگىزىلمەك.
گۇلجان راحمان
