تارتىپكە ۇيرەتىلگەن اقىلدى يتتەر كەدەن بەكەتتەرىندە, سول سياقتى اسكەريلەرمەن جانە پوليتسەيلەرمەن بىرگە قوعامدىق ءتارتىپتى كۇزەتىپ, ارنايى قىزمەت اتقارادى.
نۇر-سۇلتان قالاسى پوليتسيا دەپارتامەنتىنىڭ كينولوگيالىق ورتالىعىنداعى وسىنداي «جاساقتىڭ» دايىندىعىن كورىپ قايتتىق. پوليتسيا پودپولكوۆنيگى ەرىك سادۋاقاسوۆ باسقاراتىن بۇل ورتالىقتاعى ءتورت اياقتىلاردىڭ ەڭ جاسى 2-دە بولسا, ەڭ ۇلكەنى – 8-دە. جالپى, يتتەر 9-10 جاسقا دەيىن قىزمەت ەتۋگە قاۋقارلى كورىنەدى. ويتكەنى كارى يتتەر كوبىرەك دەمالعىسى كەلىپ, مىندەتىن دۇرىس اتقارمايدى. سوندىقتان ولار 10 جاستان سوڭ قىزمەتتەن بوساتىلادى. كينولوگيالىق ورتالىقتاعى يتتەردىڭ كوبى – نەمىس جانە بەلگيالىق وۆچاركالاردىڭ تۇقىمدارى.
– نەمىس وۆچاركالارى كوبىنە تاپسىرمانى عانا ورىنداپ, ارتىق ءجۇرىس جاساعىسى كەلمەيدى. بوس ۋاقىتىندا قاسىڭدا تۇرا بەرەدى. ال بەلگيالىق وۆچاركالار, كەرىسىنشە, كوپ جۇرۋگە بەيىمدەلگەن. ولار نەمىس وۆچاركالارى ءبىر رەت اينالىپ وتكەن اۋماقتى ەكى رەت جۇگىرىپ شىعادى. وسى جاعى جارىلىس زاتتارىن نەمەسە ەسىرتكى سياقتى زياندى زاتتاردى ىزدەگەندە ءتيىمدى. سول سياقتى ۇزاق ۋاقىت بولاتىن شاراعا شىققاندا دا بەلگيالىق وۆچاركالاردى الىپ شىعامىز. ويتكەنى ولار كوپكە دەيىن شارشامايدى, – دەيدى ينسپەكتور-كينولوگ, پوليتسيا اعا لەيتەنانتى دامير جۇماجانوۆ.
مۇندا داميرگە تيەسىلى بەلگيالىق ەكى وۆچاركا بار. ونىڭ ءبىرى – بارون, ەكىنشىسى – سكاي-ادي. سكاي-ءاديدىڭ جاسى 3-تە. دامير ونى 7 ايىنان تاربيەلەپتى. 3 ايدان سوڭ قىزمەتتىك تاپسىرمالارعا الىپ شىعا باستاعان. ينسپەكتور-كينولوگتىڭ سكاي-اديمەن جۇرگىزگەن دايىندىق بارىسىن تاماشالادىق. پوليتسەيلەردىڭ ءتورت اياقتى سەرىگى الاڭدى جۇگىرىپ, ءتۇرلى وتكەلدەردەن سەكىرىپ, تاپسىرمانى مۇلتىكسىز ورىنداپ شىقتى.
– ءاربىر ءيتتىڭ سۇيىكتى ويىنشىعى بولادى. مىسالى, كەيبىرى كىشكەنتاي دوپتى جاقسى كورەدى, ەندى ءبىرى شۇجىق تۇرىندەگى ويىنشىقتى ۇناتادى. سونداي ويىنشىقتارعا جارىلىس زاتتاردىڭ نەمەسە ەسىرتكىنىڭ ءيىسىن مۇڭكىتىپ قويامىز دا, سول يىسكە بارىنشا ۇيرەتەمىز. سودان سوڭ جاسىرىپ قويساق, يتتەر سول ءيىس بويىنشا سۇيىكتى ويىنشىقتارىن ىزدەپ تاۋىپ الادى. قىزمەت بارىسىندا دا ولار وزدەرىن ويناپ جۇرگەندەي سەزىنەدى. ياعني ويىنشىعىن ىزدەگەندەي زياندى زاتتاردىڭ بار-جوعىن ءتىنتىپ شىعادى, – دەيدى ينسپەكتور-كينولوگ.
