بۇگىنگى تاڭدا ەلورداداعى «نۇرجول» بۋلۆارىندا 487 كولىككە ارنالعان اقىلى تۇراق جۇمىس ىستەپ تۇر. الداعى ۋاقىتتا تاعى 5 مىڭ كولىككە اقىلى تۇراق اشۋ كوزدەلىپ وتىر. جالپى باس قالادا مۇنداي اقىلى تۇراقتار سانىن 10 مىڭ ورىنعا جەتكىزۋ كوزدەلۋدە.
بۇل جوبا مەملەكەتتىك-جەكەمەنشىك ارىپتەستىك نەگىزىندە 2018 جىلدان باستاپ قولعا الىنعان بولاتىن. ول كولىك جانە جول-كولىك ينفراقۇرىلىمىن دامىتۋ باسقارماسى مەن «استانانىڭ كولىك تۇراعى كەڭىستىگى» جشس اراسىنداعى شارت اياسىندا جۇزەگە اسىرىلۋدا. جوبا 20 جىلعا ارنالعان. جوبانى قارجىلاندىرۋ جەكە كاسىپكەرلىككە جۇكتەلگەن. اتالعان جۇيەگە 1,2 ملرد تەڭگە ينۆەستيتسيا سالىنعان. بيىلدىڭ وزىندە وعان 600 ملن تەڭگەدەن استام قارجى ءبولىندى.
«مەملەكەت تەك اقىلى كولىك قوياتىن ورىندارعا جەر تەلىمدەرىن عانا بولەدى. قالعان جۇمىستاردىڭ ءبارىن جەكە كاسىپكەر اتقارادى» دەيدى باسقارما باسشىسىنىڭ ورىنباسارى ءاليحان كۋاتبەكوۆ.
«استانانىڭ كولىك تۇراعى كەڭىستىگى» جشس باسشىسى شىڭعىس دوسىباەۆ اقىلى ورىندار كولىك جۇكتەمەسى كوپ ۋچاسكەلەردە اشىلاتىنىن ەسكەرتتى.
«اقىلى كولىك ورىندارى رەسپۋبليكا – سارىارقا داڭعىلى – بوگەنباي باتىر داڭعىلى – جاعالاۋ اۋماقتارىندا اشىلادى. ەسىل اۋدانى بويىنشا: سىعاناق – سارايشىق – ماڭگىلىك ەل – تۇران داڭعىلىندا ورنالاسادى. كوندومينيۋمعا قارايتىن ۇيلەردىڭ, بيزنەس-ورتالىقتارىنىڭ جانە باسقا ينفراقۇرىلىم نىساندارىنىڭ ماڭايى تەگىن بولىپ قالا بەرەدى» دەدى ول.
ونىڭ ايتۋىنشا, اقىلى ورىنداردىڭ پاركوماتتارى ۇدايى انتيسەپتەرمەن زالالسىزداندىرىلىپ تۇرادى. دەگەنمەن, پاركوۆكاعا اقشا تولەگەندە مەديتسينالىق قولعاپتاردى كيۋ كەرەك ەكەنىن ەسكەرتتى.
دەمالىس جانە مەرەكە كۇندەرى تەگىن
اقىلى كولىك ورىندارى جۇمىس كۇندەرى ساعات 8:00 – 20:00 ارالىعىندا ىستەيدى. دەمالىس جانە مەرەكە كۇندەرى تەگىن. اقىلى ورىنداردىڭ ءبىر ساعاتى – 100 تەڭگە. اقشا كولىكتى قويعاننان كەيىن 30 مينۋت ىشىندە تولەنۋى ءتيىس.
«قازان ايىندا قولما-قول اقشاسىز ەسەپ ايىرىسۋعا ارنالعان «|زاڭدى تۇلعالارعا ارنالعان ابونەمەنتتەر» جوباسى ىسكە قوسىلدى. كورپوراتيۆتىك ابونەمەنتتەردىڭ تۇتىنۋشىلارىنا ەلەكتروندىڭ ەسەپشوت-فاكتۋراسى مەن اتقارىلعان جۇمىستاردىڭ ەلەكتروندىق اكتىلەرى بەرىلەدى. ابونەمەنت ءاۆتوموبيلدىڭ مەملەكەتتىك نومىرىنە بەكىتىلەدى. مۇنداي ابونەمەنت يەلەرى قالانىڭ بارلىق اقىلى ورىندارىنا قۇجاتتارىن كورسەتپەي-اق كولىكتەرىن قويا الادى. جۇيە تولەم تولەنگەنىن اۆتوماتتى تۇردە انىقتايدى» دەيدى شىڭعىس دوسىباەۆ.
ايىپپۇل تولەمنەن20 ەسە كوپ
نۇر-سۇلتان قالاسىندا اقىلى كولىك ورىندارى اشىلعالى 3 جىلعا تاياۋ ۋاقىت ىشىندە بيۋدجەتكە تولەنگەن تولەمدەردەن گورى ايىپپۇل كولەمى 20 ەسە كوپ تۇسكەن.
جىل باسىنان بەرى اقىلى ورىنداردىڭ تولەمىن جاساماعان 11 مىڭ زاڭ بۇزۋشىلىق انىقتالدى. ولارعا 92 ملن تەڭگە ايىپ سالىندى, بىلتىر سايكەسىنشە مەرزىمدە 23 مىڭ زاڭ بۇزۋشىلىقتار ءۇشىن كولىك يەلەرىنەن 176 ملن تەڭگە ايىپ سوماسى وندىرىلگەن ەكەن.
اقىلى كولىك ورىندارىن فوتوبەينەباقىلاۋ ورناتىلعان ارنايى ۇتقىر توپ قاداعالايدى. تولەم جاساماعاندار تۋرالى فاكتىلەر اكىمشىلىك پوليتسياسىنا جىبەرىلەدى. اقىلى ورىنداردىڭ تولەمىن جاساماعاندار ءۇشىن 3 اەك (8334 تەڭگە) بەكىتىلگەن.
قوعامدىق كەڭەستىڭ باقىلاۋىندا
جاقىندا اقىلى كولىك قوياتىن ورىنداردىڭ جۇمىسىن قالانىڭ قوعامدىق كەڭەس مۇشەلەرى دە تالقىلادى. ولار اقىلى ورىندار كولىك كوپ شوعىرلانعان تۇستارعا قويىلۋى كەرەك بولعانىمەن, جوبا وپەراتورى ونى ساياباقتاردىڭ ماڭايىنا جانە باسقا قوعامدىق كەڭىستىكتەرگە دە ورنالاستىرۋعا مۇددەلى ەكەندىگىنە نارازى.
«جەر ۋچاسكەلەرىن ساۋلەت, قالا قۇرىلىسى جانە جەر قاتىناستارى باسقارماسى بەرەتىندىگىنە قاراماستان, سول اۋماقتاعى ۆەدومستۆولار دا بۇل پروتسەدۋراعا ارالاسۋى كەرەك. ويتكەنى ەرتەڭ اقىلى كولىك ورىندارى دۇرىس ورنالاسقان با, ول سول اۋماققا قاجەت پە دەگەن ساۋالعا سىزدەر جاۋاپ بەرەسىزدەر» دەدى قالالىق قوعامدىق كەڭەستىڭ توراعاسى سانسىزباي ەسىلوۆ كولىك جانە جول-كولىك ينفراقۇرىلىمىن دامىتۋ باسقارماسىنىڭ وكىلدەرىنە قاراتا.
قوعامدىق كەڭەستىڭ الداعى ۋاقىتتا مونيتورينگتىك توپ قۇرىپ, استانانىڭ اقىلى كولىك ورىندارىن تەكسەرۋ نيەتتەرى بار ەكەنىن جەتكىزدى.
