ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى جانىنداعى «كاۋسار» مادەني-تانىمدىق بىرلەستىگى كورنەكتى اقىن, قازاقستاننىڭ ەڭبەك سىڭىرگەن قايراتكەرى, حالىقارالىق «الاش» سىيلىعىنىڭ يەگەرى عالىم جايلىبايمەن رۋحاني-پوەزيالىق كەزدەسۋ كەشىن ۇيىمداستىردى.
شارانىڭ باسىندا ستۋدەنتتەر اقىننىڭ ءار تاقىرىپتا جازىلعان شىعارمالارى مەن شەت تىلدەرىنە اۋدارىلعان ولەڭدەرىن جاتقا وقىدى. ءارى قاراي ينتەللەكتۋالدىق, تانىمدىق باعىتتا سۇراق-جاۋاپ باستالدى. اقىن زالدان قويىلعان پوەزيا, ونەر, ادەبي ۇدەرىس, اۋدارما, قوعام, قازىرگى كۇننىڭ پروبلەمالارى تۋرالى سۇراقتارعا تۇشىمدى جاۋاپ بەرىپ, اراسىندا ءتۇرلى تاقىرىپتاعى ماعىناسى تەرەڭ, سىرشىل ولەڭدەرىن وقىدى.
سونىڭ ىشىندە «كۇرشىمنىڭ قىزى» ولەڭى اعا بۋىندى دا, جاستاردى دا مولدىرلىگىمەن باۋرادى. ال رەپرەسسيا, پوليگون, كارلاگ قاسىرەتى – اقىننىڭ تاريحتى تەرەڭىنەن قوزعاعان تاقىرىبى.
كەشتى قورىتىندىلاعان اتالمىش ۋنيۆەرسيتەت رەكتورى, اكادەميك ەرلان سىدىقوۆ اقىننىڭ الماتىدان ەلورداعا قونىس اۋدارۋىنا وراي قازاق سالتىمەن ەرۋلىك رەتىندە كورسەتىلىپ جاتقان قۇرمەت ەكەنىن ايتىپ, حالىقارالىق «كۇلتەگىن» مەدالىمەن ماراپاتتادى, سىي-سياپات كورسەتتى. عالىم جايلىباي ءوز تاراپىنان جاڭا شىققان «اي تاڭبالى ارعىماق» اتتى جىر جيناعىن تارتۋ ەتتى. ستۋدەنتتەر, جاستار اقىن كىتاپتارىنا قولتاڭبا جازدىرتىپ الىپ, سۋرەتكە ءتۇستى.
بايان اسىلبەكوۆا
