«استانا» كونتسەرت زالىندا نۇر-سۇلتان قالاسى اكىمدىگىنىڭ ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ ۇيىمداستىرۋىمەن اقيىق اقىن مۇقاعالي ماقاتاەۆتى ەسكە الۋعا ارنالعان «ەسىڭە مەنى العايسىڭ» اتتى ادەبي-سازدى كەش ءوتتى. كەشكە اتالمىش ونەر ۇجىمىنىڭ كلاسسيكالىق جانە ەسترادالىق ۆوكال ءبولىمىنىڭ (كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى ارايلىم راحىمقىزى) ونەرپازدارى, «Alem» ەسترادالىق بي ءانسامبلى جانە «اينالايىن» بالالار حورى قاتىستى.
اسىل مۇراعا اينالعان اقىننىڭ ولەڭدەرى وقىلىپ, جىرلارىنا جازىلعان اندەر جاندى داۋىستا شىرقالعان كونتسەرتتە حالىق جۇرەگىنەن تەرەڭ ورىن العان شىعارمالار ۇسىنىلدى.
مۇقاعاليمەن بىرگە ەڭ العاش مايتالمان مۋزىكانت نۇرعيسا تىلەنديەۆ ءان جازا باستاعان ەدى. ەكەۋى 35 كۇن بىرگە ءجۇرىپ, 31 ءان جازدى. بۇل قاتاردا «سونبەيدى اجە, شىراعىڭ», «كەل, ەركەم, الاتاۋىڭا», «مەن سەندەردى ىزدەيمىن», «سارجايلاۋ» سىندى اندەردى اتاپ وتۋگە بولادى. اقيىق اقىننىڭ ولەڭدەرىنە ءان جازىپ, تۋىندىلارى ەلگە كەڭ تارالعان كومپوزيتورلاردىڭ اراسىندا تۇرسىنعازى راحيموۆ, گۇلنار داۋكەنوۆا, ەلەنا ابدىحالىقوۆا, دۇيسەنحان سىزدىقوۆ, تۇرسىنجان شاپاي, كەنتاۋ نازاربەك بار. مۇقاعاليدىڭ جىرلارىنا ءالى دە كوپتەگەن ءان تۋىپ جاتىر. وسى كەشكە اقىن, كومپوزيتور, قازاقستاننىڭ ەڭبەك سىڭىرگەن قايراتكەرى ەلەنا ابدىحالىقوۆا ارنايى قاتىسىپ, ءوزىنىڭ ءانىن سالدى.
بۇعان قوسا, ەلگە بەلگىلى فيلارمونيا انشىلەرى, قازاقستاننىڭ ەڭبەك سىڭىرگەن ءارتىسى مايرا ءىلياسوۆا, قازاقستاننىڭ ەڭبەك سىڭىرگەن قايراتكەرلەرى مەدەت سالىقوۆ, كلارا تولەنباەۆا, ازامات جىلتىركوزوۆ, قانات جانە سۆەتا ايتباەۆتار, گۇلنۇر ورازىمبەتوۆا, التىناي جوراباەۆا, ارايلىم راحىمقىزى, سۇندەت بايعوجين, حالىقارالىق بايقاۋلاردىڭ لاۋرەاتتارى زارينا وماروۆا, اقبوتا قۇسنادين, اكىمحان ماجەنوۆ, مۇراتبەك حايرولدا, ديانا ماي, سالتانات سەركەباەۆا, نۇربول بالاپانوۆ, پاراسات وتان, تالعات اللابيرينوۆ, ايگەرىم وراز, ايدىن جۇماباي,ساۋلەجان تاعزيا, اسەت ءالجانوۆ, مۋزىكالىق جاس كورەرمەن تەاترىنىڭ اكتريساسى جانەل ەسەنگەلدينا ونەر كورسەتتى. ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىندا اقىن, دراماتۋرگ سەرىك تۇرعىنبەكۇلىنىڭ «مۇقاعالي» پوەتيكالىق دراماسىندا باس كەيىپكەردى سومدايتىن قازاقستاننىڭ ەڭبەك سىڭىرگەن قايراتكەرى, تانىمال اكتەر جانقالدىبەك تولەنباەۆ ولەڭ وقىدى.
