استانا قالاسىندا دارىگەرلەر مەن مەدبيكەلەردىڭ بىلىكتىلىگىن شىڭدايتىن ارنايى وقۋ-كلينيكالىق ورتالىق بار. قۇرىلعان توعىز جىلدىڭ ىشىندە بۇل ورتالىق ءبىرتالاي جەتىستىكتەرگە جەتتى.
ەلوردا اكىمدىگىنىڭ قولداۋىمەن قۇرىلعان ورتالىق اقجەلەڭدىلەردى وقىتۋدا, ولاردىڭ دارىگەرلىك ماشىعىن قالىپتاستىرۋدا تاپتىرمايتىن ءادىس – سيمۋلياتسيالىق تەحنولوگيالاردى پايدالانا وتىرىپ وقىتادى. بۇل دەگەنىڭىز – اۋرۋدى جانە ونىڭ بەلگىلەرىن جاساندى تۇردە ۇيىمداستىرىپ, «ناۋقاستارعا» قانداي جولمەن, قالاي جەدەل كومەك بەرۋگە بولاتىنىن كورسەتۋ. ول ءۇشىن ارنايى مانەكەندەر مەن مۋللياجدار پايدالانىلادى. مانەكەندەردىڭ سىرتقى ءتۇر-ءپىشىنى مەن «تەرىسى» ادامعا ۇقساس جاسالعان. جانسىز بەينەلەردىڭ ىشىنە ارنايى پۋلت-پەن باسقارۋعا بولاتىن كومپيۋتەرلىك باعدارلاما ەنگىزىلگەن. دارىگەر-نۇسقاۋشى سول پۋلت ارقىلى قانداي دا ءبىر اۋرۋعا, ونىڭ بەلگىلەرىنە كلينيكالىق ستسەناري قۇرادى. مىسالى, ادامنىڭ جۇرەگى كەنەت توقتاعاندا, جۇرەك-قان تامىرلارى قىزمەتىنىڭ ءجىتى بۇزىلىستارىندا قانداي جەدەل كومەك كورسەتىلۋ كەرەكتىگى وقىتىلادى. ال ەگەر مەديتسينا قىزمەتكەرى ءبىر جەردەن ءمۇلت كەتسە, الگى مانەكەندەرگە «ءتىل ءبىتىپ», اۋىرسىنعانىن بىلدىرەدى.
بۇگىنگى تاڭدا استانا قالاسى بويىنشا شۇعىل جاعدايلاردا جەدەل مەديتسينالىق كومەك بەرۋ داعدىلارىنا وقىتۋ بويىنشا ستاندارتتالعان كۋرستارىنان مەديتسينالىق جانە مەديتسينالىق ەمەس ماماندىقتاردان 15 000-نان اسا ادام ءوتتى.
ورتالىقتاعى دارىستەر قازاق, ورىس جانە اعىلشىن تىلدەرىندە جۇرگىزىلەدى. وقىتۋ باعدارلامالارىن تۇراقتى جەتىلدىرۋ ءۇشىن بارلىق وڭىرلەرىندە جەدەل مەديتسينالىق كومەك كورسەتۋ قىزمەتىن باعالاۋ نىسانالى ينديكاتورلارى ەنگىزىلگەنىن دە اتاپ ءوتۋ قاجەت.
بيىل استانانىڭ وقۋ-كلينيكالىق ورتالىعىنىڭ باستاماسىمەن حالىقارالىق دەڭگەيدە سيمۋلياتسيالىق وقىتۋعا بايلانىستى كونفەرەنتسيا ءوتتى. جيىنعا قاتىسۋشىلار جەدەل مەديتسينالىق كومەك كورسەتۋ قىزمەتى جۇمىسىنا جاڭا تەحنولوگيالاردى ەنگىزۋ جانە مەديتسينالىق كادرلاردى دايارلاۋ تاجىريبەسىندە سيمۋلياتسيالىق تەحنولوگيالاردى قولدانۋ جايىن تالقىلاي كەلە, العاشقى مەديكو-سانيتارلىق كومەكتى ينتەگراتسيالاۋ, ەرەسەكتەر مەن بالالاردىڭ ومىرىنە قاۋىپ تونگەن كەزدەگى شۇعىل كومەكتەر جونىندە وي-پىكىرلەرىن ورتاعا سالدى. كونفەرەنتسيا اياسىندا العاش رەت جەدەل مەديتسينالىق كومەك كورسەتۋ بريگادالارىنىڭ جارىستارى وتكىزىلدى. قاتىسۋشىلار ءارتۇرلى سيتۋاتسيالىق جاعداياتتار, سونىڭ ىشىندە جاڭا تۋعان نارەستەگە جانساقتاۋ شارالارىن جاساۋ, كوپ جاراقاتتا جانە فوسفوروورگانيكالىق قوسىلىستارمەن ۋلانعاندا قانداي كومەك كورسەتۋ كەرەكتىگىن جۇرتشىلىققا كورسەتتى.
ورتالىقتىڭ تاعى ءبىر ماڭىزدى باعىتى – حالىقارالىق ىنتىماقتاستىق جانە تاجىريبە الماسۋ. بۇگىندە ورتالىق جاپونيا, اقش, يزرايل, يسپانيا, وڭتۇستىك كورەيا, فينليانديا, سينگاپۋر, ليتۆا, رەسەي, بەلورۋسسيا, تاعى باسقا كوپتەگەن بەدەلدى ورتالىقتارمەن ىنتىماقتاسا جۇمىس ىستەپ, شەبەرلىك دارىستەر, ترەنينگتەر, كۇردەلى وتا-لار, شەتەلدىك جەتەكشى پروفەسسورلاردىڭ قابىلداۋىن ۇيىمداستىرىپ كەلەدى. وسى توعىز جىل ىشىندە انا مەن بالا دەنساۋلىعىن قورعاۋ ماسەلەلەرىنە ارنالعان 100-دەن استام شەبەرلىك دارىستەرىن, ترەنينگتەر, تالىمگەرلىك باعدارلامالار وتكىزدى جانە 4 مىڭنان استام مەديتسينا قىزمەتكەرى الىس جانە جاقىن شەتەلدىڭ جەتەكشى عىلىمي ورتالىقتارى مەن كلينيكالارىندا وقىپ كەلدى. شەتەلدىك مىقتى مامانداردىڭ شەبەرلىك دارىستەرى ارقاسىندا استانادا 200-گە جۋىق وتا جاسالدى, 1 مىڭنان استام ناۋقاسقا تاجىريبەلىك, كەڭەستىك كومەك كورسەتىلدى.
بۇگىنگى كۇنى 16 مىڭنان استام مەديتسينالىق جانە مەديتسينالىق ەمەس مامانداردى وقىتىپ شىعارعان ورتالىق ەلىمىزدىڭ بارلىق وبلىستارىندا ايماقتىق بولىمشەلەر جەلىسىن قۇرىپ, 2014 جىلدان باستاپ رەسپۋبليكالىق دەڭگەيگە شىقتى.
وقۋ-كلينيكالىق ورتالىقتىڭ باستى ماقساتى – دەنساۋلىق ساقتاۋ سالاسىنىڭ دەڭگەيىن جوعارى كوتەرۋگە ۇلەس قوسىپ, تۇرعىندارعا ساپالى قىزمەت كورسەتۋ.
