كونستيتۋتسيالىق رەفورمالاردى تالقىلاۋ بويىنشا جوعارى وقۋ ورىندارىنىڭ قاۋىمداستىعى وكىلدەرى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسور-وقىتۋشىلار قۇرامىمەن كەزدەستى. باسقوسۋدا كونستيتۋتسياعا ەنگىزىلەتىن ماڭىزدى تۇيىندەر تالقىلاندى.
جيىنعا قاتىسۋشىلار رەفەرەندۋم وتكىزۋ تۋرالى ءوز ويلارىن ورتاعا سالىپ, وعان داۋىس بەرۋ قۇقىعى بار ءاربىر قازاقستاندىقتىڭ قاتىسۋىنىڭ ماڭىزىن ايىرىقشا اتاپ ءوتتى.
– كونستيتۋتسيالىق رەفەرندۋم جاي عانا ءىس-شارا ەمەس. ويتكەنى بۇل رەفورما ارقىلى ەلىمىزدىڭ بولاشاق تاعدىرى شەشىلەدى. كەلەشەكتە بولاتىن وڭ وزگەرىستەردىڭ بارلىعى وسى كونستيتۋتسيالىق رەفورمادان باستالادى. سوندىقتان وعان ءاربىر ازامات اتسالىسۋى, ءوز مەملەكەتىندە بولاتىن وڭ وزگەرىستەرگە تىكەلەي قاتىسۋى كەرەك. «مەنسىز-اق شەشىلەدى, مەنىڭ داۋىس بەرۋىمنەن نە وزگەرەدى؟» دەگەن سياقتى كەرەعار يدەيا بولماۋ كەرەك. بارلىق وتانداسىمىز يدەيادا وزگەرىس جاساپ, ەلىمىزدىڭ بولاشاعىنا نىق سەنىممەن قاراۋى ءتيىس. «جاڭا قازاقستاندا» بارلىق ماسەلەلەر بىرەر ادامنىڭ بۇيرىعىمەن ەمەس, بارلىق ازاماتتاردىڭ بەلسەنە ءۇن قوسۋىمەن شەشىلەدى. بۇل رەفورمانى جاستار دا بەلسەندى قولداپ جاتىر. سەبەبى ولار بۇل وزگەرىستەن وزدەرىنىڭ كوركەم بولاشاعىن كوز الدىنا ەلەستەتە الادى, – دەدى «تۇران-استانا» ۋنيۆەرسيتەتىنىڭ رەكتورى, نۇر-سۇلتان قالالىق ءماسليحاتىنىڭ دەپۋتاتى گۇلجامال جاپاروۆا.
– رەفەرەندۋم دەگەن, قاراپايىم سوزبەن ايتقاندا, ءار ازاماتتىڭ مەملەكەتتىڭ ماڭىزدى ماسەلەسىنە بايلانىستى ءوزىنىڭ ءۇنىن, پىكىرىن ءبىلدىرۋ. سوندىقتان دا ءبىزدىڭ ازاماتتارىمىز رەفەرەندۋمدى سايلاۋمەن شاتاستىرماۋى كەرەك. رەفەرەندۋم سايلاۋ ەمەس. سايلاۋدا بەلگىلى ءبىر ازاماتقا داۋىس بەرسەك, رەفەرەندۋمدا ءبىزدىڭ ەلدىڭ بولاشاعىنا قاتىستى وزگەرىستەر مەن تولىقتىرۋلار داۋىسقا سالىنادى. بۇل – زاڭعا سايكەس جۇرگىزىلەتىن ۇلكەن ءراسىم. ول ەرىكتى تۇردە ءار ازاماتتىڭ جەكە تالعامىمەن ورىندالاتىن جۇمىس. سوندىقتان دا مەن ءار ازامات رەفەرەندۋمنىڭ ماڭىزىن دۇرىس ءتۇسىنۋى كەرەك دەپ ويلايمىن. ەلىمىزدە ساياسي ەكونوميكالىق وزگەرىستەر بولسىن دەسەك, ونىڭ, ەڭ الدىمەن, كونستيتۋتسيالىق نەگىزى بولۋى كەرەك. ويتكەنى كونستيتۋتسيا – مەملەكەتتىڭ باستى زاڭى. ءبىز ەلدە ءىرى رەفورما جاساۋ ءۇشىن الدىمەن سول زاڭدى رەتتەپ الۋىمىز كەرەك. سوندىقتان دا ءاربىر ازامات بۇل وزگەرىستەر مەن تولىقتىرۋلاردى بولاشاعىمىز ءۇشىن كەرەك, ۇرپاعىمىز ءۇشىن كەرەك دەپ ءتۇسىنۋى قاجەت, – دەدى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قۇقىق تەورياسى مەن تاريحى, كونستيتۋتسيالىق قۇقىق كافەدراسىنىڭ پروفەسسورى, «استانا» مەديتسينا ۋنيۆەرسيتەتى مەديتسينالىق قۇقىق جانە ەتيكا كافەدراسىنىڭ پروفەسسورى جامالادەن يبراگيموۆ.
