استانادا «ارداگەرلەر ۇيىمى» رقب ورتالىق كەڭەسىنىڭ كەڭەيتىلگەن تورالقا وتىرىسى ءوتتى. جيىنعا ەلىمىزدەگى ارداگەرلەر ۇيىمدارىنىڭ باسشىلارىمەن قاتار استانا قالاسى اكىمىنىڭ ورىنباسارى ەسەت بايكەن قاتىستى.
بۇگىندە ەلوردادا 120 مىڭنان استام ەگدە جاستاعى ادامدار تۇرادى, ونىڭ ىشىندە 106 807-ءسى – زەينەت جاسىنداعىلار, 13 074-ءى – ەڭبەك ءوتىلى بويىنشا زەينەتكە شىققاندار, جەتەۋى – ۇوس ارداگەرلەرى, 1473-ءى – تىل ارداگەرلەرى. وسى ادامدارعا قالادا قانداي الەۋمەتتىك قولداۋ كورسەتىلەتىنى تۋرالى ە.بايكەن ايتىپ بەردى.
– ارداگەر قاۋىمىن الەۋمەتتىك قولداۋ جوسپارى 8 نەگىزگى باعىت بويىنشا 33 ءىس-شارانى قامتيدى, اتاپ ايتقاندا, اعا بۋىن ازاماتتاردىڭ قۇقىقتارىن ساقتاۋ, ماتەريالدىق جاعدايىن جاقسارتۋ, جۇمىسپەن كوبىرەك قامتۋ, ولارمەن بايلانىستى دەنساۋلىق ساقتاۋ جۇيەسىن جەتىلدىرۋ, الەۋمەتتىك قىزمەت كورسەتۋ دەڭگەيىن ارتتىرۋ كوزدەلەدى. سونداي-اق جوسپاردى جۇزەگە اسىرۋ اياسىندا ەمحانالاردا گەرياتريالىق جانە گەرونتولوگيالىق كابينەتتەرى اشىلدى, مۇندا ەگدە جاستاعى ادامداردىڭ دەنساۋلىعىنا جانە ءومىر ءسۇرۋ جاعدايىنا كوبىرەك كوڭىل بولىنەدى, – دەدى ە.بايكەن.
سونىمەن قاتار ول الداعى جاڭا جىلدان باستاپ ارداگەرلەر مەن زەينەتكەرلەرگە ارنالعان ساناتوريلەر سانىن كوبەيتۋ كوزدەلىپ وتىرعانىن جەتكىزدى. قالادا تۇرعىندار اراسىندا 4 اۋداندا ورنالاسقان «بەلسەندى ۇزاق ءومىر» ورتالىقتارىنىڭ جۇمىسى جوعارى باعاعا يە بولعان. بەسىنشى ورتالىقتى 2024 جىلى نۇرا اۋدانىنان اشۋ كوزدەلۋدە.
– بۇگىنگى تاڭدا «بەلسەندى ۇزاق ءومىر» ورتالىقتارىنا 8,5 مىڭ قالا تۇرعىنى تۇراقتى بارادى, ونىڭ 6318-ءى ايەلدەر بولسا, 2165-ءى – ەر ادامدار. ورتالىقتاردا 22 ءتۇرلى باعىت بويىنشا سەكتسيالار مەن ساباقتار وتكىزىلەدى. ءار ورتالىقتا ترەناجەر زالدارى, كومپيۋتەر كلاستارى, ۆوكالمەن, شىعارماشىلىقپەن اينالىساتىن زالدار بار. سونداي-اق مۇنداي مەكەمەلەردە مادەني ءىس-شارالار, ياعني پوەزيا كەشتەرى, كىتاپتار تۇساۋكەسەرى دە وتكىزىلەدى. مەملەكەتتىك جانە اعىلشىن ءتىلى كۋرستارى دا قارقىندى تۇردە جۇرگىزىلەدى. قارتتاردىڭ قىزىعۋشىلىعىنا قاراي 15 كلۋب اشىلعان. قابىلدانىپ جاتقان بارلىق شارالار اعا بۋىن ازاماتتاردىڭ بەلسەندى ءومىر سالتىن ۇيىمداستىرۋعا باعىتتالعان. مۇنداي جۇمىستار جالعاسىن تابا بەرەدى, – دەدى اكىمنىڭ ورىنباسارى.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى نازگۇل ساعىندىقوۆا تاۋەلسىزدىك جىلدارىندا بۇكىل الەمدەگى ۇردىسكە سايكەس قازاقستاندا 65 جانە ودان جوعارى جاستاعى ادامدار سانىنىڭ وسكەنى بايقالعانىن جەتكىزدى.
«وسى جىلدىڭ 1 قاراشاسىنداعى جاعداي بويىنشا زەينەتكەرلەر سانى 2 ملن 328 مىڭ ادامدى قۇرادى. قارتتارعا قۇرمەت پەن قامقورلىق كورسەتۋ قازاق حالقىنىڭ ۇلتتىق مەنتاليتەتىنىڭ ماڭىزدى بەلگىلەرىنىڭ ءبىرى بولعان جانە سولاي بولىپ قالا بەرەدى» دەدى ۆيتسە-مينيستر.
2021 جىلى اتالعان مينيسترلىكتىڭ بۇيرىعىمەن ارداگەرلەردىڭ جاعدايىن جاقسارتۋ جونىندەگى 2025 جىلعا دەيىنگى «بەلسەندى ۇزاق ءومىر» ءىس-شارالار جوسپارى بەكىتىلدى.
