كۇنى كەشەگە دەيىن وتاندىق مەديتسينانىڭ دامۋىنا ەلەۋلى ۇلەس قوسقان ارداقتى دارىگەردىڭ ءبىرى – سەرگەي وۆچيننيكوۆ. اقمولا ءوڭىرىنىڭ تۋماسى. 1972 جىلدان بەرى وڭىردەگى مەديتسينالىق احۋالدىڭ قالىپتاسۋىنا, دامۋىنا قىزمەت ەتتى. ءتۇرلى باسشىلىق قىزمەتتەردى اتقارعان سەرگەي وۆچيننيكوۆ بەينەتتىڭ زەينەتىن كورۋدە. ونىڭ شاكىرتتەرى بۇگىندە ەلوردانىڭ مەديتسينالىق قۇرىلىمدارىندا ابىرويلى ەڭبەك ەتۋدە.
بيىل ارداگەرلەر كەڭەسىنىڭ قۇرىلعانىنا – 30 جىل. وسىعان وراي, قالالىق ارداگەرلەر كەڭەسى مەن ۇلى وتان سوعىسى مۇگەدەكتەرىنە ارنالعان ورتالىق كلينيكالىق گوسپيتال ۇجىمى بىلىكتى دارىگەردى ارنايى قۇتتىقتاپ, مەرەكەلىك مەدالمەن ماراپاتتادى.
– ارداگەرلەر كەڭەسى ەڭبەگىمدى ەلەپ, قۇرمەت كورسەتتى. ريزامىن. قازاقستاننىڭ مەديتسيناسى تۋرالى ايتسام, قارىشتاپ دامىپ كەلەدى. نەبىر ورتالىقتار اشىلدى. كەزىندە ءبىزدىڭ ازاماتتار بار تاپقانىن شەتەلگە جۇمساپ, سول جاقتا ەمدەلۋگە ءماجبۇر بولاتىن. قازىر تەگىن ءارى ساپالى قىزمەت كورسەتەدى. عۇمىرىمدا ەشقاشان شەتەلدە ەمدەلىپ كورمەدىم. قازىر وسىندا بىلىكتى دارىگەرلەرگە كورىنەمىن. قوناقۇيدەن كەم ەمەس ۇلتتىق ورتالىقتاردى كورگەندە, ەلىمىزدىڭ ءالى دە بيىكتەردەن كورىنەتىنىنە سەنەمىن. مىندەتتى مەديتسينالىق ساقتاندىرۋ جوباسىن جۇزەگە اسىرۋدا وسى سالانىڭ جىلىگىن شاعىپ, مايىن ىشكەن, شىن جانى اشيتىن مامانداردىڭ باسىندا بولعانىن قالايمىن. ەگەر جەمقورلىق بولماسا, حالىقتىڭ يگىلىگىنە ابدەن اينالدىرۋعا بولادى, – دەيدى سەرگەي وۆچيننيكوۆ. زەينەتتەگى دارىگەر ءحالىن سۇراپ كەلگەن ازاماتتارعا ارنايى العىسىن ايتىپ, جۇمىستارىنا ساتتىلىك تىلەدى.
