ايدا بايماقوۆا, «جاۋجۇرەك پولك» كەڭەسىنىڭ كوورديناتورى:
– 9 مامىر كۇنى استانادا «جاۋجۇرەك پولك» شەرۋىن ۇيىمداستىرىپ جاتىر ەكەنسىزدەر. وسى شارانىڭ ماقسات-مىندەتتەرى تۋرالى
ايتىپ بەرسەڭىز…
– استانا قالاسى ىشكى ساياسات باسقارماسىنىڭ قولداۋىمەن ەلوردامىزدا ەكىنشى دۇنيەجۇزىلىك سوعىس ارداگەرلەرى ۇرپاقتارىنىڭ قاتىسۋىمەن «جاۋجۇرەك پولك استانا – الەمدىك مارش» اتتى شەرۋ وتەدى. «جاۋجۇرەك پولك» جالپىحالىقتىق ازاماتتىق باستاماسى 2012 جىلى قۇرىلعان بولاتىن. قوزعالىستىڭ نەگىزگى ماقساتى – مايداندا سوعىسقان ارداگەرلەردىڭ ەرلىگىن ەستەن شىعارماي, جاس ۇرپاققا ناسيحاتتاۋ. ال استانا قالاسىنداعى «جاۋجۇرەك پولك» كەڭەسى 2014 جىلى قۇرىلعان بولاتىن. ونىڭ قۇرامىنا ەرىكتىلەردەن باستاپ, ارداگەرلەرگە قۇرمەت كورسەتۋگە قۇشتار ەلىمىزدىڭ ءاربىر بەلسەندى ازاماتتارى مۇشە بولا الادى. ماسەلەن, 2015 جىلى استانا قالاسىندا وتكەن جەڭىستىڭ 70 جىلدىعىنا ارنالعان شەرۋگە 1500 ادام قاتىسقان بولاتىن. ال 2016 جىلى ەلورداداعى «جاۋجۇرەك پولكىنە»
7 مىڭنان اسا ادام قاتىستى. پولكتىڭ جۇمىسى ارنايى جارعىمەن رەتتەلگەن.
– جارعى دەمەكشى, بۇل شاراعا كەز كەلگەن ادام قاتىسا الا ما؟
– ارينە, «جاۋجۇرەك پولك» شەرۋىنە كەز كەلگەن ادام قاتىسا الادى. شەرۋگە قاتىسۋ ءۇشىن الدىن الا تىركەلۋ نەمەسە كىرۋ بيلەتتەرى كەرەك ەمەس. الايدا «جاۋجۇرەك پولك» مارشىنا قاتىسۋشىلارعا شەرۋ الاڭىن جارناما رەتىندە پايدالانۋعا جانە ترانسپارانتتاردا كەز كەلگەن ساياسي, كورپوراتيۆتىك نە باسقا دا سيمۆولداردى جاريالاۋعا تىيىم سالىنادى. شاراعا قاتىسۋشىلاردىڭ نازارىنا: ترانسپارانتتار ءۇشىن بىردەي ستاندارتتار دايىندالدى. ماسەلەن, جاۋىنگەردىڭ سۋرەتى قويىلعان نەمەسە اتى-ءجونى جازىلعان ترانسپارانتتا قازاقستاندىق جەڭىس لەنتاسى, وتان سوعىسىنىڭ وردەنى, قازاق جانە ورىس تىلىندە «جاۋجۇرەك پولك استانا» دەگەن جازۋدان, پولكتىڭ لوگوتيپىنەن باسقا سيمۆول بولماۋى كەرەك. ەگەر دە مايدانگەردىڭ سۋرەتى بولماسا, اتى-ءجونى, قىزمەتتىك لاۋازىمى جازىلعان پلاكات جاساۋعا بولادى.
– شەرۋ قاي جەردەن باستالىپ, قاي جەردەن اياقتالادى؟
– شەرۋ «قازاق ەلى» مونۋمەنتىنەن باستالىپ, «وتان قورعاۋشىلار» مەموريالىندا اياقتالادى. بيىل «جاۋجۇرەك پولك» مارشىنىڭ جولى 2,5 شاقىرىمدى قۇرايدى, جالپى ءجۇرىپ وتەتىن جول 3,6 شاقىرىم بولادى. «قازاق ەلى» مونۋمەنتىنىڭ جانىندا ساعات 12.00-دە جينالىپ, ساعات 13.00-دە شەرۋ باستالادى. مارشرۋتتىڭ ۇزىندىعى 3,6 كم بولعاندىقتان, شەرۋ وتەتىن كۇنى بارلىق قاتىسۋشىلارعا اۋا رايىن ەسكەرە وتىرىپ, قولايلى اياق كيىم كيۋگە جانە الدىن الا گۇل مەن سۋ الۋعا كەڭەس بەرەمىز.
سەرىك جولداسباي
