نۇر-سۇلتان قالاسى ءماسليحاتىنىڭ دەپۋتاتتارى ارداگەرلەرگە ارنالعان بەلسەندى ۇزاق ءومىر ءسۇرۋ ورتالىعىندا بولىپ, سىيلىقتار تابىس ەتتى.
دەپۋتاتتار قارت ادامدارعا ۇستەل ويىندارى جانە باسقا دا كوپتەگەن زاتتاردى سىيلىق رەتىندە ۇسىندى. قارتتار ورتالىق سپورت زالدارىندا تەگىن جاتتىعا الادى, ۇستەل ويىندارى, كومپيۋتەرمەن جۇمىس جاساپ, گيمناستيكا نەمەسە يوگامەن اينالىسادى. شەت تىلدەرىن بەلسەندى ۇيرەنۋدە.
«ورتالىققا كەلۋشىلەر بۇل جەردىڭ وزدەرىنە ۇنايتىنىن, بىراق ورىن جەتكىلىكسىز ەكەنىن, كوپشىلىگى قالانىڭ ءار تۇكپىرىنەن وسىندا كەلۋگە ءماجبۇر ەكەنىن اتاپ ءوتتى. مۇنداي ورتالىقتاردىڭ جاقىن ارادا ەلوردانىڭ ءار ءتورت اۋدانىندا اشىلاتىنىن ايتتىم. مۇندا دا ۇلكەن ءۇي-جايلار قاراستىرىلىپ, اركىم تۇرعىلىقتى جەرىنە بارۋعا مۇمكىندىك الادى. سولاردىڭ ءبىرى «كوكتال» تۇرعىن الابىنداعى ساۋىقتىرۋ كەشەنىندە ءوز جۇمىسىن باستاپ تا كەتتى» دەدى نۇر-سۇلتان قالاسى ءماسليحاتىنىڭ حاتشىسى ەرلان كاناليموۆ.
