حالقىمىزدىڭ باسىنان ءتۇرلى زوبالاڭدار ءوتتى. كەشەگى وتكەن عاسىردىڭ وتىزىنشى جىلدارداعى قۋعىن-سۇرگىن تالاي ارىستارىمىزدى جالمادى. بۇل اۋىرتپالىق ءبىزدىڭ اۋلەتتى دە اينالىپ وتپەدى.
ول زاماندا ءبىزدىڭ تايتوبە ءبىلىم ورداسى اقمولا اۋدانىنداعى جالعىز مەكتەپ-ينتەرنات بولدى. سول مەكتەپتە تولەۋبەك اعام مەنەن ەكى سىنىپ جوعارى وقىدى. دومبىرامەن ءان ايتاتىن ونەرى بار ەدى. قوعامدىق جۇمىستارعا دا بەلسەنە ارالاساتىن. ونىڭ اكەسى حاكىم احمەتجانوۆ ەلگە بەلگىلى ازامات بولعان. وعان وتىز جەتىنشى جىلدارى «بايدىڭ تۋىسى, ساكەن سەيفۋلليننىڭ جينالىسىنا بارىپتى» دەگەن جالا جابىلىپ, تۇرمەگە قامالادى. ول كەز – داۋىلپاز اقىن ساكەننىڭ ۇستالعان شاعى.
تولەۋبەك اعامىز 1937 جىلى ەڭبەكشى اۋىلىندا ومىرگە كەلگەن. سول جەردە حاكىم اكەمىز ۇستازدىق قىزمەت اتقارعان. كەيىن ول ۇستالىپ كەتكەننەن كەيىن بارلىق جاقىندارى اقمولاعا كوشىپ كەلدى. اكەمىزدىڭ پويىزدا ايدالىپ بارا جاتقاندا جازعان حاتى ءبىر جارىم جىل ءجۇرىپ زورعا قولعا تيەدى. ول 1940 جىل ەدى. وندا: «مۇز دارياسىنا قاراي بەتتەپ بارامىز. ورنالاسقان سوڭ حابارلاسامىن» دەپ جازىپتى. بىراق سودان كەيىن ەش حابار بولمادى. 1953 جىلى ساكەن سەيفۋللين سەكىلدى قايراتكەرلەر اقتالعاندا دا, جاقسى جاڭالىق ەستىلمەدى. حاكىم اكەمىزدىڭ اناسى التىن اجەمىز بالاسىن ولدىگە ساناماي, كوزى ءتىرى دەپ دۇنيەدەن وزدى. كەيىن اسىل ازاماتتىڭ جارى ءابي انامىز قىزدارىن تۇرمىسقا ۇزاتتى. تەك ۇلىنىڭ شاڭىراق كوتەرگەن قىزىعىن كورە المادى.
تولەۋبەك اعام تايتوبەدەگى
ون جىلدىق مەكتەپتى ءبىتىرىپ, الماتىداعى اۋىلشارۋاشىلىق ينستيتۋتىنا وقۋعا تۇسەدى. ونى ويداعىداي تامامداعاننان كەيىن قازىرگى تسەلينوگراد اۋدانىنىڭ ورتالىعى, بۇرىنعى اقمولا سوۆحوزىنا جۇمىسقا ورنالاسادى. ودان كەيىن استراحان اۋدانىندا ەڭبەك ەتەدى. 1970 جىلدارى اقمولاداعى اۋىلشارۋاشىلىق ەكونوميكاسىن جوسپارلاۋ عىلىمي-زەرتتەۋ ينستيتۋتىنا قىزمەتكە ورنالاسادى. عىلىم جولىنا تۇسەدى. ەكونوميكا سالاسىنان كانديداتتىق ديسسەرتاتسيا قورعايدى. سودان سوڭ ۇزاق جىلدار ۇستازدىق جولدى ماقسات تۇتىپ, س.سەيفۋللين اتىنداعى اگروتەحنيكالىق ۋنيۆەرسيتەتىندە ستۋدەنتتەرگە ءدارىس وقيدى.
بيىل تولەۋبەك حاكىمۇلى كوزى ءتىرى بولسا, سەكسەنگە تولار ەدى. امال نە, «جازمىشتان وزمىش جوق» دەگەن. ايتەۋىر, اكەسىنىڭ ءومىر جولىن جالعاپ, ەلدىڭ ارداقتى ازاماتى بولدى. كوڭىلگە سول جۇبانىش!
راۋشان ءجۇنىس,
زەينەتكەر
