نۇر-سۇلتان قالاسى مەملەكەتتىك ارحيۆىندە جەكە تەكتىك قۇجاتتاردى تولىقتىرۋ بويىنشا ۇلكەن جۇمىستار اتقارىلۋدا. ءارحيۆتى تولىقتىرۋ كوزدەرى بولىپ تابىلاتىن ازاماتتار تىزىمىنە بارلىعى 96 قور قۇرۋشى ەنگىزىلدى. بۇل – ۇلى وتان سوعىسىنىڭ ارداگەرلەرى, مادەنيەت جانە ونەر قىزمەتكەرلەرى, جۋرناليستەر, جازۋشىلار, عىلىم قايراتكەرلەرى جانە ەلوردانىڭ دامۋىنا ەلەۋلى ۇلەس قوسقان وزگە دە تانىمال تۇلعالار.
ارحيۆتە جازۋشى, ولكەتانۋشى اندرەي دۋبيتسكي, قازاقستان مەن تاتارستاننىڭ حالىق ءارتىسى نۇرجامال ۇسەنباەۆا, كورنەكتى قوعام جانە مەملەكەت قايراتكەرلەرى سماعۇل سادۋاقاسوۆ پەن جۇمابەك تاشەنەۆ, جازۋشى, ساتيريك, تاريح زەرتتەۋشى تابىل قۇلىياس, تاريحشى-عالىم زيابەك قابىلدينوۆ, ۇلى وتان سوعىسىنىڭ ارداگەرى, «اكمولينسكايا پراۆدا» گازەتىنىڭ ءفوتوتىلشىسى نۇرمۇحامەد يماموۆ, اقىن, جازۋشى نۇرعوجا وراز, «مەموريالدىق ايماق» ىزدەستىرۋ جاساعىنىڭ كومانديرى مايدان قۇسايىنوۆ سىندى ەلگە بەلگىلى ازاماتتاردىڭ جەكە تەكتىك قورلارى ساقتاۋلى.
كەيىنگى جىلدارى قالالىق ارحيۆ جەكە تەكتىك قورلارىن قۇرۋعا ەلوردا مەن ەلدىڭ دامۋىنا ۇلەس قوسقان كورنەكتى سپورتشىلاردى, مۋزىكانتتاردى, سۋرەتشىلەردى تارتا باستادى. وسىلايشا «قازاقستان چەمپيوندارى» ارحيۆتىك توپتاماسى قۇرىلدى. وعان وليمپيادا جانە ەكى دۇركىن الەم چەمپيونى سەرىك ساپيەۆتىڭ, «بارىس» حوككەي كلۋبىنىڭ قۇجاتتارى ەنگىزىلدى.
«مادەني مۇرا» ارحيۆتىك توپتاماسىن اقىن, جىرشى بايانعالي ءالىمجانوۆ تولىقتىردى. 2020 جىلى قازاقستاننىڭ حالىق قاھارمانى, گەنەرال-مايور ايدىن ايىمبەتوۆتىڭ جەكە تەكتى قورى اشىلدى.
تۇڭعىش پرەزيدەنت – ەلباسى نۇرسۇلتان نازارباەۆ «ۇلى دالانىڭ جەتى قىرى» باعدارلامالىق ماقالاسىندا ارحيۆتەردى دامىتۋ قاجەتتىگىنە جەكە توقتالىپ, «ارحيۆ-2025» باعدارلاماسىن ازىرلەۋگە تاپسىرما بەرگەنى بەلگىلى.
وسى باعدارلامالاردى ىسكە اسىرۋ ماقساتىندا نۇر-سۇلتان قالاسىنىڭ تىلدەردى دامىتۋ جانە ارحيۆ ءىسى باسقارماسى, نۇر-سۇلتان قالاسىنىڭ مەملەكەتتىك ءارحيۆى 2019-2021 جىلدارعا ارنالعان ءارحيۆتى دامىتۋ ستراتەگياسىن ازىرلەدى. ەكى جىل ىشىندە نەگىزگى مىندەتتەردى شەشۋدە ايتارلىقتاي تابىستارعا جەتتى.
ارحيۆ قويماسىن ءداستۇرلى اقپارات تاسىعىشتاردى (قاعاز قۇجاتتار, فوتوسۋرەتتەر جانە ت. ب.) ساقتاۋعا ارنالعان زاماناۋي جابدىقتارمەن قامتاماسىز ەتتى. ارحيۆتىك سورەلەردىڭ جالپى ۇزىندىعى 7584 شارشى مەتردى قۇرايدى.
قۇجاتتاردىڭ جوعالۋىن جانە ولاردى رۇقساتسىز پايدالانۋدى بولدىرماۋ ءۇشىن بيىل ارحيۆ قويمالارى ىشىندە راديوجيىلىك تاڭبالارىنىڭ كومەگىمەن قۇجاتتاردى قاۋىپسىز ساقتاۋ جانە قۇجاتتاردىڭ قوزعالىسىن باقىلاۋ جۇيەسى (RFID-جۇيە) ەنگىزىلدى. اسا قۇندى قۇجاتتاردىڭ ساقتاندىرۋ قورىن قۇرۋ بويىنشا جۇمىس باستالدى. ساقتاندىرۋ قورى – 9006 ساقتاۋ بىرلىگى, 1232017 بەت ميكروفوتوپلەنكا.
ارحيۆ بازاسىندا توزعان اسا قۇندى قۇجاتتاردى قالپىنا كەلتىرۋ بويىنشا تولىققاندى زەرتحانا جۇمىس ىستەيدى. قازىرگى ۋاقىتتا ءارحيۆتىڭ بالانسىندا 5 جىلجىمايتىن مۇلىك نىسانى بار. سونىڭ ىشىندە 4 عيمارات – ارحيۆ قويمالارى. قويمالاردىڭ جالپى اۋدانى – 1236,9 ش. م.
ارحيۆ عيماراتتارى ءبىرىنىڭ بازاسىندا (كوپەس ۆ.كۋبريننىڭ ءۇيى) تۇراقتى تاريحي-ولكەتانۋ ەكسپوزيتسياسىن قۇرۋ تۋرالى شەشىم قابىلداندى. قازىرگى ۋاقىتتا ءارحيۆتىڭ بالانسىنا ءارتۇرلى كەزەڭدەردە قالا ءومىرىن كورسەتەتىن 16747 ەكسپونات پەن ارتەفاكت بەرىلدى. بۇل كوللەكتسيالاردى وسى ەكسپوزيتسيانى قۇرۋعا ۇلەس قوسقىسى كەلەتىن ەلوردانىڭ بەلسەندى تۇرعىندارى تولىقتىرۋدا.
ارحيۆ زاماناۋي 3D سكانەردىڭ كومەگىمەن بارلىق ەكسپوناتتاردىڭ تولىق 3D كوشىرمەلەرى ورنالاستىرىلاتىن ۆيرتۋالدى ەكسپوزيتسيانى قۇرۋ بويىنشا جۇمىستى باستادى. 2018-2021 جىلدار ارالىعىندا 500-دەن استام كورمە, ەكسكۋرسيا, ءدارىس, كونفەرەنتسيا, سەمينار جانە ت. ب. وتكىزىلدى جانە جۇزەگە اسىرىلدى. ارحيۆ گەنەولوگيالىق ىزدەۋ جوباسىن ءساتتى جۇزەگە اسىرۋدا. 2019-2021 جىلدارى ارحيۆكە گەنەولوگيالىق سيپاتتاعى 66 سۇرانىم كەلىپ ءتۇستى.
