ارىپتەستەر مەرەيى
تاۋەلسىزدىك كۇنى قارساڭىندا مەملەكەت باسشىسىنىڭ جارلىعىمەن «استانا اقشامى» گازەتىنىڭ باس رەداكتورىنىڭ ورىنباسارى, اۋعان سوعىسىنىڭ ارداگەرى عالىم قوجابەكوۆ «قۇرمەت» وردەنىمەن, ال «Elorda Aqparat» جشس ديرەكتورى قايسار جۇمابايۇلى قازاقستان رەسپۋبليكاسى پرەزيدەنتىنىڭ قۇرمەت گراموتاسىمەن ماراپاتتالدى.
ارىپتەسىمىز قايسار جۇمابايۇلىنا قۇرمەت گراموتاسى مەملەكەتتىك جانە قوعامدىق قىزمەتتە سىڭىرگەن ەڭبەگى ءۇشىن بەرىلدى.
«قۇرمەت» وردەنىن ارىپتەسىمىزگە پارلامەنت ءماجىلىسىنىڭ دەپۋتاتى, «قازاقستان ارداگەرلەرى» قاۋىمداستىعىنىڭ توراعاسى باقىتبەك سماعۇل تاپسىردى. «بۇگىنگى وردەنگە يە بولعانداردىڭ بارلىعى – ماراپات ءۇشىن ەمەس, پاراسات ءۇشىن قىزمەت ەتكەندەر, اۋعانستاندا شەن ءۇشىن ەمەس, ەل ءۇشىن كۇرەسكەندەر. وتانعا قىزمەت ەتۋدى وزىنە پارىز ساناعان ازاماتتارعا قۇتتى بولسىن دەمەكپىن. اسىرەسە, «استانا اقشامى» گازەتىنىڭ ىرگەسىندە قانشاما جىل تالماي ەڭبەك ەتىپ كەلە جاتقان عالىم قوسىمجانۇلى كوپشىلىككە ۇلگى. بۇل بەلگى ەل دەپ, جەر دەپ سوققان جۇرەگىن جىلىتىپ ءجۇرسىن, جاقسى جاڭالىقتى حالىققا تاراتا بەرسىن. قاجىرلى ەڭبەگىنە جەمىس تىلەيمىز!» دەدى دەپۋتات.
گۇلدانا تالعاتقىزى