«ەكسپو-2017» حالىقارالىق كورمەسى اياسىندا ۇيىمداستىرىلعان ايشىقتى شارانىڭ ءبىرى «كاسىپقوي بوكس كەشى» بولعانى ءسوزسىز. «سارىارقا» ۆەلوترەك سارايىندا قانات يسلام باستاعان قازاق جىگىتتەرى قارسىلاس شاق كەلتىرمەي, توعىز جەكپە-جەكتىڭ بارىندە جەڭىسكە جەتتى.
قر مادەنيەت جانە سپورت مينيسترلىگىنىڭ باستاماسىمەن وتكەن بوكس كەشىنە استانا قالاسىنىڭ اكىمدىگى, «استانا ەكسپو-2017» ۇك, «سامۇرىق-قازىنا» ۇلتتىق ءال-اۋقات قورى جانە باسقا دا بىرقاتار كومپانيالار قولداۋ كورسەتتى. بۇل كەشتەگى ەڭ باستى جەكپە-جەك ورتا سالماقتاعى WBA Inter-Continental جانە WBO NABO نۇسقالارى بويىنشا چەمپيوندىق اتاق ءۇشىن ءوتتى.
باستى جەكپە-جەك الدىندا كاسىپقوي بوكستا تانىلا باستاعان قازاق جىگىتتەرىنىڭ قاتىسۋىمەن سەگىز ايقاستى كوردىك. شارشى الاڭعا الدىمەن كوتەرىلگەن استانالىق مەيىرىم نۇرسۇلتانوۆ وسى كەشتى تاماشالاۋعا جينالعان جانكۇيەر قاۋىمدى ەرەكشە قۋانتتى. ول كاسىپقوي رينگتە 21 كەزدەسۋ وتكىزىپ, ونىڭ 15-ىندە جەڭىسكە جەتكەن برازيليالىق يسمايل بۋەنومەن قولعاپ تۇيىستىرگەن ەدى. الايدا ءبىزدىڭ مەيىرىم قارسىلاسىن ءبىرىنشى راۋندتا-اق اۋىر سوققىنىڭ استىنا الىپ, شارشى الاڭنىڭ سىرتىنان ءبىر-اق شىعاردى.
وسىدان كەيىن قالىڭ جانكۇيەردىڭ قىزۋ قولداۋىنا يە بولعان قازاق جىگىتتەرى بىرىنەن سوڭ ءبىرى قارسىلاستارىن جەڭە بەردى. تەك «نيۋ-يورك» پوليتسەيى اتانىپ كەتكەن ديماش نيازوۆ, «قازاق بالاسى» – جانقوش تۇراروۆ جانە اۋەسقوي بوكستان الەم چەمپيونى اتانعان جانىبەك ءالىمحانوۆ ءوز قارسىلاستارىن ۇپاي سانىمەن ۇتتى.
ال اۋىر سالماقتاعى رۋسلان مىرساتاەۆ ارگەنتينالىق اندرەاس ماتيەستى جەكپە-جەك سوڭىنا دەيىن شىداتپاي, ايقىن باسىمدىلىقپەن جەڭدى. سونداي-اق, نۇرسۇلتان جاڭاباەۆ پەن ايدوس ەربوسىنۇلى ءوز قارسىلاستارىن نوكاۋتپەن تىزە بۇكتىردى.وسىلايشا, ارلانداي, تارلانداي دەپ ۇكىلەگەن جىگىتتەرىمىزدىڭ ءبارى ءۇمىتتى اقتادى.
ال بوكس كەشىنىڭ باستى جەكپە-جەگىنە شىققان قانات يسلام مەن كانادالىق برەندون كۋك شارشى الاڭعا كوتەرىلگەندە, بارشا كورەرمەن ورنىنان تۇرىپ قوشەمەت ءبىلدىردى. ەكى نۇسقا بويىنشا الەم چەمپيونى اتاعى باسكە تىگىلگەن رەسمي جەكپە-جەك بولعاندىقتان, الدىمەن كانادا جانە قازاقستان ءانۇراندارى شىرقالدى.
وسىعان دەيىن كاسىپقوي بوكستا 18 جەكپە-جەك وتكىزىپ, سونىڭ بارىندە جەڭىمپاز اتانعان كۋك, شىنىمەن, وڭاي قارسىلاس بولماي شىقتى. ارا-تۇرا العا ۇمتىلىپ, قاناتقا كادىمگىدەي قارسىلىق كورسەتە باستادى. ال ءبىزدىڭ «QAZAQ» بولسا ءوزىنىڭ ايلا-تاسىلىنەن اينىماي, ءبىرىنشى كەزەكتە برەندوننىڭ بۇيرەك-باۋىرىنان نوپىرلەتە سوعىپ, قارسىلاسىنىڭ تىنىسىن تارىلتا ءتۇستى.
بۇل تاكتيكانىڭ ناتيجەسى ءۇشىنشى راۋندتا كورىندى. قاناتتىڭ كەزەكتى اۋىر سوققىسىنان كەيىن برەندون بۇگىلىپ قالدى. بۇل – ءبىرىنشى نوكداۋن! قاناتتىڭ وسى ساتتە-اق جەكپە-جەكتىڭ تاعدىرىن شەشىپ تاستايتىن مۇمكىندىگى بار ەدى.
الايدا كۋكتى گونگ قۇتقارىپ قالدى. ءسويتىپ, ۇزىلىستە ەسىن جيناپ العان كانادالىق بوكسشى جانكەشتىلىگىن دالەلدەي بەردى. بەسىنشى راۋندتا «بۇزىق بالا» لاقاپ اتىن جامىلعان كۋك تاعى دا قاناتتىڭ اۋىر سوققىلارىنا تاپ بولىپ, شارشى الاڭنىڭ ارقانىنا شىرمالىپ, تىزەرلەپ وتىرا قالدى. تورەشى ەسەپ اشتى. ەكىنشى نوكداۋن! سەگىزىنشى راۋندتا برەندون تاعى دا قۇلادى. ءۇشىنشى نوكداۋن! ال توعىزىنشى راۋندتا قارسىلاسىنىڭ ابدەن تيتىقتاپ السىرەگەنىن سەزگەن قانات «ماسەلەنى» شەشۋگە كىرىستى. ماڭدايدان, تۇمسىقتان جانە شىقشىتتان بىرنەشە سوققىسىن قاتار دارىتقانى سول ەدى, كۋك تەڭسەلىپ كەتتى.
قانات تاعى ءبىر سوعۋعا ۇمتىلعاندا, تورەشى اراشا ءتۇستى. ەكى قولىن ايقاستىرا كوتەرىپ, جەكپە-جەكتى توقتاتاتىنىن ءبىلدىردى. ويتپەگەندە كۋك سىلەيىپ قاتاتىنداي ەدى. وسىلايشا, قانات يسلام تەحنيكالىق نوكاۋتپەن جەڭىسكە جەتتى. بۇل – قازاق بوكسشىسىنىڭ كاسىپقوي رينگتەگى 25-جەڭىسى, 20-نوكاۋتى.
سونىمەن, WBA Inter-Continental جانە WBO NABO تۇجىرىمدارى بويىنشا الەم چەمپيونى اتاعىنا يە بولعان قانات يسلامنىڭ ءبىرىنشى ورتا سالماقتاعى رەيتينگى 25-ورىننان 12-ورىنعا كوتەرىلدى. دەمەك, كاسىپقوي بوكستا ەل نامىسىن ابىرويمەن قورعاپ جۇرگەن قازاقستاندىق بىلعارى قولعاپ شەبەرىنىڭ ەندىگى قارسىلاستارى وڭاي شاعىلاتىن جاڭعاق بولمايتىنى ءسوزسىز.
عالىم قوجابەكوۆ
