28 قاراشا كۇنى مادەنيەت جانە اقپارات مينيسترلىگى, وقۋ-اعارتۋ مينيسترلىگى جانە استانا قالاسى اكىمدىگىنىڭ قولداۋىمەن روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمى ەرەكشە قاجەتتىلىكتەرى بار دارىندى بالالار مەن جاستارعا ارنالعان «ارمان اسۋلارى» اتتى ءىى رەسپۋبليكالىق فەستيۆالىنىڭ گالا-كونتسەرتىن وتكىزەدى.
گالا-كونتسەرتتە فەستيۆالگە قاتىسۋشىلار ايجان نۇرماعامبەتوۆا, سالتانات احمەتوۆا, نۇربولات ارزاماس, پەريزات تۇراروۆا, باۋىرجان بەكمۇحانبەتوۆ, ازات مالىك, ەربول ناريمانۇلى, رايم ۋايس, ءاليحان دۇيسەنباي, گۇلنار كوشەنوۆا, ءادىلحان ماكين جانە «مەلومەن» توبى سىندى تانىمال ارتىستەرىمەن بىرگە ونەر كورسەتەدى. فەستيۆالدىڭ ارنايى قوناقتارى – التىنشاش مۇقاتاەۆا جانە ايبىن جۇمابەكوۆ.
بەلگىلى رەجيسسەر ءارى ستسەناريست, «St.Art» الەۋمەتتىك-مادەني قورىنىڭ جەتەكشىسى ستانيسلاۆ تسيح جانە «جۇلدىزاي» حالىقارالىق فەستيۆالىنىڭ جەتەكشىسى الماگۇل سالىمباەۆا فەستيۆالگە قاتىسۋشىلار مەن قوناقتارعا ارنايى شەبەرلىك ساباعىن وتكىزەدى.
فەستيۆالگە قاتىسۋشىلار – ەلىمىزدىڭ تۇكپىر-تۇكپىرىنەن, اتاپ ايتساق, اتىراۋ, اقمولا, شىمكەنت, استانا, قاراعاندى, پاۆلودار, قوستاناي, شىعىس قازاقستان, باتىس قازاقستان, قىزىلوردا, ۇلىتاۋ جانە جەتىسۋ وبلىستارىنان كەلەتىن رەسپۋبليكالىق, وبلىستىق بالالار بايقاۋلارى مەن ونەر فەستيۆالدەرىنەن وق بويى وزا شاپقان تالانتتى ونەرپازدار. بيىلعى فەستيۆالگە تەك ەرەكشە قاجەتتىلىگى بار بالالار عانا ەمەس, 35 جاسقا دەيىنگى ونەرلى جاستار قاتىسۋعا مۇمكىندىك الدى.
