ارمان مىرزاعاليەۆ: باتىرحان ەشكىمدى تابىندىرۋعا تىرىسپادى

14 قاراشا كۇنى بەيبىتشىلىك جانە كەلىسىم سارايىندا باتىرحان شۇكەنوۆتىڭ رۋحىنا ارنالعان «ارتىسكە, مۋزىكانتقا, دوسقا» اتتى كونتسەرت وتەدى. ءبىز كونتسەرتتىڭ ەلوردادا وتۋىنە مۇرىندىق بولىپ وتىرعان بەلگىلى سكريپكاشى ارمان مىرزاعاليەۆكە حابارلاسىپ, الدا وتەر شارا تۋرالى از-كەم تىلدەسكەن ەدىك.        

– استانادا باتىرحان شۇكەنوۆ­تىڭ رۋحىنا ارنالعان كونتسەرتتى ۇيىمداستىرۋعا ءسىزدى نە يتەرمەلەدى؟
– ادام ءفاني-جالعانمەن قوش ايتىسقان سوڭ جەر بەتىندە ول تۋرالى ەستەلىكتەر عانا قالادى. وسى ەستەلىكتەر بارىنەن بيىك تۇرادى, مەنىڭشە. كونتسەرتتى وتكىزۋدىڭ نەگىزگى يدەياسى وسىندا جاتىر. ءبىزدىڭ ماقساتىمىز – اسىل دوسىمىزدىڭ جارقىن بەينەسىن حالىقتىڭ ساناسىندا تاعى ءبىر جاڭعىرتىپ ءوتۋ.
– باتىرحانمەن دوستىق قارىم-قاتىناستا بولدىڭىز؟ ءسىزدى ول نەسىمەن تابىندىردى؟ جالپى, ءسىزدىڭ ويىڭىزشا, ول قانداي ادام ەدى؟
– باتىرحان ەشكىمدى تابىندىرۋعا تىرىسپادى. ول مۋزىكانت, ءارتىس, ادام, دوس بولىپ ءومىر ءسۇردى. ماماندىققا, وتانعا, ادامزات بالاسىنا دەگەن ادالدىقتان اينىماي ءوتتى. وسىنى ءومىرىنىڭ بار مازمۇنى دەپ ۇقتى.
– ءوزىڭىز باس بولاتىن كونتسەرتكە قا­زاقستاننان بولەك رەسەي جانە حورۆاتيا ازاماتتارى قاتىسپاق ەكەن. اتاپ ايتساق, استانا قالاسى مەملەكەتتىك اكادەميالىق فيلارمونياسى­نىڭ سيمفونيالىق وركەسترىنىڭ سۇيەمەلدەۋىمەن الەكسەي نايدەنوۆ, ۆلاديمير كوسيانەنكو, ەرىك شالاباەۆ, اسقار دۇيسەنباەۆ, باقىتجان جانتۇرعانوۆ, بەرىك وتەۋليەۆ سىندى مۋزىكانتتار ونەر كورسەتپەك. نەگە تاڭداۋ ناقتى وسى ادامدارعا ءتۇستى؟
– كونتسەرتكە قاتىسۋعا شاقىرىلعان مۋزىكانتتاردىڭ بارلىعى دا باتىرحانمەن تانىس بولىپ, شىعارماشىلىقتارى تۇيىسكەن ادامدار. ۇسىنىس تۇسكەندە ولاردىڭ ءبارى دە ءبىر كىسىدەي كونتسەرتكە قاتىسۋعا كەلىسىمىن بەردى. سول ءۇشىن ولارعا العىستان باسقا ايتارىم جوق.
– كونتسەرتتە قانداي شىعارمالار ورىندالادى؟
– كلاسسيكالىق مۋزىكا تاريحىنان ويىپ تۇرىپ ورىن العان ۇلى كومپوزيتورلاردىڭ شىعارمالارىن – پەتر چايكوۆسكيدىڭ سەكستەتىن, يان سيبەليۋستىڭ وركەسترلىك مۋزىكاسىن, انتون ۆەبەرننىڭ كامەرالىق مۋزىكاسىن جانە يوگانن سەباستيان باحتىڭ سكريپكا مەن گوبويعا ارنالعان كونتسەرتىن ورىندايمىز.
– كورەرمەندەر باتىرحان شۇكەنوۆتىڭ رەپەرتۋارىنا ەنگەن اندەردى ەستي الا ما؟
– جوق, كونتسەرتتە ول قاراستىرىلماعان.
– بولاشاقتا باتىرحان شۇكەنوۆتىڭ رۋحىنا ارنالعان كونتسەرتتى قازاقستاننىڭ وزگە قالالارىندا ۇيىمداستىرۋ جوسپارىڭىزدا بار ما؟
– ەگەر قولداۋ بولسا, ءتيىستى جاعدايلار جاسالسا, كەلەر كوكتەمدە الماتىدا وسىنداي كونتسەرت ۇيىمداستىرىلۋى مۇمكىن.
– اڭگىمەڭىزگە راحمەت!