استانالىق اتانعانىما بەس جىل ءوتتى. نەگىزى, بالا كۇنىمنەن ەلوردادا تۇرۋدى ارمانداعان ەدىم. ەرمەك سەركەباەۆ, ازامات جىلتىركوزوۆتىڭ ورىنداۋىنداعى اريا, رومانستاردى تىڭدادىم. ءار كونكۋرستان العان جۇلدەلەرىن كورىپ, وپەراعا قىزىعا باستادىم.
ءسويتىپ, بۇل ماماندىققا ماحابباتىم ارتتى. اكەم – ونەر ادامى, قازىر مەن ءبىلىم العان قورقىت اتا مۋزىكالىق مەكتەبىنىڭ باسشىسى. وتباسىمىزبەن ونەرگە جاقىنبىز. بالا ارمانىما اكەم مەن اتامنىڭ ورنى ەرەكشە اسەر ەتتى. قازىر اكادەميالىق ءان ايتۋ بولىمىندە وقيمىن. بولاشاقتا قالامىزدا بىرنەشە وپەرا جانە بالەت تەاترى سالىنادى دەپ ويلايمىن. بۇگىندە «استانا وپەرا» وپەرا جانە بالەت, «استانا بالەت», ە.راحماديەۆ اتىنداعى مەملەكەتتىك فيلارمونيا, ت. ب. مادەني وشاقتارىنا ءجيى بارۋعا تىرىسامىن. سەبەبى الەم ارتىستەرى كەلىپ, ءوز ونەرىن كورسەتەدى. سونى كورىپ, ءوزىم دە بولاشاعىمدى ەلەستەتەمىن.
ەلوردا – مەنىڭ قۇرداسىم. جاس قالانىڭ اۋا رايىن دا وزىمە ۇقساتامىن. استانادا ءومىر ءسۇرۋ ءۇشىن ناعىز جىگىتكە ءتان قايسارلىق كەرەك. سەبەبى مۇنداعى ارقانىڭ ۇسكىرىك ايازىنا توتەپ بەرۋگە كەز كەلگەن ادام شىداي بەرمەيدى. ەلوردا ەكەۋمىزدىڭ الدىمىزدا زور اسۋ, مول مۇمكىندىك تۇر. ارمانىمىزعا قاراي قارىشتاپ دامىپ كەلەمىز. استانا ماعان ءوز ارمانىمدى ورىندايتىن مۇمكىندىك سىيلاسا, مەن ونىڭ اتىن الەمگە پاش ەتەتىن تۇلعاعا اينالامىن.
بەيبارىس ءابىش,
قازاق ۇلتتىق ونەر
ۋنيۆەرسيتەتىنىڭ 3-كۋرس ستۋدەنتى
