ۇستىمىزدەگى جىلدىڭ قاراشا ايىندا ەلىمىزدە «Burkit» ارنايى جاساعى تۋرالى فيلم كورەرمەنگە جول تارتتى. مەملەكەت قاۋىپسىزدىگى مەن ەل تۇرعىندارىنىڭ ومىرىنە قاۋىپ توندىرەتىن قىلمىستارعا قارسى جەدەل ارەكەت ەتەتىن «Burkit» ارنايى جاساعى تۋرالى جارىققا شىققان جاڭا تۋىندى وتاندىق كينويندۋسترياداعى سيرەك ءفيلمنىڭ ءبىرى جانە قالىڭ كوپشىلىكتىڭ, اسىرەسە, جاستاردىڭ قىزۋ قولداۋىنا يە بولۋدا.
كوركەم ءفيلمنىڭ ءتۇسىرىلىمىنە ارنايى جاساق, اسكەري تەحنيكا جانە اۆياتسيا, سونداي-اق 200-دەن استام بەلسەندى اسكەري قىزمەتشى قاتىسقان. جەدەل-ىزدەستىرۋ شارالارىنا ارقاۋ بولعان كارتينانىڭ ءتۇسىرىلىمى الماتى وبلىسىنىڭ كورىكتى جەرلەرىندە, قوناەۆ قالاسىندا, ەسىك كولىنىڭ تاۋ سىلەمدەرىندە جانە ىلە وزەنىنىڭ بويىندا وتكەن. «Burkit» ەكشن ءفيلمى 2 قاراشادان باستاپ بارلىق كينوتەاتردا قازاق جانە ورىس تىلىندە كورسەتىلە باستادى. فيلم رەجيسسەرى دانيار يبراگيموۆتىڭ بۇل كارتيناسى – دەبيۋتتىك جۇمىسى. فيلمدە ساربازداردىڭ ەرلىگى, دوستىق, ماحاببات پەن وتباسى قيىندىقتارى كورسەتىلەدى. فيلمدە «بۇركىت» ارنايى جاساعىنىڭ ساربازدارى «كۇرەڭ بەرەت» كيۋ قۇقىعىنا يە بولۋ ءۇشىن سىنعا تۇسەدى.
ستسەناري ارنايى جاساق قۇرامىنداعى ايبىن, قايسار جانە رۋسلان ەسىمدى ءۇش ساربازدىڭ باستان كەشكەن وقيعالارى ارقىلى ءوربيدى.
فيلمگە داۋرەن سەرعازين, سانجار ءمادي, اسىلحان تولەپوۆ, گۇلناز جولانوۆا, اسەل ساعاتوۆا, جاندوس ايباسوۆ جانە ازامات ساتىبالدى سىندى ەلىمىزدىڭ تانىمال اكتەرلەرى ءتۇستى.
ۇلتتىق ۇلانداردىڭ ەل قاۋىپسىزدىگى, بەيبىت ءومىر ءۇشىن كۇرەسكەن, جانقيارلىق ەڭبەگىن كورسەتكەن وسىنداي فيلمدەر كينو قورجىنىن تولتىرا بەرسە يگى.
