«ارناۋدىڭ» ۋاقىتى انىقتالدى

ءان الەمىنىڭ ايتۋلى انشىسىنە اينالىپ كەلە جاتقان ديماش قۇدايبەرگەننىڭ استاناداعى «ارناۋ» اتتى كونتسەرتى 29 ماۋسىمدا وتەتىن بولىپ بەلگىلەندى.

كونتسەرت وتەتىن ۋاقىتتىڭ ناق­تىلانعانى تۋرالى ءانشىنىڭ ءوزى دە جەكە پاراقشاسىندا حابارلاپ, قولداۋشىلارىنا «كۇن بەلگىلەندى! بۇل ەڭ ۇزدىك شوۋ بولماق. بيلەت ساتىلىمى تۋرالى كەيىنىرەك حابارلايمىز. قازاقستاندا 29 ماۋسىمدا كورىسكەنشە!» دەپ لەبىز قالدىردى.
بۇدان بۇرىن وكق-دا وتكەن ءباسپاسوز ءماسليحاتىندا «قازاقستان» رترك اق توراعاسى ەرلان قارين جاستار جىلى اياسىندا تالانتتى جاستاردى قولداۋ ماقساتىندا ديماش قۇدايبەرگەننىڭ كونتسەرتتىك كەشىن وتكىزۋ جوسپارلانعانىن ايتقان ەدى. ونىڭ ايتۋىنشا, ديماشتىڭ استاناداعى كونتسەرتىندە الەمدىك شوۋلارداعى تەحنولوگيالار پايدالانىلادى. 4-5 بولىمنەن تۇراتىن كونتسەرتتە قازاقتىڭ حالىق اندەرى, قازاقستاندىق جانە شەتەلدىك كومپوزيتورلاردىڭ شىعارمالارىمەن قاتار, زاماناۋي ارلەۋمەن ورىندالعان ديماشتىڭ اۆتورلىق تۋىندىلارى ۇسىنىلادى دەپ جوسپارلانعان. كونتسەرتتە قازاق, اعىلشىن, فرانتسۋز, قىتاي, ورىس, يتاليان تىلدەرىندە اندەر شىرقالادى.
كونتسەرتتىڭ بيلەت باعاسى ناقتى قانشا بولاتىنى ءالى بەلگىسىز. مادەنيەت جانە سپورت ءمينيسترى ارىس­تانبەك مۇحامەديۇلىنىڭ اي­تۋىنشا, بيلەت باعاسى تىم قىمبات بولمايتىن كورىنەدى. «باستى ماقسات بيلەتتەن تۇسەتىن قارجى ەمەس. ارينە, شەتەلدە وتە­تىن كونتسەرتتەردە ءبىز ەڭ ءبىرىنشى وسىعان ءمان بەرەمىز. ال قازاقستاندا باستى مىندەت – كوپشىلىككە قولجەتىمدى بولۋى. بيلەت باعاسى 500 تەڭگەدەن باستالادى دەپ ويلايمىن» دەدى مينيستر ۆەدومستۆو القاسىنىڭ كەڭەيتىلگەن وتىرىسىندا. كونتسەرتتە مەكتەپ وقۋشىلارى مەن الەۋمەتتىك از قامتىلعان حالىق ساناتىنا ارنايى ورىندار دا قاراستىرىلادى ەكەن.
ەستەرىڭىزگە سالا كەتەيىك, ديماش قۇدايبەرگەن قازىر اقش-تاعى «The World’s Best» بايقاۋىنا قاتىسىپ جاتىر. سونىمەن قاتار ءانشى 22 ناۋرىزدا ماسكەۋ­دەگى كرەمل سارايىندا العاشقى كونتسەرتىن قويادى.

قالياكبار ۇسەمحانۇلى