استانا قالاسىنىڭ كوممۋنيكاتسيالار قىزمەتى الاڭىندا قالالىق جۇمىسپەن قامتۋ جانە الەۋمەتتىك قورعاۋ باسقارماسى باسشىسى ورىنباسارىنىڭ مىندەتىن اتقارۋشى ازامات وسپانوۆ ەرەكشە قاجەتتىلىگى بار بالالار مەن مۇمكىندىگى شەكتەۋلى ەرەسەكتەرگە ارناۋلى الەۋمەتتىك قىزمەتتەردىڭ كورسەتىلۋى تۋرالى ءباسپاسوز ءماسليحاتىن وتكىزدى.
ونىڭ ايتۋىنشا, استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى 10 ۆەدومستۆولىق باعىنىستى مەكەمەنىڭ قىزمەتىن ۇيلەستىرەدى. سونىڭ ىشىندە 2 مەكەمە ەرەكشە قاجەتتىلىگى بار بالالارعا, 1 مەكەمە 18 جاستان اسقان ادامدارعا جانە 1 مەكەمە ەگدە جاستاعى ادامدارعا ارناۋلى الەۋمەتتىك قىزمەتتەردى كورسەتەدى.
استانا قالاسى اكىمدىگىنىڭ «جانسايا» الەۋمەتتىك قىزمەت كورسەتۋ ورتالىعى 18 جاسقا دەيىنگى بالالارعا جانە 18 جاستان اسقان پسيحونەۆرولوگيالىق اۋرۋلارى بار مۇگەدەكتەرگە (ۇيدە كۇتىم كورسەتۋ جاعدايىندا) ارنالعان. ارناۋلى الەۋمەتتىك قىزمەتتەر 640 ادام قامتيدى.
بۇگىندە ارناۋلى الەۋمەتتىك قىزمەتتەرمەن 5556 ادام قامتىلسا, بىلتىر 5189 ادام قامتىلعان ەدى. ارناۋلى الەۋمەتتىك قىزمەتتەردى كورسەتۋدىڭ وڭ ناتيجەسى بايقالىپ, 523 قىزمەت الۋشىنىڭ دەنساۋلىعى تۇزەلە باستادى. اتاپ ايتقاندا, 63 بالا مەكتەپكە بارىپ, 14 بالا جۇرە باستادى. 90 بالادا قارىم-قاتىناس داعدىسى, 132 بالادا ەستە ساقتاۋ قابىلەتى جاقساردى. 27 بالا ءوز بەتىنشە تاماقتانا باستاپ, 54 بالا ءجۇزۋدى ۇيرەندى. ەرەكشە قاجەتتىلىگى بار بالالاردىڭ اتا-اناسى – 76 ادام جۇمىسقا ورنالاستى. مۇمكىندىگى شەكتەۋلى 11 ادام ەڭبەكپەن قامتىلدى.
سپيكەردىڭ سوزىنشە, استانادا 150 توسەك-ورىنعا ارنالعان مۇمكىندىگى شەكتەۋلى جانداردى بەيىمدەۋ ورتالىعىن سالۋ جوسپارلانعان. بۇعان قوسا, پسيحونەۆرولوگيالىق اۋىتقۋلارى بار جاندار ءۇشىن 100 ورىندىق ورتالىق اشۋ ماسەلەسى قاراستىرىلىپ جاتىر. 1,5 جاستان 18 جاسقا دەيىنگى ەرەكشە قاجەتتىلىگى بار بالالار مەن جاسوسپىرىمدەرگە 30 ورىندىق جارتىلاي ستاتسيونار جاعدايىنداعى مەكەمەنى اشۋ ۇدەرىسى جۇرگىزىلىپ جاتىر.
