بيىل قازاقتىڭ كورنەكتى اقىنى, كسرو مەملەكەتتىك سىيلىعىنىڭ لاۋرەاتى جۇبان مولداعاليەۆتىڭ تۋعانىنا ءجۇز جىل تولدى. سوعان وراي جاقىندا اقىننىڭ تۋعان جەرى – ورالدا ەسكەرتكىش اشىلىپ, مەرەيتويى اتالىپ ءوتتى. سول تويدىڭ جالعاسى رەتىندە ەلوردا مەملەكەتتىك اكادەميالىق فيلارمونياسى قازاق وركەستىرىنىڭ ىقشامدالعان شاعىن قۇرامى تۇعىرلى تۇلعاعا ارناپ, ونلاين ادەبي-مۋزىكا كەشىن وتكىزدى.
سوناۋ كەڭەس زامانىندا, دالىرەك ايتقاندا الپىسىنشى جىلداردىڭ ورتا كەزىندە ەشكىمنەن تايسالماي, «مەن قازاقپىن» دەپ پوەما جازىپ, حالقىمىزدىڭ اتىن بيىككە ءبىر كوتەرگەن اقىن ەسىمى ەشقاشان ۇمىت قالعان ەمەس. ۇمىتىلمايدى دەپ تە ايتۋعا بولادى. ول كىسى اقىن عانا ەمەس, مەملەكەت جانە قوعام قايراتكەرى بولدى. ءبىراز جىلدار جازۋشىلار وداعىن باسقارىپ, ادەبيەتىمىزدىڭ دامۋىنا ۇلەس قوستى. اسىرەسە, ايتۋلى ازاماتتىڭ 1986 جىلعى جەلتوقسان وقيعاسىنىڭ كەيىن بيىك مىنبەدە قازاق جاستارىن قورعاپ سويلەگەن جالىندى ءسوزىن جۇرت ەرلىك دەپ باعالايدى.ادەبي-مۋزىكالىق كەش بارىسىندا اقىننىڭ شىعارماشىلىعى تۋرالى مازمۇندى ەستەلىك ايتىلىپ, «مەن قازاقپىن» پوەماسىنان ءۇزىندى وقىلدى. سونداي-اق فيلارمونيا ونەرپازدارى اۋەلەتىپ ءان سالىپ, كۇمبىرلەتىپ كۇي توكتى. قىسقاسى, ارقالى اقىندى ارداقتاعان كەش كورەرمەن كوڭىلىنەن شىقتى.
